Read Kambera PAMALANGUNGU 109 Bible Online

PAMALANGUNGU 109 - Kambera bible

PAMALANGUNGU 109

¹Nduma ma-kapipi tau maludu. Pamalangungu-na i Ndautu. Ou Ala pawotu mànunggu, àmbu pàdi wàmu bia.

²Nadu ba hànjalu-nangga tau akatu dàngu ma-palapingu ma-bobaru pulu ma-kambàliku rukunggu nyungga.

³Da-nàhaku wàngga kareuku karaü etida, hi da-pabera-dangga dàngu nda ningu kiringu.

⁴Jiapa ka kumbuha-nja dàngu ku-hamaya-nja tungguda, ba tuna papa biada-ngga.

⁵Na hàmunggu da-palimba wànya akatu, dàngu na pa-namungu-nggu wàngu ma-karaü.

⁶Wotuwa haàtu tau akatu ka nabota-nya ngerana, màtawa ka na-panjala-ya paraï papana.

⁷Màtawa ka patanda-nya ngerana ka pekaya ba njala-nanya, dàngu màtawa na-hamayangu-na ka pambulu-nya la njala-mbuna.

⁸Màtawa na lurina ka nalu njàpu, dàngu na pakata-na ka napiti-ya tau hawiangu.

⁹Màtawa ka ana mamila-ha da anana, dàngu ka kawini meti leiya na papaha-na.

¹⁰Màtawa da anana ka ma-karai hunggu malaku lindingu-ha, dàngu ka wànggaha[62] welingu la watu umada da ma-tanyungguru.

¹¹Màtawa da manguna ka nawàhi-ha tau ma-pahurungu wutangu, dàngu da ihi paraïna ka naramba-nja tau.

¹²Àmbu ningudu tau mahàmu-nya eti, jàka ndia mamila-nja eti da anana da-pataliuru-na.

¹³Màtawa da wàlana mbuu ndàbada ka patàlaru-ha, dàngu ka na-maromba na tamuna la ana handalaru manàmu-nya.

¹⁴Màtawa da akatu bokuna la mangilu ka daingu namu-naha paraïna i MIRI, dàngu da njala inana ka àmbu jàmanja.

¹⁵Màtawa da njalada ka daingu namu-naha paraïna i MIRI, dàngu ka àmbu ningu ma-pangàda-nja la pinu tana.

¹⁶Nadu na tau nuna nda ana miripu-na la etina pa-paloha-nya na pa-namungu. Na-pajàra tau mila dàngu ma-mayila, na-pameti tau manda payatangu.

¹⁷Ba na-mbuhangu pa-ràtungu; màtawa nyuna wiki nanggàna-ya ràtungu! Ba nda na-mbuhangu pa-pakanyurungu, màtawa ka àmbu ningu kanyuru ndumana!

¹⁸Lai nyuna na ràtungu pandàma-mananya, hama tuna ba na-kalambungu-maa. Màtawa na ràtungu-na ka nahini-ya hama tuna wai hudaa la ihina, dàngu ka hama lonahu ma-marabihu hudaa la riina.

¹⁹Màtawa na ràtungu-na ka na-kamburu-nya nyuna hama tuna paki-nanya, dàngu ka na-wunjilu-nya hama tuna boru bànggi-nanya.

²⁰MIRI, puha-nyawa nu na hukungu la ma-panjala-ka, la tau mapanii akatu rukunggu nyungga.

²¹Tàka nunjuya na njanjimu, ndula-kawa ou MIRI Alanggu, pamara-kawa ruku hàmumu dàngu pa-namungu-mu.

²²Nadu ba kumila dàngu ku-mayila, dàngu ba kanjupu manua-ya na etinggu.

²³Kutika pa-mbulangu-ka àmangu hama tuna na mamaü la rehi malingu, pa-kàmbahu-ka hama tuna kabala.

²⁴Nda - ndàndada da kambàku-nggu rukuna ba ku-puaha, ke - kepanggu pa-malakangu.

²⁵Da tau da maita-ka dariki-ngga ba dapi - pimbilungu katiku-da.

²⁶Ndula-kawa ou MIRI Alanggu, pamara-kawa nunjuya na mbuha-mungga.

²⁷Napa ka dapinya paraï da muhunggu ba pawunda-mu Nyumuya, ba Nyumuma MIRI ma-pahàra-nya.

²⁸Jiapa-kai ka dahara-ngga nyungga, màla àruki kau pakanyuru-ka. Jiapa-kai ka dahada-ngga, napa pa-pamakia-ha; tàka màla àruki ka pa-hawola-ka nyungga atamu.

²⁹Màtawa da ma-panjala-ka ka na-panggàbalu-nja paànga wàngu, dàngu ka na-palumburu-nja makia hama tuna kalembi malai.

³⁰Ka kuwotu-nya i MIRI wàngu pakodungu-nggu, wàngguka, la pa-bobaru-ya Nyuna la pauhi banjaru.

³¹Nadu ba na-kahiri dàngu ba na-pahàla tau mila welingu la tau ma-panggàna-nya hukungu meti.