Read Kambera NA MBUKUNA I AYUPU 42 Bible Online

NA MBUKUNA I AYUPU 42 - Kambera bible

NA MBUKUNA I AYUPU 42

¹Na hemana i Ayupu lai MIRI, “Kupi-manya, dou MIRI, ba Hupu Mambiha-kau Nyumu; umàkama pa-palaku-ya jiapa ka nggàra biaya.

³Upaàra-ngga nggikina hi kutoru mbeni pandara nduanya na manggàna-mu Nyumu làti duku nyungga wiki ba nda nggàra-a papinggu. Kupanii wànja rukuda da panda jàngapu-nggu rukuda da ma-kanjupu pa-hangàtarungu.

⁴Uparàha-ngga pa-patingingu ba talànga kareuku-mu Nyumu, dàngu pahema jàkau paàrangu.

⁵Àmangu, na papinggu rukumu Nyumu parongu-nggu la tau, tàka nàhu kutanda-kau Nyumu ba paita mata.

⁶Jia ba tuna nu ku-kamiringu makia ba ku-patanda hàlanja da kareuku-ngguka hi kutuyai halaera ba ku-uhuku daa la kumburu tana dàngu la aü,” wàna.

⁷Ba nahàla-ka pa-kareuku dànya i Ayupu, ka kareuku-nanyaka i MIRI hanggangu lai Elipàhu, “Kuhàngga-nggau nyumu dàngu da madua da angumu, kiringu ba ndai tikiya na ma-padeningu rukunggu Nyungga. Tàka na atanggu i Ayupu nda tuna nua.

⁸Màla, pitiwa nàhu pihu ngiu hapi mini dàngu pihu ngiu mbimbi bumbu, kai lua lai Ayupu. Tunaka nu kai wotu hàlaha hunggu maraku ka maraku patunu-ha nduma wikimi. I Ayupu na-hamaya-nggai ndumami dàngu na hamayangu-na ku-kataku-ya. Nyimi nda ku-pamakia-akai, jiapa-kai bai pa-ràkangu pa-ngalangu hukungu. Ba ndai tiki-duya nyimi na ma-padeningu rukunggu Nyungga, tàka i Ayupu duna ba natiki-ya,” wàna.

⁹I Elipàhu, i Mbilundàtu dàngu i Hopàru da-palaku-ya nggàraya na pa-palewa-nanja i MIRI, hi na-kataku-ya i MIRI na hamayangu-na i Ayupu.

¹⁰Tunaka nu, ba nahàla-ka pa-hamaya-nja ndumada da anguna pa-katailu-da, i MIRI na-pawulu beliya i Ayupu hi nawua-nya pandua hama dangu welingu da pamangu-naka àmangu.

¹¹Mbuu hàlada da ayana mini dàngu da ana winina i Ayupu, hamanai mbuu hàla-daka da angu pambuha memana, damai pa-tadalu-ya hi dambabu dànya nyuna la umana. Dapanii-nya ba da-handuka karia-nya nyuna la mbuu hàla-daka da harui pa-patàka na i MIRI lai nyuna, hi da-panggaüru-ya na etina. Nimbihu-da la hongada nyuda dawua-nya ndui dàngu hapungu tawuru àmahu rara nyuna i Ayupu.

¹²I MIRI na-pamaringu-ya i Ayupu ba nawua parihi-nya la hupu ndau lurina, rihi ba ndedipa na-ngalangu hanggàmaru. I Ayupu na-mangungu kamàmbi dàngu mbimbi 14.000 ngiu, 6.000 ngiu ota, 2.000 ngiu hapi, dàngu 1.000 ngiu kalandai.

¹³Nyuna na-ngalangu tau mapihu anana mini dàngu tau matailu anana kawini.

¹⁴Na anana kawini na ma-mangilu na-patamu-nya Yemima, na padua wàna Kehia, dàngu na ma-malamiri Kerinihapuku.[64]

¹⁵La nggubulu paraingu-ka nda ningua bidi kawini mahama-nja pa-manandangu da matailu da anana kawini i Ayupu. Nyuda da-ngalangu ndumada la pawulu amada, pahama dàngu da ana minida.

¹⁶Hàlaka nu i Ayupu nahili luripa 140 ndaungu mandaina, hi peku ita-nanjapa da umbuku-na hamanai da ana-daka.

¹⁷Ka meti-nanyaka i Ayupu la lurina na mamalai dira matiki.