Read Kambera PAMALANGUNGU 115 Bible Online

PAMALANGUNGU 115 - Kambera bible

PAMALANGUNGU 115

¹Nda nyuma-a duma, ou MIRI, nda nyuma-a duma, tàka Nyumua dumu paràka pa-wotungu, nadu bau tuturu dàngu ba daingu pa-namungu-mu.

²Ka nggikida da banjaru hi dapanii, “Nggiya na Alada?” hi wàda.

³Na Alanda duta la awangu-ya, nawunda-ya jàka nggàraya na pambuha-na.

⁴Da marapu-da àmahu rara dàngu àmahu bara-ma-aha, pa-pandoi lima tau.

⁵Ningu ngaruda tàka nda dapingu pa-kareuku, ningu matada tàka nda dangita-a.

⁶Ningu kahilu-da, tàka nda peku rongu-ada, ningu uruda, tàka nda peku hangei-ada.

⁷Ningu limada, tàka nda peku dàma-ada, ningu wihida, tàka nda peku pangga-ada, dàngu nda ningua talia liida maluhu welingu la nggoruda.

⁸Màla ka tuda nu àruki[65] da tau ma-pandoi-ha, dàngu mbuu ndàba da tau mawaiha.

⁹Ha Ihirailu, monu-nyawa i MIRI, Nyunama na mandula-kai dàngu na maopa-nggai.

¹⁰Ha dimi ratu, monu-nyawa i MIRI, Nyunama na mandula-kai dàngu na maopa-nggai.

¹¹Ha mbuu ndàbami tau karadaku monu-nyawa i MIRI, Nyunama na mandula-kai dàngu na maopa-nggai.

¹²I MIRI nanamu-ta dàngu hi na-pakanyuru-ta, napa na banjaru Ihirailu dàngu mbuu ndàba da ratu wàlana i Harungu na-pakanyuru-nja.

¹³Napa da tau ma-karadaku, ka anakeda-ya, ka tau matua-ya, na-pakanyuru-nja.

¹⁴Màla àruki ka nawua padangu ana i MIRI, lai nyimi dàngu la ana umbuku-mi.

¹⁵Màla àruki ka na-pakanyuru-kai paraïna i MIRI, ma-padikangu awangu tana!

¹⁶Na awangu mangu mehana i MIRI-aya, tàka na tana nawua-ya la tau.

¹⁷I MIRI nda nawotu-anya paraï tau meti, paraï tau mambàda puru la pangia ma-malinggitu.

¹⁸Tàka nyuta duta maluri ta-pamalangu-nya Nyuna, nàhu dàngu lundu nu - nu. Wotu-nyawa i MIRI!