Read Kambera NA MBUKUNA I AYUPU 34 Bible Online

NA MBUKUNA I AYUPU 34 - Kambera bible

NA MBUKUNA I AYUPU 34

¹Ka nda tau pingu-akai maningu eti diha kanandingu? Ba tuna, patingi ndàbanja yiada da papanii-nggu.

³Na tau hi napinya hàmuna na pangangu jàka nahoba-ya, hamanai na kareuku manggàna jàka ronguya.

⁴Yiana na lii ta-manginjiru-ya bàdi hàlaka hi ta-pahamangu la pabàti-ya.

⁵Nadu napanii i Ayupu, ‘Nda ningua njalanggu, tàka i Ala nda na-mbuhangu-a pa-pamàna-ngga.

⁶Kambàliku-nanya wànangga, nda kunjala-a ba wànggu. Nàhu manua mandàkangu-nggunyaka, jiapa ka nda kunjala,’ wàna.

⁷Mbàda itangu-mika tau hamana yiana i Ayupu? Nda na-pànjangu-ma pa-kamibi-nya i Ala.

⁸Nyuna na-mbuhangu pa-paori dànja da tau katadaku dàngu pa-panggolu dànja da tau akatu.

⁹Napanii ba kahewa-maana jàka na-pamukarungu pawunda-ya na pambuha-na i Ala.

¹⁰Oi, tauka maningu kanandingu, katàmbalu patingingu-wa! Nggiki hama wunda biana manjala i Ala Hupu Mambiha?

¹¹Nyuna na-palimba-nya la tau nunjuya na pawunda-na, na-palua-nya lima kikunya na huri lurina.

¹²I Ala Hupu Mambiha nda nawunda ma-akatu; mbuu ndàbana na tau nawua-nya ma-padeningu.

¹³Nggamuya na ngia pangala-nanya na kawaha-na i Ala? Nggamuya na ma-pakata-nya yiana na pinu tana lai Nyuna?

¹⁴Jàka era pandàngi-nanya i Ala na lurina na tau, hi napiti beliya na lurina,

¹⁵ka meti hàla-danyaka da ma-kayidi yàdaku, hi kumburu tana beliya na tau.

¹⁶Ba tuna, jàka tau paeti-kau, katana-yawa, talelingu kahilu-mu kau patingingu.

¹⁷Màla ka panjala-munyaka nu i Ala ma-padeningu dàngu na marihi talu? Bau kakaya i Ala nahuda etinya na ma-padeningu?

¹⁸I Ala nahuku-nya na maràmba dàngu na ma-kawaha jàka da-akatu dàngu da-katadaku.

¹⁹Nyuna nda na-karaha-aha da maràmba, dàngu nda na-pangia ngaba-aya na tau wulu welingu la tau mila. Maa ba pa-padika hàla dunanja.

²⁰La padua-ka rudungu, da-ngalangu pameti harabàndangu. Nahuku-nja paraïna i Ala hi da-tàlaru; namuda-ma-a pa-pameti-ha da ma-kaborangu.

²¹Nyuna na-hamata-ya na luri tau, naita hàlaya na panggana.

²²Nda ningua ma-kapàtangu, jiapa ka nda nggiki mitingu-mana, na ma-ngalangu pa-kawini-nya na tau njala.

²³Nda na-kawuku-anya rehi[50] na tau paraïna i Ala, ka na-patanda-nya ngerana.

²⁴Nda najàra-a pa-manginjiru dàngu pa-kanuturu ba na-papànja - nja da ma-kawaha dàngu ba nawotu-nja hiluda.

²⁵Nadu, napi-manya nggàraya na pawunda-da; ka kuli-nanjaka hi na-palàjaru-ha nyuda la rudungu.

²⁶Na-pamayila-ha nyuda ruku njalada, la hangga madangu ba nahuku-nja nyuda.

²⁷Nadu, nda danunju-aya na pambuha-na dàngu nda da-ihili-anja mbuu ndàba da hupu liina.

²⁸Nyuda da-pawiti-nya na padudurungu tau mila na hiida narongu-ha i Ala.

²⁹Jàka nabota-ya i Ala la pakandii-ma-a, nda haàtu-mbu tau matoru mbeni pa-panjala-ya. Jàka na-kawiningu wikina, nda haàtu-mbu tau ma-ngalangu pahunggu-ya.

³⁰Na ba - banjaru-ka nda damàka-a pa-pabeta-nya na ma-kawaha la akatu-na ba na-pakapidihu.

³¹Oi Ayupu, màla mbàda peka-munjaka nu da njalamu lai Ala? Mbàda pa-njanjingu-muka la panda hili wunda manjala?

³²Mbàda kamahi-munyaka ka na-paita-nggaunja da njalamu? Mbàda harangu-muka la papànja-nja nuda da pawunda-mu?

³³Nggiki hama wua bia-nanggaunya na pambuha etimu i Ala, bau hàlaka panda patunju-ya na pawunda-na i Ala? Nàhu, nyumuka bàdi mabota-ya, nda nyungga-a. Panii-yawa jàka nggàraya na winimu!

³⁴Mbuu ndàba da tau manggàna lupangu-ma da-patunju-ya; na tau manggàna na marongu-ka napa napanii

³⁵ba kareuku nda jàngapu-nanya i Ayupu, dàngu na papanii-na nda ningu ihina.

³⁶Jàka kanandi pahàmu-nya na papanii-na i Ayupu, na-lohangu ba na-pakareuku tau akatungu.

³⁷Da papangga hili wihina nahili bonja wànya hau njala; na-patula ngganggangu hanggangu lai Ala, hi na-pawawa-ya la hangganda nyuta.