Read Kambera NA MBUKUNA I AYUPU 32 Bible Online

NA MBUKUNA I AYUPU 32 - Kambera bible

NA MBUKUNA I AYUPU 32

¹I Ayupu duna napii hàmu-manya na pa-deningu-na, tàka ba tuna da kandua-na pa-katailu-da nda dahili mbuhangu-apa pahema-ya.

²Tàka lai nu ninya na haàtu ma-tamungu Elihu anana i Mbarakaheyilu, na haàtu nuana i Mbuhu welingu la kalibaru Ràmu. Nda na-ngalangu-apa panàdi-ya na mbenina, ruku pa-mànangu-na wikina i Ayupu dàngu ba na-panjala-ya i Ala.

³Na mbeni-mbunja da kandua-na i Ayupu da matailu-da rukuna ba nda da-ngalangu pa-pandia-ya na kareuku-na i Ayupu, jiapa ka da-panjala-yakai.

⁴I Elihu marihi pa-maeri-ya la hongada nyuda, jia ba tuna hi na patiangu lundu njàpuna na pabanjarungu-da.

⁵Ba naita-haka ba nda da-ngalangu-apa nu da matailu pahema, ka mbeni-nanyaka,

⁶hi wàna ba na-kareuku, “Nyungga bidi tau-kapa, tàka nyimi dimi kaweda-minyaka, jia ba tuna hi ku-mangàdatu dàngu kundua ndandi la patuu papinggu.

⁷La kanandingu-nggu, nyimima bàdi ma-pabanjarungu, na marihi ma-maaya bàdi ma-paberingu manggàna-na.

⁸Tàka na mawua-nya manggàna na tau, didi-aya na Ngahuna i Ala Hupu Mambiha.

⁹Na tau hi na-manggàna, nda ruku-ana ba na-bonjangu na lurina; na tau hi na-jàngapu-ya na ma-patubangu, nda ruku-ana ba namalai na lurina.

¹⁰Jia ba tuna, patingi-nggawa; puli-nggawa ka kutiki-ya na maninya la wininggu.

¹¹Wàngu lerangu etinggu ku-patingi-nggai bai kareuku, dàngu ku-patia-nggai bai himbu kareuku ma-manggàna.

¹²Ku-katàmbalu pahàmu-nggai; kurongu-kai ba dirami. Na njala kareuku-na i Ayupu ba ndai hunggu-anya mbutina.

¹³Nggiki hama panii biami ba mbàda hunggu-minyaka na manggàna? Nadu bai kandii lerangu. Na ma-ngalangu pahema-ya i Ayupu didi-aya i Ala.

¹⁴Lai nyimiya na-kareuku ningu i Ayupu, nda lai nyungga-aya, tàka nyungga duku nda kuhema-a hama tuna nyimi.

¹⁵Oi, Ayupu, nda da-ngalangu-a pahema; nda ningua pa-kareuku wàda.

¹⁶Nyuda ndolaku biada-nya, nda da-ngalangu-a pahili kareuku. Lupangu-mapa nu ku-patiangu, jiapa ka dakandii-kai?

¹⁷Ndia-a, nàhu hema-nggunyaka; patàka-nggunyaka na papinggu.

¹⁸Nda na norungu-apa na etinggu la pa-patiangu. Nda kuhili ngalangu-apa pa-patoru-nya na maninya la wininggu.

¹⁹Jàka kukandii bia, jiangu-ma ku-kapoku, hamana na tambàla na mambinu-nya wai angguru bidi.

²⁰Ku-kareuku-ma bàdi, ka peku mandangu-na na etinggu; lupama ku-bunggahu ngarunggu ka kuhema.

²¹Nda ningu papulu angunggu la lii pahili yiana dàngu nda haàtu-mbui pawo - wotunggu.

²²Jàka nggiki hamana ba hàhalungu, nda kupingu-mbu, dàngu jàka era palaku-nggunya nuna, jiangu-ma nalu hukungga i Ala.