Read Kambera NA MBUKUNA I AYUPU 31 Bible Online

NA MBUKUNA I AYUPU 31 - Kambera bible

NA MBUKUNA I AYUPU 31

¹Mbàda pa-njanjingu-ngguka wàngu harangu-nggu ba nda ku-tàngaru wàngu matarungu-a bidi kawini.

²Nggàraya na pawunda-na i Ala lai nyuta? Nggiki pa-himbalu-nanyaka na pawunda-na na tau?

³Hanggàmaru dàngu mayila pa-patàka-nanya na tau mawunda ma-akatu!

⁴I Ala napinya na pawunda-ngguka mbutana; naita hàlaya na pangganggu.

⁵Ku-harangu ba ndedima kuwunda ma-kaleka; ndedi ku-panyonga-ma tau.

⁶Màtawa i Ala ka na-hukutu-ka la timbangu pa-deningu, jiangu-ma napinya ba nda kunjala-a.

⁷Ngera hama tuna mbàda hiliru-nggu welingu la ànda tànji, jàka ndia hi na-orangu la ma-iraku na etinggu, jàka da-marihaku la njala da limanggu,

⁸màtawa na tau hawiangu ka nanganya nggàraya na pa-hàbaru-nggu, dàngu ka da-talàpu hàlawa da ihi wokanggu.

⁹Jàka era mataru-nggunya na papaha angunggu, hi ku-kahinu kawini-nya la hambeli pindu,

¹⁰màtawa na papaha-nggu ka na-manahungu tau hawiangu; màtawa ka na-mahuru la nggala mini hawiangu.

¹¹Jàka kuwunda-maya na njala ànga tungu nu, ràka-mana ka hukungga.

¹²Na njala nuna na-patàlaru hama tuna epi naraka, mbuu ndàba da mangunggu na-pakehi pambuta-ha.

¹³Ba na-handuka na atanggu ba kunjala-nya na ngabana, kutingi-ya hi kulumu wànya eti kunduhu.

¹⁴Jàka ndia, ka nggiki hama hurungu-nggu la Alanggu? Nggàraya nahema-nggu la rehi tàkana pa-patanda-ngga wai ngera?

¹⁵Ka nda i Ala-a na ma-padika-ngga, na ma-padika-mbunja da a - ata-ngguka nuda?

¹⁶Ndedi ku-pandia-ma duku pandula tau mila, jàka ndia la papuli-nja paluri mbota monungu da kawini meti lei.

¹⁷Ndedima ku-pahia-nja pa-rimbangu da ana mamila, tàka nyungga wiki hi patoma biana-nyai na ngangunggu.

¹⁸Welingu pa-anakeda-da ku-kulipu-ha; la luringgu-ka ku kapipi-ha nyuda.[49]

¹⁹Jàka ku-itangu tau manda patoma lurina, malalu milana la pakei pakina,

²⁰ku-pamamitu wànya hakàla wulu mbimbi wikinggu, hi nawotu paweli etingga.

²¹Ngera hama tuna jàka mbàda panyonga-nggu làti ana mamila, ba kupi hàmunya na talunggu la palakara-nggu,

²²màtawa ka dambata da limanggu hi da-pahàlangu la kundunggu.

²³Nda jia wunda-anggu matungu-nu, nadu na hukungu-na i Ala ba dira pa-mangàdatu-nanya na etinggu.

²⁴Nda kumonu-manja da bandanggu,

²⁵jàka ndia la pa-bokulu-nja eti da pawulu-nggu.

²⁶Nda ku-hamayangu-ma la mata lodu ma-hambila yarahu jàka ndia-kai la wulangu ma-kajilaku manandangu.

²⁷Nda na-karitaku-ma na etinggu lai nyuna, jàka ndia la pa-puduku limanggu ka tembiya nyuna.

²⁸Na njala tungu nu ràka-mana pa-ngalangu hukungu meti; ba mbàda pandia-dudanya i Ala Hupu Mambiha.

²⁹Ndedima nambaha na etinggu ruku mayila-na na muhunggu, jàka ndia la pa-hayidi ba na-hanggàmaru nyuna.

³⁰Nda ku-hamayangu-a ka nameti na muhunggu; nda kuwunda-ma manjala tungu nu.

³¹Da tau maràma lai nyungga dapi-manya, nggamu biaha kuwua-nja pangangu la umanggu.

³²Na umanggu na-tabunggahu la tau pàlaku; ndedima kumàta-nja patodu la ànda.

³³Na tau hawiangu na-kawiningu njalana, tàka nyungga duku nda ana wundama-nggu hama tuda nyuda.

³⁴Na pangàdangu madangu nda ku-mangàdatu-anya, hamanai na pa-akangu tau, nda ku-kawela-mbunya. Nda ana ndàdiku-manggu la uma jàka ndia nda ana kapàndi-manggu, paraï pa-mangàdatungu pa-akangu-ma-a.

³⁵Ka nda ningua ihu tau ma-mbuhangu pa-patingi-nya na kareuku-nggu? Ku-harangu ba ma-deningu hàla-maya nuna. Màta àruki i Hupu Mambiha ka nahema-ka. Ngera hama tuna na panjala-nangga muhu ka tulihu hàlaya hi kuita-ya,

³⁶wàngu bokulu etinggu ka tunggu-nyaka la kundunggu, dàngu ku-patàmbaku-nya la katiku-nggu hama tuna tubuku.

³⁷Jiangu-ma kupanii hàlanya i Ala da pawunda-ngguka mbutada; hi dàngu bokulu etinggu la hanggana ba ku-tanganjiru.

³⁸Ngera hama tuna na tana pa-lukunggu ka pa-manganga-nggunya, dàngu pawàhi-nggunya welingu la mamangu-manya duna,

³⁹ngera hama tuna jàka mbàda ngaa pambuta-ngguha da ihina, dàngu na tau tani na matondu-nya hi kumàta-nya pa-rimbangu,

⁴⁰màtawa ka àmbu kamànggihu dàngu uhu nggàndumu-ha da matumbu la woka, tàka màtawa ka wuku rii madàka dàngu ka wituha,” wàna. Tuna nu na kareuku-na i Ayupu.