Read Kambera NA MBUKUNA I AYUPU 7 Bible Online

NA MBUKUNA I AYUPU 7 - Kambera bible

NA MBUKUNA I AYUPU 7

¹Na luri tau hama tuna pahàni-ya la pa-patarangu; nambotu hama tuna lurina na haàtu tau ata;

²hama tuna ata ma-rinjungu mamaü; hama tuna tau ngangu ngganji na ma-patiangu ngganjina.

³Nimbihu wulangu nda ningua ngia pa-hanggangu-na na luringgu; nimbihu rudungu dira hawina-ya na etinggu.

⁴Katuda-wa jàka wànggu hada namalai-i na rudungu; kurinju-nya na waihangu, ba nda peku katuda hàmunggu.

⁵Na tolunggu nambinu-nya kanduli dàngu wai ria màdu; na manula-nggu na-manua hi nawitu.

⁶Na luringgu na manda nggàra pamonu-na narengga la panjàpu, narihi rengga-pa welingu la hawuluru ma-tinungu.

⁷Pangàda-nya, ou Ala, na luringgu hama hadànjalu kayeku-aya, na-munangu na pa-ohangu-nggu, nda nabiia kawei-na.

⁸Nàhu muita-kapa nyungga — tàka nda namandai-a. Napa jàkau himbuka, mbàda nda ni-anggapa.

⁹Hama tuna na karumangu na ma-panggumungu hi na-munangu, na taumbu nameti, hi nda nahili beli-ayapa. Mbuu hàlana na tau matanda-ya, da maromba-nya dàngu nda dahili namu-ayapa.

¹¹Jia ba tuna nu nda peku kandii-anggupa! Nda peku pakandii-anggu-nyapa na mapuri na mapaita. Lupangu-ma ba ku-bunggahu ngarunggu, ka kuràba-ya na ihi etinggu.

¹²Ka nggikina nyungga yia hi nainguna Nyumu bau rimangga dàngu hiu daika? Ka nggàraka nu nyungga, ka nggarihu[15] bohuya wàmungga?

¹³Ku-mangguli hi ku-kamangu pa-hangahu; keha ka na-halembiru na eti handuka-nggu wànggu.

¹⁴Tàka hiu pa-mangàdatu wàngga manggadipangu; bau patàka-ngga manggadipangu nda hàmu dàngu harii mata.

¹⁵Hi kurihi mbuhangu ka kàhilu-ka ka kumeti welingu ba luri mayila yia la tolunggu.

¹⁶Kunjili dàngu hodanggu-ka paluri; ku-rinjungu pameti! Màta biangga, maa ba nda ningu linguna na luringgu.

¹⁷Nggàra-mayaka na tau hi kanjupu papingi-munya Nyumu? Ka nggikina hiu eti-waa mànunya na pawunda-na?

¹⁸Uhamata-ya nyuna hau mbaru - hau mbaru, dàngu bau kamanya hau lodu - hau lodu.

¹⁹Pirangu-mapa upambelingu welingu lai nyungga, hi peku kanggulakungu-kinggu wai ilunggu?

²⁰Ha madaika, urunggi-maka nu Nyumu ruku njalanggu? Ka nggikina hiu tuuka ngia pa-orangu-na na panamu? Lalu pambotu-manggu-nggauka nu?

²¹Ndau ngalangu-mapa dumu pajàma-nja da ndokunggu? Nda napeku-mapa nu la pa-podahu-ha da njalanggu? Taïki ku-mangguli daa la reti, jàka uhimbuka, ndau hunggu-akapa,” wàna.