Read Kambera NA MBUKUNA I AYUPU 9 Bible Online

NA MBUKUNA I AYUPU 9 - Kambera bible

NA MBUKUNA I AYUPU 9

¹Tàka nahema i Ayupu, “Langatàka, kupi-manya ba nda nanjala-a na kareuku-mu. Tàka na tau jia palumu dànanya-kaka dàngu jia talu-nanya-kaka i Ala?

³Welingu la 1.000 lii paàrangu pa-patàka-na i Ala, nda ana haumbu papeku hemana na tau.[17]

⁴I Ala duna kanjupu manggàna-ya dàngu dira mbihaya; nggamu ma-torungu pa-patayaku dànya Nyuna?

⁵I Ala na-palelingu tandula la panda pii tau, hi na-linggaru pambeli-nya wàngu hàngga mbana etina.

⁶I Ala na-patàka-nya na upungu hi na-tandidu na tana, dàngu hi da-yoyangu da kambaniru jurana na tana,

⁷i Ala peku hiri-nanya pahunga na lodu la mbaru, dàngu la papàtu-ha da kandunu pa-hambila la rudungu.

⁸Na-wàlahu-ya na awangu nda ruku ndula-amunya, nakali - lijaku-nya na wunggu nggarihu.[18]

⁹Natuuha da kalibuku kandunu mbara luru la awangu, hamangui na kandunu Mbinduku, na kandunu Mbalàtiku dàngu na kandunu Karatika.

¹⁰Nda ta-ngalangu-a pa-jàngapu-ha mbuu ndàba da pawunda-na, nda tataü-a padiha-ha da pa-hangàtarungu lai Nyuna.

¹¹Nali la hangganggu, tàka nda kuita-aya; na-pàlaku la karaha-nggu, tàka nda nawuwa-a lai nyungga.

¹²Jàka na-rambangu, nggamu matoru mbeni pahiri-nya? Jàka ndia matoru mbeni pa-paàra-nya, ‘Ha, ka nggàra ulamu?’ mawàna-nya.

¹³I Ala nda nanàdi-aya na hànggana dàngu na mbana etina; da mandula-ya i Rahàpu[19] da-karuduku-mbunya Nyuna.

¹⁴Ba tuna, ka nggiki hama pandia-nggunya? Nggàra kareuku-ka bàdi pahema wànggunya?

¹⁵Jiapa-kai ka nda kunjala, nggiki-angguka, mbulungu-ma-anaka la pa-kamahi-nya na mila etina i Ala na ma-patanda-ngga ngeranggu.

¹⁶Ngera hama tuna jàka nahema-ka ba kuwara, kundara ndua, deningu-na ihu ba na-mbuhangu parongu-ya na kaladaku-nggu?

¹⁷Na-palàjaru-ka la làpuru, hi nabonja-ya na mayila-nggu la manda palatangu.

¹⁸Nda na-pahia-makingga hawutu paana kayeku-ki; dàngu na-pabundu-ngganya na mapuri-paita dira matiki.

¹⁹Ku-paudulu dànyaka bàdi ihu Nyuna? Tàka tàngaru, ba dira mbana kapàru-ya! Jàka era kàla-nggunya Nyuna, nggamu matoru mbeni papaau-nya[20] la hangga ma-patandangu?

²⁰Nyungga ku-tuturu-ma duku dàngu nda kuwunda-a manjala, tàka na ngarunggu hama tuna hauyai na patiki-na. mbuta biana na kareuku patiki ngarunggu, hama tuna panjala bia-nanya na wikinggu.

²¹Nyungga nda kunjala-a, tàka nda ku-kawelangu-a. Hoda-nggunyaka paluri. Nda hili ningu-mapa pa-papingi-nggu; na manjala dàngu na ma-mànangu ba hama biana na pangala-na: i Ala na-patàlaru-ha pa-kadua-da.

²³Jàka nameti harabàndangu na tau manda njala, riki pàku-ananya i Ala.

²⁴Na tana nawua-ya la tau akatu paraïna i Ala, hi na-papoki ndàbaha da ma-patandangu. I Ala na mambàda wundaya yiana mbutana, jàka nda Nyuna-madu, ka hili nggamui?

²⁵Na lo - lodu luri-ngguka ba laku rengga-mananya, hi na-munangu la nda pàda-nanya na mahàmu.

²⁶Hama tuna na tena na ma-kahuluru, tumbuna na luringgu ba nalaku rengga, hama renggana na kola na ma-hawuru patiri, pajàmba patewa-na.

²⁷Jàka kuriki miri dàngu kuriki mbaha eti, jàka ku-kamangu paromba-nya na mayila-nggu mbutana, ka hili tàka beli-nanyai na handuka-nggu ba nandutu-ka; maa ba kupi-manya, ba daingu-mana na panjala-nangga i Ala.

²⁹Nu, ba tuna, ka hili nggàra-yaipa na pa-karuhinggu?

³⁰Nggàra habu ma-ngalangu pa-pamuna-nja da njalanggu!

³¹I Ala na mambàda tàniku-ngga daa la ma-marihaku, hi lupa dalabu-mbungga eti da pakinggu.

³²Làti jàka tauya i Ala, kupeku-ma duku la pahema-ya; hi malaku la hangga ma-patandangu la pa-panjàpu-ya mbuu ndàba na palumungu-ma.

³³Tàka la hongama nyuma nda ningua njàha ma-ngalangu pa-patanda-nggama ngerama pa-kadua-ma.

³⁴Màta kiwa ka na-pànjangu pahuku-ngga i Ala dàngu ka na-payila-nya welingu lai nyungga na pa-mangàdatu wànggunya Nyuna!

³⁵Nda ku-mangàdatu-anya Nyuna hi ku-kareuku nàhu, maa ba kutanda-duya na eti wikinggu.