Read Kambera NA MBUKUNA I AYUPU 33 Bible Online

NA MBUKUNA I AYUPU 33 - Kambera bible

NA MBUKUNA I AYUPU 33

¹Nàhu, oi Ayupu, patingi pahàmu-nyawa na panii pa-patàka-nggunggau yiana.

²Nyungga duku ka kupanii mbàda wàngguka.

³Wàngu eti kunduhu ba ku-kareuku; na papanii-nggu jiaya na ma-tubangu.

⁴Na Ngahuna i Ala na mawulu-ka hi nawua-ngga luri.

⁵Jia ba tuna, jàka napeku, hemaki-kawa. Hawanjiru-wa la pa-kahiri wikimu.

⁶Lai Ala, nyungga dàngu nyumu nda ta-pahilitu-a, welinda la tana wurungu ba na-unggulu-ta.

⁷Jia ba tuna, àmbu mangàdatu-dungga; nyungga duku nda kuwuku-aya la pa-pakàku-kau.

⁸Ba tuna, mbàda rongu-nggunyaka na papanii-mu, dàngu kupi-manya nggàraya na pawuku-mu.

⁹Tàka nyumu, ‘Nda nggàra-a papangga-nggu. Nda ningua nyuranggu dàngu nda kuwunda-a manjala.

¹⁰Tàka i Ala nahi - himbu biangga lata ka tumburu-ka nyungga, hi natuuka beri papana-ngga.

¹¹Nyuna natunja nggili bàhi da wihinggu; hi na-hamata-ya na nggoda nggàduku-ngguka mbuu ndàbana,’ wàmui.

¹²Oi Ayupu, na maninya la winimu manjala juaya! Nadu i Ala duna narihi bokulu-pa welingu la tau.

¹³Ka nggikina hi pulunya i Ala ba nda na-ihili-nya na padudurungu tau?

¹⁴Jiapa ka nggiki hama kareuku-na i Ala, nda haàtu-a ma-ihili-nya na paniina.

¹⁵Ba talànga katuda minjalu-na na tau la rudungu, na-kareuku i Ala la manggadipangu dàngu la harii mata.

¹⁶I Ala na-paràha-nja pa-patingingu; na-pakatàtaku wànja lii hànggana.

¹⁷Na pawuku-na ka peku pànjangu-da panjala dàngu ka da-bànjalu-ha da ngànjangu-da.

¹⁸Nda napuli-anja pamohu-molungu; namangga-nja welingu la meti.

¹⁹I Ala nahàngga wànya kanyaki na tau hi nahidu hàla na ihina.

²⁰Na mahidu nda na-patikingu-a pangangu, da pangangu da madira hàmuha da palabu eti.

²¹Na ihina na-kariku, da riina paita hàlaha.

²²Nyuna mareni beli-naka la pangia ma-palupangu, na parai tau meti mbàda lihi-nanyaka.

²³Talànga wanguna haàtu la honga harata papalewa-na i Ala ma-panamu-nya wai ngera na tau, napa namai pandula-ya nyuna.

²⁴Dàngu mila etina napanii na papalewa, ‘Pahàla-yawa nyuna, nda napeku-a papuru la pangia mameti. Yiada-ha da àmahu pa-pahàla wànya, ka peku mara belina,’ wàna.

²⁵Na ihina na-àtalu kapàru na-hayandalu hama tuna bidi tau.

²⁶Jàka na-hamayangu, napa i Ala namila-nya eti, napa nyuna nawotu mbaha etinya i Ala. hi na-pajia beliya na ngerana paraïna i Ala.

²⁷Tàka la hangga madangu napa napanii, ‘Na ma-akatu mahàmu-ya wànggu bia, da-bokulu-ma da njalanggu, ba tuna nda nahuku-angga i Ala,’ wàna.

²⁸I Ala nahiri-ngga palaku la pangia mameti, hi kuluri biapa nàhu, wàna.

²⁹Nahili beli - hili belinya, ba na-palaku hàlaha yiada paraïna i Ala,

³⁰ka peku pahàla-nanya na tau dàngu ka nawua-nya pa-ohangu la lurina.

³¹Kau patingingu-wa oi Ayupu, talelingu kahilu-mu kau kandii, nàhu nyunggaka ma-kareuku.

³²Tàka jàka ningu pambuha-mu patiki, kareuku-wa; jàkau padeningu, ku-pajia-maya duku.

³³Tàka jàka ndia, kandii biawa kau patingi-ngga, ku-mbuhangu pa-papeka-nggau manggàna.