Read Kambera NA MBUKUNA I AYUPU 8 Bible Online

NA MBUKUNA I AYUPU 8 - Kambera bible

NA MBUKUNA I AYUPU 8

¹Hi napanii i Mbilundàtu, “Pira mandai-mamupa la pa-kareuku tumu nu? Na kare - reuku-muka beri hama ngilu makanduu-ya.

³I Ala duna nda jia pa-kaleka-ananya na matànji; nda jia màtangu-ana pa-pandolaku-ya na ma-tubangu.

⁴Raï hi da ana biamu da manjala lai Nyuna, ràka-mana hi nahuku-nja.

⁵Tàka jàkau pamaü lai Nyuna, la pakarai mila etina dàngu la pa-kamahi-nya na jàma-nanggau,

⁶jàka na-kunduhu na etimu, hi nda ningu nyurana, lupama narengga ndulakau i Ala; nawua-nggau himbalu-na, tàka na kuru umamu hi jia beliya.

⁷Nanjàpu-da da pawulu-mu ràka-ana jàka pamenja-nya na pangala-mu napa.

⁸Pangàda-njawa da tau paeti weli ndaingu, dàngu eti wànya na padeni-da da kawunga boku.

⁹Na lurinda na-dànggitu, nda ana nggàra-a papinda; da lo - lodu lurinda beri hama tuna ninu-aha.

¹⁰Patingi-nja da kareuku-da da tau manggàna àmangu, dawua-nggaunya yiana na lii pa-pekangu,

¹¹‘La mapawai-aha datumbu ningu da tibu hala; la ma-paweta-aha ngala ninja da iri.

¹²Jàka namihi-ka na waina, katehu-nanyaka nuna na tibu hala, narengga mararangu-mapa welingu la rumba hawiangu. Làti duna kanguraku biana-nyapa dàngu ndedi natoma-a na rehina la papunggu-ya jàka nggàra ihi wàngu.

¹³Tuna nu na tau nda pamiri. Nambula-nya i Ala, hi nambota na monungu-na.

¹⁴Na ha-kalotu lulu kamba mirihu jiaya na ngia pamonu-na; na lu lu ngginggi jiaya na pawaina.

¹⁵Na-màndungu-ka nu na lulu ngginggi jàka tuya ngia pa-haria? Na-torungu nu na lulu kamba jàka tuya ngia payàpa?’ wàna.

¹⁶Hama tuna na witu, tuna nu na hayandalu-na na tau nda pamiri; jàka na-taraku-nyaka lodu, natumbu kamboka hi napinu-ya na woka ngia pambawa.

¹⁷Da amuna da-wunjilungu[16] la watu la tana; na pa-hanggetungu-na kanjupu màndungu-ya, nda namuda pa-tayonggahu.

¹⁸Tàka, kau kamangu, buta-yawa nàhu nuna na witu, ka pi-munyaka ba beri hama nda kàli ni bianya lai nu.

¹⁹Nu, na pahàmu eti wàna na tau akatu didi-maaya nuna; namai na tau hawiangu hi nahilu-ya nyuna.

²⁰Tàka i Ala duna ndedima na-dunjakungu tau tuturu, dàngu ndedimbu nandula tau katadaku.

²¹Napa na-pariki-ya na ngarumu, na-paoi mbaha etingu na tàda ngarumu.

²²Da ma-karaü-nggau eti da-makia dàngu da-pawawa, na uma tau akatu pa-nyànggaru-ya hi na-talàpu,” wàna.