Read Kambera PAMALANGUNGU 102 Bible Online

PAMALANGUNGU 102 - Kambera bible

PAMALANGUNGU 102

¹Na hamayangu tau ma-mayila ba dàngu onjana ba na-pangodungu lai MIRI.

²Ou MIRI tingiya na hamayangu-nggu, màtawa na waranggu ka natàka lai Nyumu.

³Àmbu punjilungu welingu lai nyungga jàka ningga la handuka. Tingika jàka kuwara, lu hema àru-kawa.

⁴Na luringgu namau hama tuna na kawuu; da riinggu da-palawarangu hama tuna epi.

⁵Kuonja hama tuna mapu meti, nda ku-patikingu-a pangangu.

⁶Wàngu kaladaku-nggu ba kukanguu; datika pawuwa da riinggu paraï pa-malakangu.

⁷Hama tuna ma-hawurungu la maràda waraka, hama tuna wàngi la bundu watu tanyungguru la ma-kahàna.

⁸Nda ana mbàpihu-nggu, hama tuna ma-hawurungu ma-pamehangu la toku ndidungu.

⁹Lundu njàpuna na lodu ba na-paaka-ngga muhu; datuya na tamunggu pa-harangu wàngu paraï tau mambeni-ngga.

¹⁰Kungangu kumburu tana beri roti, na pangunu-nggu na-pakorungu wai mata,

¹¹ruku danda kawula-mungga paraï pa-mbumbaru na hànggamu.

¹²Na luringgu na-yilangu hama tuna na mamaü la rehi malingu; ku-pamalaï rumbangu.

¹³Tàka Nyumu, ou MIRI, Hanganji lundu nu - nukau, na-pangàda mànunggau ana umbuku.

¹⁴Napa uhada lumbatu tàka hiu milanya eti na Hiungu, ba jia-mayaka na rehi la pamila-nya eti.

¹⁵Nadu da atamu danamu-ya nuna na paraingu, jiapa ka mbàda pabundu watu tanyungguru-ya. Nyuda damila-nya eti na paraingu, jiapa ka mbàda kumburu tanaya.

¹⁶Napa da-mangàdatu-nya na kawaha-na i MIRI paraï da banjaru; dàngu na mangunju-na da-mahumbaru-nya paraï da mbuu ndàba da hanganji,

¹⁷jàka jia-yaka na-pahada beli-nanya na Hiungu i MIRI, ba na-palohangu wiki wàngu mangarangu-na.

¹⁸Napa natingi-ya na hamayangu banjaru-na na mamila tanjàriku, dàngu nda na-tulaku-aya na lii kamahingu-da.

¹⁹Tulihu ndàbaha da pawunda-na i MIRI nduma ana handalaru na manàmu-nya, màta na banjaru mandedi dedi ka dawotu-nya Nyuna.

²⁰I MIRI na-kanàndaru welingu la pangia-na na majangga, welingu la awangu nangadu la pinu tana

²¹la patingi-ya na padudurungu tau tanawangu dàngu pa-pahàla-ya na tau pa-hukungu meti.

²²Tàka na tamuna pa-bobaru-ya la Hiungu, Nyuna napa pawo - wotungu-ya la Yeruhali,

²³ba da-kanguhuru da banjaru dàngu da pa-hanganji la palumu-nya i MIRI.

²⁴I MIRI napata-ya na àtalu-nggu ba pabidi tauka, mbàda padànggitu-nanyaka na rehi luringgu.

²⁵Tàka hi kupanii, “Ou Ala àmbu pitiya na kayeku-nggu la padeni pa-duangu-na na rehi luringgu,” hi wànggu. MIRI, Nyumu dumu uluri lundu nu - nu,

²⁶la handàka-na Nyumu mambàda padika-nya na pinu tana; na awangu ruku lima-mbumunya.

²⁷Mbuu ndàbada nuda napa da-molungu, tàka Nyumua ma-padaingu; mbuu ndàbada nuda napa damiri, hama tuna katàri. Napa uwàrunja hama tuna kalembi ndaiha, ka molungu-danyaka mbuu ndàbada.

²⁸Tàka Nyumu dumu upadaingu ba ndau panjilungu-a, na lurimu nda jia ningua hupu njàpuna.

²⁹Napa da luri mambiru da ana umbuku-ma, hi pa-daingu nda nggàra ehida la opangu-mu.