Read Kambera PAMALANGUNGU 104 Bible Online

PAMALANGUNGU 104 - Kambera bible

PAMALANGUNGU 104

¹Wotu-nyawa i MIRI, ha hamangu-nggu! Kanjupu bokulu-kau Nyumu, ou MIRI Alanggu! Da ngaümu jiaya na nggojimu dàngu na bunjuku,

²dàngu umalumburungu harii hambila. Uwàlahu-ya na awangu hama tuna uma tera,

³la pinu wai la awangu[56] uwulu ningu Umamu. Da karumangu utuuha karetamu, la pinu ruu kàpa ngilu bau talanjiru.

⁴Na ngilu utuuya pa-palewa-mu, dàngu na kabilaku utuuya ma-paloku nggamu.

⁵Wàngu kapànduku bau pakàna-nya na pinu tana la latana, hi nda na-nggàduku lundu nu - nu.

⁶Hàlaka hiu pa-lumburu-nya tehiku lerangu, na waina na-palomu-nja da pinu palindi.

⁷Bau kayàmbaku-nya, na-lulungu na wai, na-mbangatu na lulungu-na ba na-kangguruku na talia liimu.

⁸Nali la ma-palindingu nanjungu dàngu ba na-lulungu la lolangu na wai, la ngia pa-panduma-munya.

⁹Upadainja da padira-na na panda peku lina, ka àmbu nahili lumburu-nya na pinu tana.

¹⁰Nyumu ma-pa-kabubalungu mata wai la lo - lolangu, hi da-lulungu da ana luku la njongada da tandula.

¹¹Ka paunu-nja mbuu ndàba da banda la maràda, dàngu la pa-podahu-ya na madauda da kalandai la omangu.

¹²La lihina lai nu da-pandoi hibuda da ma-hawurungu; hi da-kajiku la wuku ruu ai.

¹³Welingu la awangu upapuru-nya na urangu la ma-palindingu, na pinu tana nambinu wàngu ruku limamu.

¹⁴Upatumbu-ya na rumba nduma banda, dàngu nduma tau ba nda pira biaya da ngara matumbu-ka. Tàka hi peku tunguna woka,

¹⁵dàngu hi na-ngalangu wai angguru ma-pahàmu eti. Dàngu lonahu haitungu ma-pahawola-ya na matana, dàngu pangangu mawua-nya àtalu.

¹⁶Da pingi aina i MIRI, da pingi kajiu Limbanongu pa-pamula wikina, kanjupu ura-nanja.

¹⁷Lai nu da-pahibungu da ma-hawurungu, la kapuka-da da-pahibungu da langgokaru.

¹⁸Da palindi jangga jia-haka da pangia kamàmbi omangu; da palanduku da-kapàndi la watu pungguru.

¹⁹Nduma pa-kawuku wàngu rehi upadika-nya na wulangu, na mata lodu napingu rehi tamana.

²⁰Jàkau papuru-nya na kapàtangu, rudungu-madua-nanyaka, ka pa-ihangu-danyaka da banda omangu.

²¹Da kamboka hinga da-kangaüku ba dahimbu pahoba-da, ba dakarai pangangu pa-panduma-munja.

²²Jàka nahunga-ka na lodu yilangu danyaka hi da-manyomba la ngia pa-kapàndi-da.

²³Ka luhu-nanyaka na tau palua paràma-ha da paràma-da, hi daràma pangalangu lundu kalitu-na.

²⁴Kanjupu danguha da paràma-mu, MIRI, mbuu ndàbada nuda mbàda padika-munja wàngu mbinu manggàna-mu; na pinu tana nambinu wàngu mbuu ndàba ruku limamu.

²⁵Tàngaru-ya na tehiku lerangu ma-tawàlahu, dàngu da dika da ma-bokulu da makudu ba nda pataü-ha.

²⁶Lai nu dali ningu da kapalu, dàngu da-pajulu ningu da Lewiatangu, nu da nggarihu tehiku ruku limamu.[57]

²⁷Nyumuma pamonu-da mbuu ndàbada, ka da-ngalangu pangangu la rehina.

²⁸Nyumu matanggu wuanja, nyuda matanggu pauhi-nja, Nyumuma ma-paloku-ha, hi dangangu lundu hodada.

²⁹Jàkau handalurungu ka mangàdatu-danyaka; jàkau pitiha da kayeku-da ka tàlaru-danyaka, hi dabeli-ha la pa-kumburu tana hama tuna la kawunga-na.

³⁰Tàka jàkau wuanja kayeku,[58] pawulu-haka; nu wua-dumu-nyaka bidi luri na pinu tana.

³¹Màla àruki na mangunju-na i MIRI ka na-padaingu lundu nu - nu! Màla àruki ka na-hawola wànja mbuu ndàba da ruku limana!

³²Na-kanàndaru-ya na pinu tana hi lupa na-kandàndaku, na-jonggaru-ha da palindi hi lupa daluhu da kutungu-da.

³³Ka kuludu-nya i MIRI la ngala luringgu, wàngguka, kuludu-nya lawiti wotungu na Alanggu la ngala ba ninggapa.

³⁴Màla àruki na ludunggu ka jia hàmuya la etina, ba Nyunadu ma-pahawola-ya na etinggu.

³⁵Màtawa ka da-molungu da tau njala welingu la pinu tana, màtawa da tau akatu ka danjàpu ba da-tàlaru. Wotu-nyawa i MIRI ha hamangu-nggu! Wotu-nyawa i MIRI!