Read Kambera NA MBUKUNA I AYUPU 41 Bible Online

NA MBUKUNA I AYUPU 41 - Kambera bible

NA MBUKUNA I AYUPU 41

¹Umàka nu payàpa-ya i Wuya Lewiatangu,[59] bau yàpa wànya hapungu mangela iyangu-ma-a? Umàka nu pahondu-ya na làmana bau hondu wànya liku hondu-ma-a?

²Umàka nu patunya liku na uruna jàka ndiakai ketu bàhi la ngingina?

³Napeku nu nyuna la pa-kamahi-nggau ka pahàla-ya? Jàka ndia la pabata dànggau, la pakarai mila eti?

⁴Napeku nu nyuna la pa-pahama dànggau, hi na-panjanjingu la palumu mànunggau?

⁵Napeku nu nyumu pahondu-ya hama tuna ma-hawurungu pa-kulipu, na ma-panggaüru-ha da etida da ata kawini?

⁶Napeku nu nyuna la padangga-nya paraï mini njeringu hi dapabe - berinya la njonga tau danggangu?

⁷Umàka nu pahàka wànya nimbu ma-katailungu dàkana na manula-na jàka ndia bau koja wànya nimbu na ma-palumbu làpahu-nya na katiku-na?

⁸Kamangu kau handàkangu-a pa-jonggaru-ya, jiangu-ma ndau hili beli-anyapa; na pa-udulungu nu nda jia romba-amunya lundu nu - nu.

⁹Nimbihu-na na tau na maita-ya i Lewiatangu, na-haluputu hi nameti widi.

¹⁰Nyuna nabohu jàka benginya la katuda-na; nda haàtu-a tau matoru mbeni pa-ndolaku la hanggana.

¹¹Nggamu ma-ngalangu patuya nyuna hi nda najàra? La pinu tana yia nda ningua mamàka pawunda-ya nuna.

¹²Màla ka ku-kaloka-nya rukuna na ihina i Lewiatangu, rukuna na kapàru-na dàngu na hadana na ma-manandangu.

¹³Nda haàtu-a tau ma-ngalangu pa-bàriku-ya na kalembi pinuna jàka ndia malumbu làpahu-nya na kalembi pabera[60] papaki-na.

¹⁴Nggamu mamàka pawanga-ya na ngaruna na ma-kapingatu, mambinu-nya ngàndu pa-mangàdatungu?

¹⁵Hama tuna temingu pa-pandàpilungu, nuna-yaka na wungguna[61] na ma-karitaku pa-nditakungu, na pa-kalatu watungu.

¹⁶Da-panapungu, hondu jàritu-ha, hi nda pekuna na ngilu pa-pahikungu wikina.

¹⁷Tuna numaka na jàritu-da da temingu ba da-pandetungu hi nda peku paiha-nja.

¹⁸Jàka naàhi i Lewiatangu, jilaku wàna na hambila; da-kajilaku da matana hama tuna mata lodu hungaya.

¹⁹Na ma-palàma epingu na-tapanjiru welingu la ngaruna; na wàla epi na-tanyalangu la nggi - nggini.

²⁰Na-kangutingu na kutu epi welingu la uruna, hama kutungu-na na ai pa-mutungu la kiri wurungu.

²¹Na kayeku-na na-paroka-ya na wàla epi; na roka epi naluhu welingu la ngaruna.

²²Na kahuki-na kanjupu kapingatu-ya, hi na mangàdatu hàla mbuu ndàbana la hanggana.

²³Nda ningu pangia ma-malijangu la manula-na; nda napeku-mbu la pawàka ba na pa-kalatu wajangu-du.

²⁴Na etina na-undungu hama watu, nda napingu-a pandua ndandi na-màndungu dàngu na-katàraku hama tuna watu nggihu.

²⁵Jàka lumbatu wànaka, yilangu-ma-ananya na tara mini kapàru,[62] nda nggi - nggiki-anapa paraï pa-mangàdatu.

²⁶Nda ningua hapanda ma-ngalangu pa-manua-ya; nimbu madita, pana jàka ndia nimbu kababa nda da-ngalangu-a pa-hambàti-ya.

²⁷Da bàhi na-pangera-nja la rumba dàngu da wudu damàja hama ai patumbu karipitu.

²⁸Nda ningua pana ma-ngalangu panyara-ya nyuna; da watu patuku wànya beri hama rembi-ma-aha.

²⁹Na pàha na-pangera-nya la rumba meti; nyuna nariki jàka na-hànjalu-nya nimbu na tau.

³⁰Da nepi la kambuna beri hama mbera boti madàka hupuna. Hama tuna pa-pàmbalu wàngu[63] ba nakànja-ya na kapihaku hi na-weharu-ya.

³¹Na tehiku na-kunggalu-nya hi hama wai mawura-ya; natuya kawalu palala wàngu lonahu mawura kanggàhaku.

³²Na bànjalu ruku tàbalu wihi ma-kajilaku, na-panjilu-nya na tehiku hi nanjadi-ya wura bara.

³³La pinu tana nda ningua menjana; ngara dika manda pingu pa-mangàdatu, jiaya nyuna-maka!

³⁴Banda ma-mangarangu pa-langatàkangu-mbu na-màrahu-ma-a ba naita-ya; la hongada da banda matàmba-ka mbuu ndàbada, nyunaka na maràmba,” wàna.