Read Kambera NA MBUKUNA I AYUPU 37 Bible Online

NA MBUKUNA I AYUPU 37 - Kambera bible

NA MBUKUNA I AYUPU 37

¹Na làpuru na-pakandàndaku-ya na etinggu hi na-kadukungu na hangahu-nggu.

²Patingi-nyawa na warana i Ala, ha nyimika mbuu ndàbami; katàmbalu-nyawa na kanduruku maluhu la ngaruna.

³La hanggubu awangu, na-pahàla-nya na kabilaku-na; na-pangàndi-nya na kabàla-na la hu - hupu tana.

⁴Tunaka nu, nakanduu na talia liina ba dàngu lingu hamemu-na na-kanduruku dàngu na kangguruku; dàngu ba nda - ndàrana na talia liina, re - rerina ba natungu na kabàla.

⁵Rukuna na pareta-na i Ala, hi datumbu da pa-hangàtarungu, da pa-hangàtarungu da panda jàngapu-nda.

⁶Na ura kamba napuru la pinu tana la hupu liina; na ura kawalu napuru ba na-palewa-ya.

⁷Na-papànja-nya na paràma-na na tau, ka peku pidanya ba talànga ràmana Nyuna.

⁸Da banda matàmba-mbu datama la lambongu dàngu la liangu, hi daini ningu la hibuda.

⁹Weli lurungu natungu na làpuru dàngu weli diangu na maringu ma-pajàritu.

¹⁰Na kayeku-na i Ala na-pakapida-ya na pinuna na wai ma-lerangu, na-pambeli-ya wai kapida ma-katàraku.

¹¹Na kàmbangu nawotu-nya wai, dàngu na-handaraku na karumangu ba na-pahambila wànya kabàla.

¹²Na karumangu nahiri la pa-nggubulu awangu, la hupu liina i Ala hi da-njanjaru la nggi - nggini.

¹³I Ala na-wuangu urangu la pahini-ya na tana, jàka ndia-kai la pahuku-nya na tau; talànga wangumbu-na la pa-pajiliku-nja nyuda, ba dira bokulu-ya na pa-namungu-na na ma-padaingu lundu nu - nu.

¹⁴Kandii kàdi hakudu, oi Ayupu, dàngu patingingu-wa; hamata-hawa da pa-hangàtarungu lai Ala.

¹⁵Upinyaka nu nggiki hama wuangu-na lii pa-irungu i Ala, hi na-tapanjiru na kabilaku welingu la karumangu dàngu la kàmbangu?

¹⁶Upinyaka nu jàka nggiki hama hirina na karumangu na ruku hupu pinguna i Ala na pa-hangàtarungu?

¹⁷Ndia-a, nyumu dumu kayeku bàti-amunya bau pa-mbanahungu jàka nakukutu-nya ngilu weli lurungu na pinu tana.

¹⁸Ungalangu nu pa-wàlahu-ya na awangu hama tuna i Ala hi na-pakatàraku-ya hama tuna bàhi palala jàka ndia kaha?

¹⁹Papeka-nggamawa nyuma nggàraya bàdi na papanii-ma lai Ala; nda ningua ràka pa-kaloka-ma, na kanandingu-ma nakòbu.

²⁰Nda kubihu-a pakarai la papanii dànya i Ala raï hi na-ngalangu lia lata pa-hanggàmaru wàngga nyungga.

²¹Nàhu na harii awangu dira handaraku-ya hi lupa nda datara da mata; na ngilu na-payarahu-ya na awangu wàngu hapuputu-na.

²²Na ma-pahandaraku àmahu rarangu nahunga hu dia, dàngu na mangunju-na i Ala na-pamaratangu-ha da etinda.

²³Dira bokulu-ya na kawaha-na na Alanda; nda tamàka-a pa-hangiri-ya, Nyuna natànji dàngu na-padeningu mànu; ndedima na-kapidihu tau.

²⁴Jia ba tuna nu ràka-mana ka natembi ndàbaya tau, dàngu na tau na mapeka ba tau paeti-ya, nda na-ihili-anya Nyuna,” wàna.