Read Kambera NA MBUKUNA I AYUPU 36 Bible Online

NA MBUKUNA I AYUPU 36 - Kambera bible

NA MBUKUNA I AYUPU 36

¹Patingingu-ki hakudu, patiangu pàku, ba ninyapa na papanii-nggu la ngarana i Ala.

³Na papinggu na-lerangu-ma; jiaya na pa-pajiliku wànggunya ba pa-deningu-nanya na Ma-padikangga.

⁴Na kareuku-nggu nda ningua ma-kabàli; hangga-munya na tau paeti.

⁵I Ala kanjupu ma-wirungu-ya! Mbuu ndàbana naita pa-làpahu-nya. Tàka nda haàtu-a tau pa-pamàrahu-na.

⁶Na tau njala nda namàta-anya paluri mandai, na-wuangu mamola la tau ma-mayila.

⁷Da tau tànji na-hamata-ha Nyuna, na-payàpa-nja kawaha hama tuna da maràmba, hi tembi palupa-nja lundu nu - nu.

⁸Tàka jàka tangga wànya nggili bàhi na tau, handepa-nanya ruku pawunda wikina,

⁹da njalada dàngu da ngànjangu-da na-bunggahu-ha paraïna i Ala.

¹⁰Na-paràha-nja pa-patingi-nya na panaungu-na dàngu la papànja - nja da akatu-da.

¹¹Jàka datundu-nya i Ala dàngu ka dalumu-nya Nyuna, nyuda daluri peku dàngu daluri lànyapu lundu njàpu lurida.

¹²Tàka jàka nda da-patingingu nyuda, jiangu dameti la ndubada.

¹³Da tau nda pamiri da-pakàpa-ya na ma-karaü; jiapa-kai ka nahuku-nja i MIRI, nda dabihu-a pakarai pa-ndulangu.

¹⁴Dameti habàna ba bidi tauhapa, ba dira iraku-ya na lurida.

¹⁵I Ala na-ajaru wànya mayila na tau, na-patàka-nya harui ka na-pàdangu wikina.

¹⁶I Ala mbàda pahàla-nanggauka welingu la harui; ungalanya na luri mambiru, na menja ngia pangangu-mu nambinu-nya pangangu.

¹⁷Tàka nàhu kikunya na akatu-mu, uhandepa-ya na hukungu.

¹⁸Rimangu-wa, àmbu na-panyonga-kau ndui pa-parunungu; àmbu na-panjàra-nggau pawulu wàngu.

¹⁹Kahewa-ana bau wara pakarai pa-ndulangu, nda ningua linguna mbuu ndàba na àtalu kapàru-mu.

²⁰Àmbu rinju dunya na rudungu kapàtangu, na rehi mohu-molungu-da da banjaru.

²¹Pananjarungu, àmbu pa-mbelingu du la katadaku. Na mayila-mu jiaya kau manjabii wànya na ma-akatu.

²²Namu-yawa, madira bokulu kawaha-nanya i Ala. Ningu nu ngguru mahama wirungu-na Nyuna?

²³Nggamu mamàka pa-paita-nya ànda ngia palina Nyuna jàka ndia matoru mbeni pakàla-ya ba njala-nanya?

²⁴Pawotu mànungu-ya rukuda da pawunda-na; tàka nyumu dumu ràka-mana jàkau tunya wilina.

²⁵Naita hàlaya tau na pawunda-na; tàka nda haàtu-mbu mapi pa-langatàka-nya.[51]

²⁶Nyuna i Ala ma-mangarangu-maya, nda ta-ngalangu-a pa-manginjiru-ya Nyuna jàka ndiakai la padiha-ya pira mbua ndauna na lurina.

²⁷I Ala mayila-ya na wai welingu la pinu tana hu dita la karumangu hi na-panjilu-nya panjadi wai urangu ma-kambàtiku.

²⁸Nyuna na-huburu-nya na urangu welingu la kàmbangu; na-paliri-nya la tau pinu tana.

²⁹Nda haàtu-a mapinya na njanjaru-na na karumangu hamanai na kanduruku la awangu la ngia pandauna i Ala.

³⁰Na-pahambila wànya kabilaku na awangu nggubulu-na, tàka na latana na tehiku na-padaingu pa-kapàta mitingu.

³¹Tuna nudu na huri paluri-nanya[52] na ba - banjaru-ka hi nawua-nya pangaana mabundu làndangu.

³²Nayàpa wànya limana na kabilaku hi na-paràha-nya pa-hariku-ya na pa-katutu-na.

³³Na linguna na kanduruku tanda-nanya ba tungu-nanya na làpuru, da bandambu dapinya ba lu tungu-nanya na ngilu mbangatu.