Read Kambera PAMALANGUNGU 105 Bible Online

PAMALANGUNGU 105 - Kambera bible

PAMALANGUNGU 105

¹Pamalangu-nyawa i MIRI bobaru-yawa na bokulu-na, peka-hawa da pawunda-na la ba - banjaru-ka.

²Ludu-nyawa ludu wotungu i MIRI, bobaru-ha mbuu ndàbada da paràma-na da pa-hangàtarungu.

³Jiaya Nyuna-maka na MIRI Mahupu matua; hanggela hawola-wa ba mangu-nanda nyuta, mbuu ndàba na malumu-nya màtawa ka da-hawola.

⁴Karaiwa àtalu welingu lai Nyuna, marubuku mànu-nyawa.

⁵Ha ana umbuku-na i Ambarahàmu, atana, dàngu ana umbuku-na i Yakupu tau paleha-na, ngàda-hawa mbuu ndàba da pa-hangàtarungu pawunda-na, àmbu jia maromba-minja da botangu-na.

⁷I MIRI jiaya na Alanda, da botangu-na nanggàna ndàbaya nggubulu-na na pinu tana.

⁸Nangàda mànuya na pa-njanjingu-na, pawàngu lundu nu - nuya na-panjanji-na.

⁹Na pa-njanjingu nuna natura-ya lai Ambarahàmu, hàla hi mangupa lai Ihàku;

¹⁰hi na-paundu-nya lai Yakupu, ba jia-duyaka na pa-njanjingu lundu nu - nu la Ihirailu.

¹¹Napanii, “Lai nyumu napa kuwua-nggaunya na tana Kanaàngu, kau kangeha-nya,” wànanya.

¹²La handàka-na na banjaru-na i Ala da pa-ndàdiku tau nàmungu lai nu hakudu-ana na dihada.

¹³Da-njadangu welingu la hau banjaru hanggangu la hau banjaru, da-lelingu welingu la hau tana hanggangu la hau tana.

¹⁴Tàka nda jia ningu-a pa-pahiana i MIRI la pa-kapidihu-ha nyuda; lumunja nyuda na-panamu-nja da hanganji.

¹⁵“Àmbu nggumanja da tau paleha-nggu, àmbu nggi - nggiki-minja da wunangu-nggu!” wànanja.

¹⁶I MIRI na-panggàbalu wànja rimbangu na tana nuna, hi napiti ndàbaha da pangangu pa-pahàmu-da.

¹⁷Tàka na-palewa haàtu pa-mangilu-nja, i Yuhupu, na pambàda padangga tau atangu.

¹⁸Patangga-ha da wihina, na nggoruna pa-pahàngalungu nggili bàhiya.

¹⁹La hupu njàpuna hàrangu-nanyaka na panyura-na, pa-pamànangu-ya paraïna puluna i MIRI.

²⁰Tàka na hanganji Mehiru, na ma-hanggubu-nja da banjaru, na-pahàla-ya welingu la uma kapàtangu.

²¹Pa-wuangu wai ngeraya pa-paloku la uma hanganji, dàngu pa-wuangu kawaha-ya la mbutada da banda da malanja-na;

²²Pa-wuangu-mbuya ngaba la pawua-nja wai ngerada da panggawi-na na hanganji, dàngu la pairu ngàndiha da ama bokulu.

²³Tàka i Yakupu hi nalaku la Mehiru hi na-pandàdiku tau nàmungu lai nu.

²⁴I MIRI na-paworu mbàmbaru-ya na banjaru-na, hi lupa darihi kapingatu welingu la papada.

²⁵Na-pambeli-nja da eti tau Mehiru hi da-karaü-nya eti na banjaru-na dàngu hi dawàngu eti akatu-da la atana.

²⁶Tàka hi na-paràha-nya i Muha na atana dàngu i Harungu na tau paleha-na.

²⁷La Mehiru dawunda pa-hangàtarungu, da pawunda ma-bokulu welingu lai MIRI,

²⁸dàngu hi da-karadaku la hupu liina. Tàka hi na-pakapàta wuruyila-ya na tana nuna païna i MIRI.

²⁹Na-pambeli-ya wai ria na lukuda, hi lupa damànji mbuu ndàba da iyangu-na.

³⁰Da kapaki da pahimbu hàmburungu la tanada, datama-mbu la uma hanganji.

³¹La hupu liina i Ala datàka da kapelatu dàngu da kalubu, da manjungu-nya nggubulu-na na nuna na tana.

³²Na-hanubuku-nya na ura watu mboka hiluna na wai urangu, dàngu na patàka-nya na kabilaku ba bi - bilana.

³³Na-panjoru-ha da pingi angguru dàngu da pingi kapilitu, dàngu mbuu ndàba da pingi aida na-punggilu-ha.

³⁴La hupu liina Nyuna, datàka da kabala, kanjupu danguha, nda pataü-ha.

³⁵Dangaa pambuta-ha mbuu ndàba da matumbu la woka, da ihi woka mbuu ndàbada dambuta ba dangaa-nja.

³⁶Tàka hi na-pameti-ha da mini kawunga ana la nimbihu kuru uma tau Mehiru.

³⁷Hi na-karia-nya paluhu na banjaru Ihirailu, dangàndi àmahu rara àmahu bara; mbuu ndàbada da-halimu hayàla dàngu da-àtalu.

³⁸Natàka-nja mangàdatu dàngu maringgingu hamangu da tau Mehiru, hi da-hawola ba dalaku-ka da tau Ihirailu.

³⁹I Ala na-pamaü wànja karumangu na banjaru-na, dàngu nawua-nja epi ma-hambila-nja la rudungu.

⁴⁰Da karai, hi na-patàka-nja powa, nawua-nja roti welingu la awangu hi lundu mbihuda.

⁴¹Nabika palindi watu, hi na-tapanjiru na wai ba hama lukuya lulungu-na la maràda telangu.

⁴²Nadu i MIRI nangàda-ya na njanjina na patura-na lai Ambarahàmu, atana.

⁴³Na-karia-nya na banjaru-na dàngu hawola-da, nu da tau paleha-na ba dàngu pa-oingu-da.

⁴⁴Da tana manguda da ba - banjaru na wua-njaha nyuda, da wokada natuha mangu banjaru-na,

⁴⁵ka na-karadaku-nja banjaru-na da Ukuna Nyuna dàngu ka danunju-ha da hupu liina. Wotu-nyawa i MIRI!