Read Kambera NA MBUKUNA I AYUPU 3 Bible Online

NA MBUKUNA I AYUPU 3 - Kambera bible

NA MBUKUNA I AYUPU 3

¹Tunaka nu pakiringu-nanyaka i Ayupu pa-kareuku hi naràtu-nya na lodu dedina,

²“Dou Ala, ràtu-nyawa na lodu dedinggu, dàngu na rudungu tumbunggu la kambu inanggu!

⁴Dou Ala, màtawa kau pa-kapàta-nya na lodu nuna, upodahu-ya la kanandingu-mu ka lupangu na-munangu; àmbu pahia-dunyapa pa-hambila-nya hambila yarahu.

⁵Màtawa na lodu nuna kau pa-kapàta mitinya, kapàta wuru wila, lamaru dàngu hambila nanu; kamburu wànyawa karumangu dàngu hambongu, pa-hapindi-nyawa welingu la hambila mata lodu.

⁶Màtawa na rudungu nuna ka àlinya welingu la diha ndaungu dàngu wulangu; àmbu hili namu-duyapa, àmbu hili diha-mbuyapa.

⁷Màtawa na rudungu nuna ka na-kapàta wuru wila nda ningu pa-mbuhangu, nda ningu mbaha eti.

⁸Ha tau makàli ràtungu lodu dàngu ma-paruungu Lewiatangu,[6] panggàna-nyawa harangu dàngu ràtungu na lodu nuna;

⁹àmbu na-hambila-dupa na kandunu mutu romu, àmbu pahia-dunya pa-hambila na harii pa-barahu! Màtawa na rudungu nuna ka kahewa patia-nanya na tàkana na lodu dàngu na monungu mabidi.

¹⁰Màtawa ka nanggàna-ya ràtungu nu na rudungu nda hàmu ba na-habola-ngga na inanggu, hi namàta-ngga pa-pàdangu mayila.

¹¹Ka nggikina hi nda kumeti bia la kambu inanggu, jàka ndia hi nda nambota bia na kayeku-nggu la lodu dedinggu?

¹²Ka nggikina hi narohu-ka dàngu hi nababa-ka inanggu, hamanai hi na-pahuhu-ka la huhuna?

¹³Ka kumeti bia làti la loduna nu, ka katuda dàngu pànja hàmungu-dunggu-nyaka,

¹⁴hama tuda da maràmba dàngu da maningu kuwahangu, da ma-pahada belinya na uma maràmba weli ndaingu.

¹⁵Ka katuda hama tuna ana maràmba mini, na ma-paihi-nya àmahu bara na umana.

¹⁶Ka nggikina hi nda kudedi meti bia ka peku katuda mangandu hàmunggu?

¹⁷Lai nu, daa la reti, na tau kajàliku nda nawunda-apa ma-akatu dàngu na tau ngangu ngganji na manjili na-ngalangu pa-pànjangu.

¹⁸Da tau tanawangu-mbu daluri hàmu, damara welingu la hàngga dàngu la bàtiru-da da madaiha.

¹⁹Lai nu duna, da tauka mbuu ndàbada hama biada: da tau mawuwa tamuda dàngu da manda hunga tamu. Dàngu da atambu jiangu-ma da-pahàla la hupu njàpuna.

²⁰Ka nggikina hi puli bianya paluri mayila na tau? Ka nggikina hi wuanya hambila na tau ma-handuka?

²¹Nyuda duda darihi mbuhangu-pa reti welingu la banda, danedi-nya na meti, tàka nda natàka ndokua.

²²Jàka dameti-ka hi taninja hi dapàda-nya na luri hàmu.

²³Na rehi na manàmu-nya na-pa-lumburu-nyapa paraïna i Ala, na-nggupulu weli winggiru-nja.

²⁴Hiluya na ngangu ku-padudurungu, nda ku-pànjangu-ma pa-kanjaiku.

²⁵Mbuu ndàba da ma-pa-mangginggitu eti danggàna-ka, mbuu ndàba da pa-mangàdatu-nggu dalànda-ngga.

²⁶Nda ana ninguma mambiru ndumanggu ku-mayila manda ningu njàpungu,” wàna.