Read Kambera NA MBUKUNA I AYUPU 29 Bible Online

NA MBUKUNA I AYUPU 29 - Kambera bible

NA MBUKUNA I AYUPU 29

¹I Ayupu na-pangala-nya na pa-kalokangu-na,

²“Làti na luringgu ka hili hama-naka-awa àmangu; la rehina nu ba naopa-nggapa i Ala.

³Nyungga ba nawua mànungga pa-ndulangu, na-pahambila-ya na àndanggu jàka kulaku la kapàtangu.

⁴Nuda-haka da lodu bunjuku-nggu, ba na-pamaü-nyapa na umanggu na pa-kanduangu-ma dàngu i Ala.

⁵La rehi nu nadidi karaha-kapa i Hupu Mambiha, dàngu da ananggu da-winggiru-nggapa.

⁶Dadangu-pa da wai huhuda da bandanggu. Dadangu-pa lonahu-da da pingi haitungu-nggu, jiapa ka pa-pamula la tana pa-watungu-ha.

⁷Jàka da-mandapu pa-matarungu da ama bokulu paraingu, dàngu jàka ku-mandapu la hongada,

⁸ka hadidi-danyaka da bidi tau, ba daita-kaka nyungga. Da ma-kaweda-mbu da-hadangu pa-ndolaku pahàmungu; la patembi-ka.

⁹Hamangui da ma-pangaru da-pànjangu pa-kareuku,

¹⁰dàngu da tau paràka patembi nda da-kareuku-mbupa.

¹¹Nggamu bia marongu-ya na ngeranggu da-hangàtaru; nggamu maita-ka, dawotu-nya na pawunda-nggu na mahàmu.

¹²Nadu, kundula-ya na tau mila na makarai pa-ndulangu; kujura-ha da ana mamila da manda ningu ma-andaha.

¹³Dawotu-ngga parai tau ma-handuka halawàla, kundula-ha da kawini meti lei hi daluri mambiru.

¹⁴Na patuunggu na-kunduhu nda ningua nyurana; ku-pandolaku mànu-maya na ma-padeningu.

¹⁵La tau mapoki, kunjadi mata; la tau kaliparu, kunjadi wihina.

¹⁶La tau mamila, kunjadi ama; la tau tàka, ma-pakahiri-ka.

¹⁷Tàka na kawaha tau mbana eti, kupata-ya, dàngu na tau pa-haruida ku-pamara-ya.

¹⁸Na pamonu-manggu jiaya la pangala-nya na malai luri, dàngu la pameti mandangu la umanggu.

¹⁹Nyungga hama pingi ai matumbu kamboka-ka, na amuna na-tomangu wai dàngu da kahanga-na dambaha la wai hamburungu.

²⁰Mbutana na tau nawotu mànungga, dàngu ndedima duku na-kawawaku na àtalu-nggu.

²¹Nakandii na tau, jàka ku-wuangu lii panaungu; mbuta-naka na papanii-nggu da-katàmbalu patingi hàmunya.

²²Jàka kuhàla pa-kareuku, nda hili ningu-apa pahili bonja; na kareuku-nggu na-pahini hama tuna na kambàtiku wai urangu.

²³Mbuta-naka na tau da-kataku hàmu etiya na papanii-nggu, hama tuna tau raïngu mayema wai urangu la pawàla ai.

²⁴Kuriki mirinja ba namàli na monungu-da; na hawewa-na na matanggu nabonja-ya na hangganggiru-da.

²⁵Nyungga-maka ma-katangu ulingu, dàngu na botangu mbuu ndàbana. Ku-kapipi-ha nyuda hama tuna maràmba la padua tanatara-na, hi kuomba-ha la hawina-da.