Read Kambera NA MBUKUNA I AYUPU 5 Bible Online

NA MBUKUNA I AYUPU 5 - Kambera bible

NA MBUKUNA I AYUPU 5

¹Wara na ha Ayupu, hi ningu nu mahema-kau? Nggaa papalewa-ya nu na ngia pakarai-mu pa-ndulangu?

²Mbulungu tau nduba-a mameti ruku hidu etina.

³Mbàda itangu-ngguka tau nduba; ba itaya dira kapingatu-ya na lurina. Tàka hi jia hara bia-nggunya na ngia pa-ngiangu-na.

⁴Nda ana ngalangu-ada ngia pa-handera-da da anana; nda ningua ma-mbuhangu pa-kahiri-ha la hangga ma-patandangu.

⁵Da pamuti-da la wokada, dangaa pambuta-ha paraï tau manda ningu ihi kambungu. Jiapa da uhu nggàndumu la padua jemi,[9] danggaa pambuta-ha paraï tau mamanjuu. Da manguda dàngu da pawulu-da nakiri mataha tau ma-mangàbangu banda.

⁶Nda welina la pinu tana-a na tumbuna na ma-akatu; nda welina la kumburu tana-a hi na-kawudaku na harui.

⁷Ndia-a! Tauma-a duna ma-patàka-nya na harui la tàda ihi wikina, beri hama epi ma-kapuruku-ya ma-pawelingu la epi wikina.[10]

⁸Jàka nyungga làti mangia-nya na ngeramu, kuwara-ma duku lai Ala. Lai Nyuna ku-pakàla ningu, hi kuwotu-ya na palakara-nggu.

⁹Da pawunda-na i Ala nda ningu hamada; nda tatoma-a la pa-manyàmu-nja. Da pa-hangàtarungu da pawunda-na, nda pataü-aha dàngu nda danjàpu-a.

¹⁰Na-papuru-nya na urangu la pinu tana, hi dambaha da woka dàngu da maràda ba paliri-nja.

¹¹Nyunaya na Ala na ma-pajangga tau mangia wawa, dàngu mawua-nya pa-ohangu na tau handuka.

¹²Na-pabeta-nya na pawuku tau mamàhi, na-pahandànga dàngu hi nayàpa-ya na tau màhi, hi nda danjadi-a da paràma-daka mbuu ndàbada, hi na-panyonga-ha kanandingu wikida.

¹⁴La lodu natàka-nja kapàtangu, dàmangu - dàmangu-da hama tuna la rudungu.

¹⁵Tàka i Ala na ma-pamara: tau mila[11] welingu la meti, tau mangia wawa welingu la ma-pa-kapidihu.

¹⁶Nàhu ningu belika monungu-na na tau manda ningungu. Dàngu na tau akatu jiapa-ma ba pàdi wàna, nadu ba mbàda wunggu-nanyaka na ngaruna paraïna i Ala.

¹⁷Utungu-munya jàka nahàngga-nggau i Ala! Àmbu nahala-du na etimu jàka na-payudi-kau.

¹⁸Nadu i Ala ma-pahidu-kau, Nyunambui matunggau muru. Dàngu limana mapalu-kau, Nyunambui ma-pahàmu belikau.

¹⁹Jàka naora-nggau hanggàmaru, na-pamara mànu-makau.

²⁰Jàka na-hàkilu-kau ura tana, nda jia meti rimbangu-amu. Jàka nambana dàngu na-pa-maringgingu na pabera, umara welingu la meti.

²¹Namangga-nggau welingu la pawau-nanggau dàngu welingu la himbu-nanggau wihu; ndau mangàdatu-a pahangga-nya na hanggàmaru.

²²Jàka natungu na mbana eti dàngu na rimbangu, napa udàdangu dàngu riki bia-munya. Ndau mangàdatu dàngu ndau mangginggitu-mbu, bau hangganja da banda mbeni da mabohu.

²³Na woka paluku-mu nda jia pa-watungu-ana; da banda mbeni nda da-kaluluku-anggau.

²⁴Umambiru bau ndàdiku la uma teramu; dàngu jàkau pareha-ha da mbimbimu, damara hàlama, nda heua ma-kurangu.

²⁵Nda pataü-aha padiha-ha da ana umbuku-mu, hama rumba la maràda-ha danguda.

²⁶Hama tuna uhu nggàndumu maihi, ba mutiha la rehina, tuumbumu bau luri lundu kaweda-mu.

²⁷Ha Ayupu, mbuu ndàbada nuda mbàda pareha-manjaka. Nu na kareuku ma-padeningu-maya, ba tuna kataku-biaya,” wàna.