Read Kambera NA MBUKUNA I AYUPU 30 Bible Online

NA MBUKUNA I AYUPU 30 - Kambera bible

NA MBUKUNA I AYUPU 30

¹Tàka nàhu na-payudi-ka tau marihi pa-maeri. Àmangu da amada mali wawa halawàla-ha wànggu la padaiha da mbimbinggu pa-kariangu ahu pawangu.

²Lai nyungga duku nda ningua linguda ba nda ningu-apa àtalu-da.

³Da-rimbangu-ka hi dira mayila-ha, hi dangangu amu ma-marokutu la maràda telangu malinggitu.

⁴Dabuta ana ai la maràda telangu hi danganja da rauda pa-kariangu amuda.

⁵Nyuda payaulu-ha ba wàngu pa-kayàyaku-nja hama tuna ba yaulu ma-manganga.

⁶Da-ndàdiku la liangu; da ma-palumbu la karaha palindi, datuuha umada.

⁷Dakala - ladaku la maràda telangu hama tuna banda, da-pakanguhuru-ngu la lumbu jemi la omangu.

⁸Nda dawuwa-a da tamuda dàngu nda datama-a la kira, tau pambàda wànggaha welingu la paraida.

⁹Tàka nàhu damai pariki-ngga; dira payili etiya na ngerana wàdangga la etida.

¹⁰Ba da-tàngaru-ka tau ngia wawaya dàngu ma-marihaku-ya, wàdangga, lupangu da-pangànji-ya na matanggu.

¹¹Nadu ba i Ala-maka ma-pawiti-nya hi ku-lamanga dàngu nda ku-payatangu, da-hanubuku-nya na mbenida.

¹²Na kalibaru ma-akatu nuna na kaluluku-ngga welingu la hangga, dàngu hi dawuku hahaya na njorunggu.

¹³Da pa-manggàtahu-ya na àndanggu ka patàlaru-ka nyungga; nda haàtu-a ma-dimbaku-ha[48] ba jiaya nanjungu-da.

¹⁴Hama tuna iwaha ba da-tumburu-ya na kangeli ngia pa-torungu-nggu; damai pa-mbabungu la panapu-ngga nyungga.

¹⁵Na bàrangu eti manda najaru na-panggàbalu-ngga; hama tuna hapuputu ngiluya ba nalaku làpahu na hada taunggu; hama tuna karumangu malaku làpahu, ba na-munangu na luri pa-ohangu-nggu.

¹⁶Nàhu kutika pameti-ka-amangu; nda ana halimu-mana na mayila-nggu.

¹⁷La rudungu da-katiu hàla da riinggu; na katiu ma-pakati nda ana pànjangu-na.

¹⁸I Ala na-njàkilu-ka la nggoru kalembi-nggu hi na-karukutu na pakinggu la ihinggu.

¹⁹Na-dànjaku-ngga la kapihaku, hi hama tuna kangudu-ma-akaka!

²⁰Kuwara-nggau, dou Ala, ndau hema-aka; jàka ku-hamayangu, ndau talinga-angga.

²¹Mbana eti-maya na pawunda-mungga, ukapidihu wàngga kapàru-muka mbutana.

²²Upahia-nya na ngilu la pa-hawuru ngàndika; daa la ngilu mbangatu upanggilu-nggaulu-ka.

²³Kupi-manya, ba ngàndi-mungga la parai meti, la ngia pa-pauhi-nja da maluri-ka mbutada.

²⁴Ka nggikina hiu kaluluku-nya na tau hanggàmaru, na manda nggàra pawunda-na mbulungu-ana na karaina pa-aïngu?

²⁵Ka nda kuhii da-anya na tau ma-hawina, dàngu ba kumila-nya eti na tau mamila?

²⁶Kumonu-nya na pa-ohangu dàngu na hambila, tàka na matàka-ngga kalutu-ya dàngu kapàtangu-ya.

²⁷Ku-tambàriku ruku handuka handànga; hau lodu - hau lodu bonjangu-mananya padangu na mayila-nggu.

²⁸La kapàtangu, ba nda ningu hambila, kulaku njadangu; ku-ndolaku la hangga madangu pakarai pa-ndulangu.

²⁹Na talia liinggu na-hawina pamila etingu hama tuna kaladaku-na na ahu rumba dàngu ota maningu kàpangu.

³⁰Na manula-nggu na-mitingu; na ihinggu na-mutungu paraï pa analalu.

³¹Àmangu kurongu lingu jungga mbaha eti, nàhu didiya na padudurungu-ma-a.