Read Kambera NA MBUKUNA I AYUPU 6 Bible Online

NA MBUKUNA I AYUPU 6 - Kambera bible

NA MBUKUNA I AYUPU 6

¹Hi nahema i Ayupu, “Jàka era hukutu-ya na mbotuna na handuka nda najaru-nggu,

³narihi mbotu-mapa duna welingu la wara tehiku bokulu. Jia ba tuna, àmbu hangàtaru-du jàka nda kutika pa-pananjarungu dàngu lalu rengganggu ba ku-kareuku.

⁴Na panana i Hupu Mambiha natanju paràpa-nya na ihinggu; na upahu-na nahini ndàbaya na ihinggu. Na wirungu-na i Ala na-pa-haringgingu hamangu, hi na-kaluluku-ngga hama tuna na juru muhu.

⁵Nduma kalandai toma-mana-nyaka jàka wuanya rumba muru, hamanai na hapi jàka wuanya pangaana.

⁶Tàka nggamu ma-mbuhangu pangangu makàba? Nggamu mangu wàngu ba pàdanya hàmuna na tilu bara?

⁷Nda ku-mbuhangu-ma pa-jonggaru-ya; nalabu na etinggu[12] jàka kungaanya.

⁸Ka nggikina i Ala hi nda nabihu parongu-ya na hamayangu-nggu? Ka nggikina hi nda na-katana-maya na waranggu?

⁹Màta àruki ka na-orangu pa-palàjaru-ka i Ala! Màta àruki ka na-kukutungu pa-pameti-ka!

¹⁰Nyungga duku ba panggaüru eti-wa-bia-nggunya na matuna nu; ka renja wànggu bia la mayila-nggu. Mbuu hàlada da hupu liina i Ala Hupu Matua, mbàda nunju-ngguhaka dàngu kueti-wa mànu-manja.

¹¹Nggàra-mayaka na atunggu hi ni biangga-pa? Nggàra-mayapa na pamonu-nggu hi ku-rinjungu biapa paluri mandai?

¹²Hama watu-mayaka ihu màndungu-na yiana na ihinggu? Kaliangu-ya ihu na tolunggu?

¹³Njàpu-nanyaka na àtalu-nggu pahimbu ma-pandulangu; nda ningu-mapa ihu mandula-ka.

¹⁴La mayila[13] tungu yia, ku-rinjungu kandua hàmu eti. Ku-padaingu-pa pa-tuturu jàka ndia hi mbàda nda ihili bia-nggunya i Hupu Mambiha.

¹⁵Tàka nyimi dimi, ha angunggu, nda ràka pawai dàngu nda ràka pa-monungu-akai. Beri luku mihikai, la rehi nda lu puruna na urangu.

¹⁶Nyimi dimi hamana na luku makandii dàngu ma-kamàndalu, paraï pambinu-nya ura kamba dàngu wai kapida.

¹⁷Natàka-kika na wula wandu, munangu-ma-ananya na ura kamba dàngu na wai kapida nda nabiia kaweina. Na lukuna na-wailangu, nda na-pawaingu-apa, namihi kàrangu.

¹⁸Da tau dangga lindingu da-njàrangu paraï pahimbu wai; dalaku lindingu hi dameti la maràda telangu.

¹⁹Da tau dangga lindingu welingu la Heimba dàngu la Tema dahimbu-ya na wai dàngu da-monungu pahunggu-ya.

²⁰Tàka na monungu-da namau la hingi luku nda pa-waingu.

²¹Hama tuna[14] na luku nunaka nyimi, ha angunggu; bai kandulingu dàngu bai mangàdatu paita-ya na mayila-nggu.

²²Ka nggikina hi timi nu? Ka ningu nu pa-karainggu welingu lai nyimi? Jàka ndia hi ku-paràha-nggai nu pawua parunungu la tau ndumanggu nyungga?

²³Màla kukarai-kai nu pa-pahàla-ka la muhu manda pa-namungu?

²⁴Ba tuna, papeka-nggawa, paita-nggawa njalanggu! Jiangu-ma kukandii hi kurongu-ya na kareuku-mi.

²⁵Na kareuku tànji na-pamaringu eti, tàka na paniimi ma-kakòlulu juaya, nda ningua ihina!

²⁶Mbuu hàlana na kareuku-nggu beri ngilu biaya bai kakaya; kahewa biana bai hemaka mambàda mbota monungu-na.

²⁷Jiapa na ana mamila itunya undi na urana, da angu lànggimi bai kaleka-nja ka peku wuluma ba wàmi.

²⁸Ikamangu, kai hamata-ka; ka jia kambàliku-nggunggaika?

²⁹Àmbi làndahungu-du la manda jiaya, pàda-nyawa! Àmbi paaka-dungga, ba nda kunjala langatàka-ma.

³⁰Màla bai kakaya ku-kambàliku ihu nu, nda kupingu-a paheka-nya na mahàmu dàngu na manjala?