Read Kambera PAMALANGUNGU 118 Bible Online

PAMALANGUNGU 118 - Kambera bible

PAMALANGUNGU 118

¹Pamalangu-nyawa i MIRI ba nahàmu-du, na pa-namungu-na lundu nu - nuya.

²Màtawa ka napanii na tau Ihirailu, “Na pa-namungu-na lundu nu - nuya nda ningu dirana,” ka wàna.

³Màtawa ka dapanii da ratu, “Na pa-namungu-na lundu nu - nuya nda ningu dirana,” ka wàda.

⁴Màtawa ka dapanii mbuu ndàba da tau karadaku, “Na pa-namungu-na lundu nu - nuya nda ningu dirana,” ka wàda.

⁵La handuka-nggu kuwara-nya i MIRI; tàka, hi nahema dàngu hi na-pamara-ka.

⁶Nda ku-mangàdatu-a nadu ba naangu-ngga i MIRI, na tau nda na-duluku-a hanggangu lai nyungga.

⁷I MIRI naangu-ngga la pandula-ka, napa kuita-ha ba pakàku-ha da muhunggu.

⁸Narihi hàmu-mapa ba handera lai MIRI, welingu ba monungu la tau.

⁹Narihi hàmu-mapa ba handera lai MIRI, welingu ba monungu tau bokulu.

¹⁰Nadangu na muhu na-mawinggiru-ngga; tàka wàngu kodi màkana i MIRI ku-pakàku-ha.

¹¹Da-nggupulu weli winggiru-ngga; tàka wàngu kodi màkana i MIRI ku-pakàku-ha.

¹²Hama tuna ina manggaluangu ba da-karunggi-ka; tàka wàngu kodi màkana i MIRI ku-pakàku-ha. Ndedi mbàdiku-na ba pàdaha hama tuna epi la rii madaka.

¹³Dira kukutungu-ha ba da-hànjalu-ka, dàngu kutika panjoru-ka-amangu, tàka i MIRI nandula-ka.

¹⁴I MIRI jiaya na àtalu-nggu dàngu na palumu-nggu, Nyuna mbàda pamàna-nanggaka.

¹⁵Ronguya na kayaka talu la uma tera - uma tera banjaru-na, “I MIRI nawunda pawunda ma-kanjupu wirungu!

¹⁶Na kodi màkana i MIRI nawua-nda talu! I MIRI nawunda pawunda ma-kanjupu wirungu,” wàna.

¹⁷Nda jia meti-anggu, tàka pa-daingu luringgu la pa-bobaru-ha da paràma-na i MIRI.

¹⁸Mbàda kanjupu pajàra-nanggaka paraïna i MIRI, ba tuna nda napuli-angga la lima meti.

¹⁹Bunggahu-ngga pindu bokulu Umana i Miri, ka kutama dàngu ka ku-pamalangu-nya.

²⁰Yiana-ya na pindu bokulu-na i MIRI, mbulungu tau patutungu-a maliya.

²¹Kuwotu-nggau Nyumu, ba mbàda kataku-munyaka na hamayangu-nggu; ba mbàda wua-munggaka talu.

²²Na watu na pawàru-da da tukangu wulu uma, na njadi-yaka watu kabihu.

²³Nuna pawunda-na i MIRI-ya, kanjupu pa-hangàtarungu-ya lai nyuta.

²⁴Yiana lodu pa-kawuku-na i MIRI-ya; màla ka tambabu hawola-nya.

²⁵Ma-kamahingu MIRI, pamàna-nggamawa, ou MIRI wua-nggamawa talu!

²⁶Pa-pakanyurungu-yawa nyuna na mamai wànya na tamuna i MIRI, nyuma duma ma-pakanyuru-nggau nyumu welingu la Umana i Miri.

²⁷I MIRI jiaya na Ala, namàja-nda eti nyuta. Ndàharangu kai paï wàngu lai ai la limami, dàngu winggiru-nyawa na ngia pawotu maraku manguna i MIRI.

²⁸Nyumu jiakau Alanggu, lai Nyumu ku-pamalangungu, ou Alanggu ku-pabokulu-kau Nyumu.

²⁹Pamalangu-nyawa i MIRI ba nahàmu-du, na panamungu-na lundu nu - nuya nda ningu dirana.