Read Kambera PAMALANGUNGU 107 Bible Online

PAMALANGUNGU 107 - Kambera bible

PAMALANGUNGU 107

¹“Pamalangu-nyawa i MIRI ba nahàmu-du, na pa-namunguna lundu nu - nuya nda na-kambotahu-a,” wàna.

²Panii hili weli - hili weli-yawa nuna, ha nyimi pambàda pahàla welingu la handuka.

³Mbàda pauhi-nanggaika welingu la parai - paraingu hangàdangu, welingu la pahunga dàngu la patama, weli dia diangu weli lurungu.[60]

⁴Ningu ma-njadangu la maràda telangu, nda dahunggu ànda ma-hanggangu la ngia pa-ngiangu la paraingu.

⁵Nyuda da-rimbangu dàngu da-kandànga dàngu nda ana nggàra-mapa pamonu-da.

⁶La handuka-da dawara-nya i MIRI, dàngu hi na-pamara-ha welingu la handuka-da.

⁷Napali-nja la ànda tànji ba nalonda-ha la ngia pa-ngiangu la paraingu.

⁸Ràka-mana ba da-pamalangu-nya i MIRI ruku pa-namungu-na, rukuda da paràma-na da pa-hangàtarungu la tau.

⁹Nadu ba na-podahu-ya na madau tau mamadau, hi na-pabundu-nya mahàmu na tau mamanjuu.

¹⁰Ninja da ma-hadunggutu la kapàtangu, tau pa-tahangu ma-mayila la tangga bàhi,

¹¹nadu ba mbàda rawaku-danya i Ala dàngu ba nda da-ihili-nya na hupu liina i Hupu Majangga.

¹²Na-palàjaru-ha da etida wàngu paràma mambotu; danjoru nda ningu ma-pandulangu.

¹³La handuka, dawara-nya i MIRI, hi na-pamara-ha welingu la handuka-da.

¹⁴Naluhu ngàndiha welingu la ma-kapàtangu, dàngu napata-ha da tanggada.

¹⁵Ràka-mana ba da pamalangu-nya i MIRI ruku pa-namungu-na, rukuda da paràma-na da pa-hangàtarungu wàngu la tau.

¹⁶Rukuna ba nabera-ha da pindu kaliangu, dàngu ba na-pamija-ha da bàhi pa-ndàbarungu.

¹⁷Ningu manduba dàngu ma-mayila ruku njalada, dàngu hi pa-mayila-ha ruku ndokuda.

¹⁸Dalabu-nja eti mbuu ndàba da pangangu, na rehi metida na-mareni-ka.

¹⁹La handuka-da dawara-nya i MIRI, dàngu na-pamara-ha welingu la handuka-da.

²⁰Na-pahàmu-ha la hiduda ruku hupu liina, dàngu hi na-pamara-ha welingu la meti.

²¹Ràka-mana ba da-pamalangu-nya i MIRI ruku pa-namungu-na, rukuda da paràma-na da pa-hangàtarungu wàngu la tau.

²²Màtawa ka da-pamalangungu dàngu ngàndida maraku, dàngu la pa-bobaru-ha da paràma-na wàngu wiliku hawola.

²³Ningumai ma-pàlaku wàngu kapalu la tehiku, pahimbu luri la tehiku lerangu.

²⁴Da-itaha da pawunda-na i MIRI, rukuna da paràma-na da pa-hangàtaru wàngu la tehiku.

²⁵La hupu liina, natungu na làpuru na mawuda-ha da ngalingu.

²⁶Da kapalu da-kawula pa-janggangu hu dita, tàka hi ndakilu pakati waranja la kuru nduu. Yilangu-nayaka na toru mbenida da tau pahangga-nya na hanggàmaru matungu nu.

²⁷Dawingu da matada hi mbembatu - mbembatu-da hama tuna tau maüku manjàpu kanandingu-na.

²⁸La handuka dawara-nya i MIRI, dàngu hi na-pamara-ha welingu la handuka-da.

²⁹Na làpuru na ma-panàhaku na-paràha-nya pa-kahàna, ka mandangu-danyaka da ngalingu.

³⁰Da-hawola ba na-làpahu-ka na làpuru; tàka hi na-karia-nja la pahiwi ngia pa-hanggangu-da.

³¹Ràka-mana ba da-pamalangu-nya i MIRI ruku pa-namungu-na, rukuda da paràma-na da pa-hangàtaru wàngu la tau.

³²Da-bobaru-ya na bokulu-na i MIRI la honga banjaru-na, dàngu dawotu-nya la kabungguru ama bokulu.

³³Da luku na-pambeli-ha maràda telangu da matawai danjadi tana marokutu.

³⁴Tana kamboka na panjadi-ya maràda mbàru, ruku akatu-da da tau mangia-nya.

³⁵Maràda telangu na-pambeli-nya panjadi tàma, tàna màdu nanjadi matawai.

³⁶Da tau ma-rimbangu na-bànjalu-ha lai nu; datura paraingu ngia pangiangu-da.

³⁷Datondu-nja da woka hi da-pamula pingi angguru, hi dàngu bundungu-na ba da-pabundungu ihi woka.

³⁸Nawua padaanja anada paraïna i MIRI, dàngu daworu pangalangu da bandada.

³⁹Na nyuna pa-pakàku-ha hi hawutu-adaka ruku mayila dàngu ma-pakapidihu mambana etina.

⁴⁰I MIRI na-pawawa-ha da ma-pangora lai nyuda, hi na-paràha-nja pa-lindingu la maràda wara manda ningu àndana.

⁴¹Tàka da tau mila na-pamara-ha welingu la handuka-da, da ihi umada daworu hama tuna kabàba mbimbi.

⁴²Daita-ha paraï tau patutungu hi da-hawola, tàka da tau akatu pa-pakandii-ha.

⁴³Màla àruki na tau manggàna ka na-kanandi-nja nuda mbuu ndàbada dàngu ka dapeka-ya ba daingu panamungu-na i MIRI.