Read Kambera PAMALANGUNGU 106 Bible Online

PAMALANGUNGU 106 - Kambera bible

PAMALANGUNGU 106

¹Pamalangungu-nyawa i MIRI, ba nahàmu-du; na pa-namungu-na lundu nu - nuya.

²Nggamu ma-ngalangu pa-bobaru-ya na rihi taluna i MIRI, dàngu ma-patàka-nya wotungu ma-paràkangu ndumana?

³Oha-daka da tau ma-karadaku-nja da hupu liina, dàngu da mamola mànu la pawunda-da.

⁴Pangàda àru-kingga, ou MIRI, lumunya na hàmumu la banjaru-mu, ndula-mbuka nyungga jàkau pamàna-nja nyuda.

⁵Màla àruki ka peku ita-nggunya na luri mbokaru-da da tau paleha-mu dàngu ka kumbaha eti dànya na banjaru-mu. Màla àruki ka kunggoji danja dàngu ka ku-hawola dànja da tau pambàda mangumu.

⁶Mbàda njala-maka hama tuda da bokuma la mangilu; mbàda wundama ma-akatu dàngu ma-katadaku.

⁷Ba la Mehiru-ha nda da-jàngapu-aha paraï boku la mangilu-ma; da paràma-mu da pa-hangàtarungu nda datama-a la kanandingu-da. Da-maromba-nya na pa-namungu-mu na ma-bundungu, dàngu la lihi Tehiku Tibuhala da-rawaku-ya i Hupu Majangga.[59]

⁸Tàka i MIRI na-pamara-ha nyuda lumunya na wikina, ka na-lohangu na rihi taluna.

⁹La hupu liina Nyuna, namihi na Tehiku Tibuhala, na-karia-nya na banjaru-na palii ningu la tehiku, hama tuna ba lii la maràda telangu.

¹⁰Tuna nuduka ba pamara-ha welingu la lima papada, hi pahàla-ha welingu la wawa lima muhu.

¹¹Na wai na-pamumuhu-ha da papada; nda haàtu-a mapeka.

¹²Hi dawaiya na njanjina paraï banjaru-na dàngu hi daludu wotunya Nyuna.

¹³Tàka darengga maromba-nja da pawunda-na i MIRI dàngu nda dakarai-a lii panaungu jàka nggàra ulada.

¹⁴La maràda telangu nairu ngàndiha pambuha tolu, tàka hi dakama-nya i Ala.

¹⁵Nawua-nja jàka nggàra pakarai-da, dàngumbu na-patàka-nja kanyaki ma-panggàbalu-nja.

¹⁶Nu la maràda wara ohadai-ka nyuda wàdanja i Muha dàngu i Harungu da ata matua-na.

¹⁷Tàka na tana na-tawanggahu pahoba-ya i Ndatangu, pa-tandani-nya i Ambiràmu dàngu ihi umana.

¹⁸Napuru na epi patewa-ha da makiku-nja, pa-pakehi ndàbaha da mambàda katadaku.

¹⁹La Hinai da-pandoi kahala hada ana hapi àmahu rara, hi da-marubuku-nya nu na kahala hada ana hapi palala.

²⁰Da-pahilu-nya i Ala Hupu Mangunju wàngu kahala hada hapi mangangu rumba.

²¹Da-maromba-nya i Ala ma-pamara-ha na mambàda wunda pawunda ma-bokulu la Mehiru.

²²Kanjupu wirungu-ha da pawunda-na la tana nuna, pa-hangàtarungu-ya na kukutungu-na la Tehiku Tibuhala.

²³Tuna nu duka hi na-patikingu i Ala pa-patàlaru-ya na banjaru-na, tàka na-pabetangu i Muha na tau paleha-na. Nyunaka i Muha mali padua-nja, hi na-wadaru na hànggana i Ala.

²⁴La malamiri-na da-tulaku-ya na tana manandangu ba nda dawaiya na njanjina i Ala.

²⁵La uma terada da-kamundangu dàngu nda dabihu parongu-ya na talia liina i MIRI.

²⁶Ba tuna wàngu harangu-na na-panjanjingu la pa-pameti-ha napa la maràda telangu.

²⁷Napa da ana umbuku-da pa-wàrungu-ha la honga ba - banjaru-ka hi napai - ihanja la hau tana - hau tana tau hangàdangu.

²⁸La malamiri-na la Piuru dalumu-nya na marapu Mbaàlu, hi dangangu pa-mangejingu la marapu.

²⁹Na pawunda-da nuna na pa-hawuwatu-ya na hànggana i MIRI, hi na-panggàbalu-nja hidu pa-maringgingu hamangu.

³⁰Tàka hi na-hadangu i Pineha pahuku-nja da manjala, hi na-pànjangu nu na pa-nggàbalungu.

³¹Nu na pawunda-na mahàmu-ya wànanya tau, dàngu na-pangàda mànunya tau lundu nu - nu.

³²La lihida da humuru la Marimba dawunda-ya na pambeni wàna i MIRI, dàngu da-pahanduka-ya na etina i Muha rukuna nu na pawunda-da.

³³Na pahàka eti na pawunda-da, hi kiri àtalu kareuku-na i Muha.

³⁴Da banjaru hawiangu nda da-patàlaru-aha, hama tuna na hupu liina i MIRI làti.

³⁵Tàka hi paori-daa-biada-njai da banjaru nuda, dàngu dakiku-nya na pakàli wàna na tau manda tandaya i Ala.

³⁶Hi dalumu-nja da marapu, dàngu nuna-duyaka na ma-pawiti-nya na hadànjalu-da.

³⁷Da mangeji-nja da ana wikida la marapu - marapu Kanaàngu.

³⁸Dabuunja da wai ria tau manda njala, wai riada nu da ana wikida, ka mangenji-nja la marapu - marapu; hi kiri pairaku-danya nuna na tana.

³⁹Rukuna nu na pawunda-da da-iraku wànya, dàngu nda da-tuturu-apa lai Ala.

⁴⁰Hi na-mbàringu na karaü etina i MIRI lai nyuda, nalabu-nya eti na mangu wikina.

⁴¹Ka puli-nanjaka la limada da banjaru, namàta-nja ka nangia ditanja muhu.

⁴²Tàka hi na-kapidihu-ha muhuda, dàngu hi da-roduku-nja la wawa pareta-da.

⁴³Nua nainguma na-pahàla-naha i MIRI, tàka darihi mbuhangu-mapa pa-pajurangu, hi da-tàlaru la njalada.

⁴⁴Ba tuna, i MIRI na-tanaü-ya na warada, na-hamata-ya na handuka-da.

⁴⁵Lumuda nyuda nanamu-ya na pa-njanjingu-na tàka hi naaï-ha ba na-bokulu na panamungu-na.

⁴⁶Na-pawiti-nya hi kiri mila-nanja eti paraï mbuu ndàba da ma-tanawa-nja nyuda.

⁴⁷Pahàla-kamawa, ou MIRI Alama, pauhi-nggamawa welingu la hongada da banjaru-ka, ka peku pamalangungu-ma dàngu ka mawotu-nya na tamu matua-mu.

⁴⁸Wotu-nyawa i MIRI, na Ala Ihirailu, nàhu dàngu lundu nu - nu. Màtawa mbutana na tau, “Amingu!” ka wàna. Wotu-nyawa i MIRI!