Read Kambera NA MBUKUNA I AYUPU 38 Bible Online

NA MBUKUNA I AYUPU 38 - Kambera bible

NA MBUKUNA I AYUPU 38

¹La malamiri-na welingu la làpuru na-kareuku dànya i Ayupu paraïna i MIRI, tuna nu,

²“Nggamukau nyumu hiu toru mbeni pandara nduanya na manggàna-nggu wàngu kareuku ndubamu dàngu ka-pòpuku-mu nu?

³Nàhu, hanobaku-kawa jàka minikau, dàngu hema-hawa yiada da pa-paàra-nggunggau.

⁴Mbàda ninggauka nu ba ku-padika-nya na pinu tana? Jàka na-lerangu-du na papimu, kau paniiwa!

⁵Nggamu ma-kawuku-ya na lerangu-na na pinu tana? Nggamu mawala-nya liku hukutu? Upingu nu pahema-ya?

⁶Nggikina hi da-kapànduku da kambaniru[53] jurana na pinu tana? Nggamu ma-bànjalu pamàndu-nya na watu undungu-na na pinu tana,

⁷la rehi ludu parànjangu-da da kandunu marai romu dàngu ba da-kayaka mbaha eti da ngara maluri-ka la awangu.[54]

⁸Nggamu ma-bitangu pindu pahapa-ya na tehiku lerangu[55] ba na-kabubaku na wai welingu la unu tana?

⁹Nyunggama ma-palumburu wànya karumangu na tehiku dàngu ma-kamburu wànya kapàtangu.

¹⁰Nyungga ma-kawuku-nya dirana na tehiku lerangu dàngu mahapa wànya pindu kahorungu.

¹¹‘Yiana-yaka na padira-na. Àmbu jia pangga-munya! Lai yiahu-haka da ngalingu mbangatu-mu da-pànjangu ningu,’ wànggunya.

¹²Oi Ayupu, mbàda erangu-muka pa-payepi-nya na mbaru hada rudungu?

¹³Mbàda erangu-muka pa-paràha-nya na rara kiri awangu pa-hanggàlu-ya na payàpa-ya na pinu tana dàngu la pa-kàmbahu-nya na tau akatu welingu la ngia pa-kawiningu-na?

¹⁴Na harii lodu na-paita lohanya na palindi dàngu na lolangu hama tuna hàpu la tana wurungu dàngu hamana na làpitu-na na hawàla kalembi malai.

¹⁵Na harii lodu lalu yarahu-na la tau nda pamiri, hi na-dimbaku-ha la pawunda pa-janggilu.

¹⁶Mbàda puru-muka la ngia paweli tehiku, paràpangu la latana? Mbàda wenangu-muka la lata tehiku bokulu?

¹⁷Mbàda paita-nanggau-nyaka tau na pindu bokulu la hanamba pangia mameti ma-kapàta wuru yila?

¹⁸Ungalangu pakaka-ya na lerangu-na na pinu tana? Uhemaya jàkau pidunya.

¹⁹Upinya nu nggi paweli-na na hambila, dàngu jàka nggàraya na pingi pola kapàtangu?

²⁰Ungalangu nu patunya padira-na na kapàtangu dàngu na hambila? Jàka ndia la pa-palewa-ya pabeli ba datàka-ka?

²¹Ungalangu lia duna, maa ba mbàda kaweda-dumuka, dàngu ba padika-nya na pinu tana, ba mbàda ninggau-ka!

²²Mbàda tadalu-muhaka da uma eringgu Nyungga da pangia ura kamba dàngu ura watu mboka,

²³da pa-pahàmu-nggu ndumana la rehi harui, ndumana la rehi pabera dàngu la lo - lodu pakabungu?

²⁴Upinya nu na ngia paweli-na na mata lodu? jàka ndia nggi paweli-na na ngilu pahunga lodu?

²⁵Nggamu maàki-nya londana na ura kawalu dàngu na matunya àndana na kanduruku dàngu na kabilaku?

²⁶Nggamu ma-papurungu urangu la maràda telangu, dàngu la tana panda ngia tau?

²⁷Nggamu ma-mangahu-nya na pinu tana màdu dàngu ma-katukuru hi da-kalunga hàla da rumba?

²⁸Màla nu na urangu ningu ama wikina? Nggamuya na amana na wai hamburungu?

²⁹Màla nu na wai kapida hi ningu ihu inana? Nggamu ma-paana-nya na hamburungu kapida?

³⁰Nggamu ma-panjilu-nya na wai panjadi-ya watu, dàngu na ma-pahalata-ya na pinu tehiku?

³¹Peku yubulu-muha nu da papuingu-da da kandunu kawuru? jàka ndia pa-wanggahu-ya na tangga la kandunu Mbalatiku?

³²Upeku nu palonda-ha da kandunu la rehida, dàngu da kandunu Mbinduku bokulu dàngu makudu, hiu tunja àndada?

³³Upinja nu da kala - laratu la kuru awangu? dàngu hiu ngalangu nu pa-panggàna-nya la pinu tana?

³⁴Upeku nu pawara-nya paretana karumangu, hiu paràha-nya pa-hanubuku-nggau urangu?

³⁵Dàngu jàkau paràha-nja da kabàla pa-pahimbu-hàmbarungu, màla nu damaiha ihu, ‘Yiangga, umbu!’ hi wàdanggau?

³⁶Welina lai nggamu ihu hi napinya paraï da rendi matàmba[56] jàka pirangu na-rindingu na wai Luku Nilu? Nggamu mapanii-nja da manu wulu ba nàmunya na urangu?

³⁷Nggamu matoma manggàna-na la padiha-ya na karumangu hi na-pambeli-nya hi napuru na urangu,

³⁸na urangu na ma-pakaputalu-ya na tana hi nanjadi kabànda tana hi nakari - ritaku na tana?

³⁹Ungalangu pakeha-nja payàpa-da da hinga dàngu hi pambihu-ha da anada,

⁴⁰jàka da-pamaüngu la liangu jàka ndia da-kapàndi la hibuda?

⁴¹Nggamu mandula-ha da nggangga ma-rimbangu hi da-tanyalangu lai ni lai nàhu pahimbu pangangu? Nggamumbui mandula-ha jàka da-kaladaku lai Nyungga da anada la pakarai pangada?