Read Kambera PAMALANGUNGU 119 Bible Online

PAMALANGUNGU 119 - Kambera bible

PAMALANGUNGU 119

¹Oha-naka na tau maluri nda ningu nyurangu dàngu ma-karadaku-nja da Ukuna i MIRI.

²Oha-naka na tau makiku-nja da hupu liina, dàngu na maweli etingu pa-pamukarungu la patanda-ya i MIRI.

³Oha-naka na tau maluri nunjuha da pawuku-na i MIRI, dàngu ba nda nawunda ma-akatu.

⁴Nyumu uwua-nggama Ukumu ou MIRI, ka wàngu tuturu-ma ba manunju-ha.

⁵Màla àruki ka wàngu màndungu etinggu ba kununju-ha da kalaratu-mu.

⁶Jàka kueti wànja mbuu ndàba da hupu liimu, nda jia pamakia-aka.

⁷Ku-manginjiru-ha da botangu-mu da mamola, kuwotu-nggau wàngu tànji etinggu.

⁸Ka ku-radaku-nja da Ukumu, wàngguka, àmbu jia dunjaku ndoku-mungga.

⁹Na bidi tau na-ngalangu pa-roputu wikina la ma-iraku jàka naluri nunjuya na hupu liimu.

¹⁰Weli etinggu ku-pamukarungu la patanda-kau Nyumu, àmbu màtangga pa-hiliru welingu la hupu liimu.

¹¹Na pa-papeka-mungga ku-kakomba kambu-yaka, ka àmbu kunjala lai Nyumu.

¹²Kuwotu-nggau Nyumu, ou MIRI, papeka-nggaha da kalaratu-mu.

¹³Wàngu pawàndingu-nggu ku-bobaru-ha mbuu ndàba da Uku da pawua-mu.

¹⁴Kumbaha eti wànja ba kununju-ha da hupu liimu, hama tuna ba mangungu màtu - màtu banda pawuulu wàngu.

¹⁵Da botangu-mu ku-papeka-nja, wàngguka, dàngu kueti wànja da pawàngu ba wàmu.

¹⁶Da kalaratu-mu da pambaha etika; da papekangu-mu nda jia maromba-anggunja.

¹⁷Màjangu àruki lai nyungga yia atamu, ka pa-daingu luringgu dàngu karadaku-nggunja da papekangu-mu.

¹⁸Pabula-nja da matanggu, ka kuita-ha da papekangu pa-hangàtarungu la Ukumu.

¹⁹Na luringgu la pinu tana lalu dànggitu-ya, àmbu kawini-nja da Ukumu welingu lai nyungga.

²⁰Nahidu na etinggu paraï pa-rinjungu, ku-rinjungu papi mànunja da Ukumu.

²¹Ukayàmbaku-nja da tau jangga eti, da tau ma-hiliru welingu la hupu liimu uràtunja.

²²Pahàla-ka welingu la pawawa dàngu pamakia-dangga, nadu ba mbàda pahàra-nggunjaka da kalaratu-mu wàngu tuturu-nggu.

²³Ka jiapa da-pahamangu da maningu kawahangu la palawa-ngga, nyungga duku atamu pangàda-manggunja napa da kalaratu-mu.

²⁴Da kalaratu-mu jiaha da ma-panaungga da ma-pambaha etika.

²⁵Ku-tanggungulu la kumburu tana; pahàmu beliya na luringgu nunjuya na njanjimu.

²⁶Kupeka-ha da pawunda-nggu, tàka Nyumu hiu hemaka; papeka-nggaha da kalaratu-mu.

²⁷Ndula àru-kika la papi hàmunja da Ukumu, da papekangu-mu[66] da pa-hangàtarungu ku-pangàda-manja duku napa.

²⁸Na ndewanggu na lujuru paraï pa-handuka, pa-àtalu-kawa nunjuya na njanjimu.

²⁹Pamarau-kawa welingu la ànda njàrangu, ruku hàmumu, papeka-nggawa Ukumu.

³⁰Mbàda pindi-nggunyaka la pa-karadaku, da hupu liimu kunamu mànu-maha duku.

³¹Mbàda kiku nggunjaka da kalaratu-mu, ou MIRI, àmbu màtangga la pa-makia.

³²Wàngu mbaha etinggu kununju-ha da hupu liimu, wàngguka, nadu ba Nyumudu ma-pawiti-nya hi hama huka jàngapu-ngguha la kanandingu-nggu.

³³MIRI, papeka-nggaha da kaloka kalaratu-mu, ka ku-karadaku-nja lundu hupu njàpuna.

³⁴Wuangga-wa kanandingu la pa-jàngapu-ha da Ukumu, ka kununju-ha, dàngu ka weli etinggu pa-pahàra-nja.

³⁵Màla àruki ka kukata undunja da hupu liimu, nadu ba nuya na rinju etinggu.

³⁶Wuangu-wa patikingu ka ku-karadaku-nja da kalaratu-mu, làpaya na rinjungu pawulu.

³⁷Mangga-nggawa ka àmbu ku-kambuhi-nya na manda lingu, wuangga-wa ka kuluri nunjuya na pambuha-mu.

³⁸Paundu-nyawa na njanjimu lai nyungga atamu, na pawua-mu la tau ma-karadaku-nggau Nyumu.

³⁹Pamarau-ya na paakangu na pa-mangàdatu-nggu, ba kanjupu hàmu làngatàka-ha da Ukumu.

⁴⁰Wuangga luri bidi bau moladu, ku-patikingu-ma duku pa-karadaku-nja da botangu-mu.

⁴¹Ou MIRI, pa-itangu-ya bau namuka, pamàna-nggawa nunjuya na njanjimu.

⁴²Tàka peku-ngguka pahema-ya na tau ma-paaka-ngga, ba kumonu-nya na paniimu.

⁴³Ndulaka ka kupanii mànuya na ma-deningu, ba kumonu-nja da botangu-mu.

⁴⁴Ka kukata undunya na Ukumu, lundu nu - nu wàngguka.

⁴⁵Napa kuluri marandeka, nadu ba pamukarungu-manggunya, panunju-ha da papekangu-mu.

⁴⁶Da kalaratu-mu napa ku-bobaru-ha la hanganji - hanganji, dàngu nda jia makia-anggu.

⁴⁷Na pahàmu eti wànggu jiaya la pa-pahàra-nja da hupu liimu, nadu ba kumbuha-nja.

⁴⁸Kutembi dàngu kumbuha-nja da hupu liimu, da kalaratu-mu ku-pangàda-manja napa.

⁴⁹Pangàda-nya na njanjimu lai nyungga atamu, na njanji na mawua-ngga monungu.

⁵⁰Yiana-yaka na maomba-ka la mayila-nggu, ba jiaya na njanjimu na ma-paluri-ka.

⁵¹Da tau ngànjangu kanjupu paaka-dangga, tàka nyungga duku nda kuhiliru-a welingu la Ukumu.

⁵²Jàka ku-pangàda-nja da Ukumu weli àmangu, hàmu ma-ananya na etinggu, ou MIRI.

⁵³Kanjupu karaü-nggunja eti da tau akatu, rukuna ba da-dunjaku-nya na Ukumu.

⁵⁴La ngala luringgu na ma-dànggitu la pinu tana, da kalaratu-mu ku-panjadi-ha ludu wotungu.

⁵⁵La rudungu ku-pangàda-nggau Nyumu, ou MIRI, ku-pamàndu mànunya na Ukumu.

⁵⁶Kungala-nya na pa-ohangu ba ku-karadaku-nja da hupu liimu.

⁵⁷Nyumua parinju-nggu, ou MIRI, kuràndi-ya ka pahàra-nja da papekangu-mu.

⁵⁸Ku-kamahi weli etinya na paaï pa-namungu-mu, mila àru-kingga eti nunjuya na njanjimu.

⁵⁹Mbàda pangàda-nggunyaka na luringgu, dàngu kuràndi-ya la panunju-ha da kalaratu-mu.

⁶⁰Ri - ringa-manggu dàngu nda ku-parehingu-a la pa-pahàra-nja da hupu liimu.

⁶¹Da tau akatu dabata-ngga remba, tàka nyungga duku nda kuromba-anja da Ukumu.

⁶²La paduaka rudungu ku-hadangu pawotu-nggamu, ba damola-ma da botangu-mu.

⁶³Ku-ariyaa-nja mbuu ndàba da tau karadaku, mbuu ndàba da tau da manunju-ha da hupu liimu.

⁶⁴Na pinu tana nambinu-nya hàmumu, ou MIRI, papeka-nggaha da kalaratu-mu.

⁶⁵Mbàda pahàra-munyaka na njanjimu, ou MIRI, dàngu mbàda wunda-munyaka mahàmu na atamu.

⁶⁶Wuangga-wa manggàna dàngu papingu wàngu, nadu ba kuwaiha da hupu liimu.

⁶⁷Ba ndedi hukungga kukàli hiliru, tàka nàhu kata undu-nggunyaka na hupu liimu.

⁶⁸Ruku hàmumu dàngu bau wunda màhamu, papeka-nggaha da kalaratu-mu.

⁶⁹Da tau ngànjangu dapawau-ka, tàka wàngu weli etinggu ku-karadaku-nja da botangu-mu.

⁷⁰Nyuda duda nda da-jàngapu-aya, tàka nyungga duku na-pahàmu eti na Ukumu.

⁷¹Nahàmu-ma bau hukungga, ka kutanda-ha da pawàngu ba wàmu.

⁷²Nyungga duku narihi pa-wilingu-pa na Ukumu welingu la mbuu ndàba àmahu marara mabara la pinu tana.

⁷³Nyumu ma-padikangga dàngu mawulu-ka, wuangga-wa kanandingu ma-jàngapu la pa-manginjiru-ha da hupu liimu.

⁷⁴Da tau karadaku dambaha eti ba daita-ka, ba kumonu-nya na njanjimu.

⁷⁵Kupi-manya ba damola da botangu-mu, ou MIRI, ba ruku tuturu-mu hiu hukungga.

⁷⁶Màla àruki na pa-namungu-mu ka jiaya naomba etinggu, nunjuya na njanjimu lai nyungga atamu.

⁷⁷Milangga eti ka daingu luringgu, nadu na Ukumu na-pahàmu-ya na etinggu.

⁷⁸Màla àruki ka damakia da tau ngànjangu ba mbàda pawau-danggaka, tàka nyungga duku kueti-wamanja da hupu liimu.

⁷⁹Màla àruki da tau karadaku ka damai lai nyungga, mbuu ndàba da matanda-ha da kalaratu-mu.

⁸⁰Màla àruki ka àmbu na-hiliru na etinggu welingu la kalaratu-mu, ka àmbu ku-makia.

⁸¹Na etinggu kanjupu rinju-nanya na mànangu welingu lai Nyumu; na njanjimu jiaya na pamonu-nggu.

⁸²Danjili da matanggu panedi-nya na-pahàra-munya na njanjimu, ku-paàrangu, “Pirangu-ka naomba-mungga?” wànggu.

⁸³Na manula-nggu na-kawikitu hama tuna kanai angguru miriya, ba tuna da kalaratu-mu nda ku-maromba-anja.

⁸⁴Lundu pirangu-mapa ba ku-patorungu nyungga atamu? Pirangu mapa bau hukunja da tau mayaulu-ka?

⁸⁵Da tau da manda karadaku la Ukumu, daàki-ngga lambongu la pa-kahili-ka.

⁸⁶Mbuu ndàba da Ukumu pa-monungu-ha, ba tuna ndula-kawa, ba nda nggàra lata-a ba dayaulu-ka.

⁸⁷Datika pa-pameti-ka amangu-ka, tàka nyungga duku nda kulànja-anja da hupu liimu.

⁸⁸Pamara-kawa ba pa-daingu namu-mungga, ka peku karadaku-nggunya na Ukumu.

⁸⁹MIRI, na pulumu na-undungu lundu nu - nu, nda na-kambotahu nda ningu dirana la awangu.

⁹⁰Na tuturu-mu na-torungu lundu nu - nu, Nyumu ma-pakapànduku-ya na tana hi pa-daingu ninya.

⁹¹Mbuu ndàba da maninja nàhu, ruku hupu liimu hi ninja, nadu ba ata-munja mbuu ndàbada.

⁹²Jàka nda jia na Ukumu làti na pingi mbaha etinggu, mbàda meti-ngguka làti la mayila-nggu.

⁹³Nda jia talarahu-anggunja da hupu liimu, nadu ba wàngu hupu lii dumu bau paluri-ka.

⁹⁴Pahàla-kawa ba mangu dumungga, mbàda pamukarungu-ngguka panunju-ha da hupu liimu.

⁹⁵Da tau akatu danàpu-ngga la pa-pameti-ka, tàka nyungga duku ka kueti wànja da Ukumu, wàngguka.

⁹⁶Kuita-ha jiapa da manda ningu nyurada ba ningu dirada, mbulungu na hupu lii-amu na manda ningu nyurana.

⁹⁷Na Ukumu dira mbuha-nggunya; dàngu ku-pangàda-nya lundu njàpuna na lodu.

⁹⁸Kurihi manggàna-njapa da muhunggu, ba naingu pangàda-nggunya na hupu liimu.

⁹⁹Kurihi manggàna-njapa da nggurunggu, ba ku-pangàda-nya na hupu liimu.

¹⁰⁰Kurihi manyàmungu-pa welingu la ma-kaweda, ba kukata undunja da botangu-mu.

¹⁰¹Mbuu ndàba na huri luri akatu ku-wiliru-nja, ka peku manundu-nggu la lii papekangu-mu.

¹⁰²Nda ku-talarahu-anja da ukumu, ba Nyumu wikima ma-papeka-ngga.

¹⁰³Kanjupu lànggaya na kareuku-mu, narihi làngga welingu la manggaluangu!

¹⁰⁴Da Ukumu dawua-ngga kanandingu ma-jàngapu, hi kuhuda etinya na huri luri tau palapingu.

¹⁰⁵Na pulumu jiaya na palita la pangganggu, handaraku ma-pahambila-ya na àndanggu.

¹⁰⁶Na panjanji-nggu wàngu harangu-nggu kununju-maya napa, ka ku-pamàndu-nya na botangu-mu na mamola.

¹⁰⁷Kanjupu mayila-ka, ou MIRI, mangganya na luringgu hama tuna na panjanji-mu.

¹⁰⁸Kataku-ya na hamaya pamalangungu-nggu, ou MIRI, dàngu papeka-nggaha da ukumu.

¹⁰⁹Jiapa-kai ka na-hanggàmaru wànya na luringgu, tàka[67] na Ukumu nda jia maromba-anggunya.

¹¹⁰Jiapa-kai na-kahili-ka tau akatu, tàka nda ku-hiliru-a welingu la botangu-mu.

¹¹¹Da hupu liimu jiaha da kangeha-nggu lundu nu, da ma-pambaha-ya na etinggu.

¹¹²Patikingu-manggunya pa-manundu la kalaratu-mu lundu hupu njàpu luringgu.

¹¹³Kumbuha-nja da Ukumu, kuhuda etinja da tau da manda weli etingu pamanundu lai Nyumu.

¹¹⁴Nyumu ma-kahiri-ka dàngu maopa-ngga, kumonu-nya na njanjimu.

¹¹⁵Yilangu-kai welingu lai nyungga, ha tau akatu! Ba nunju-ngguha duku da hupu liina na Alanggu.

¹¹⁶Pa-àtalu-ka nunjuya na njanjimu ka kuluri, àmbu màtangga pa-makia la monungu-nggu.

¹¹⁷Juraka ka kumara, dàngu ka kueti-wa mànunja da hupu liimu.

¹¹⁸Utulaku-ha da tau ma-hiliru welingu la kalaratu-mu, kahewa-ma-ana na kabeli binggilu-da.

¹¹⁹Mbuu ndàba da tau akatu upahama-nja la kangudu, tuna nuduka hi kumbuha-nja da kalaratu-mu.

¹²⁰Ku-kandàndaku paraï pa-mangàdatu-nggau Nyumu, ku-mangàdatu-nya na botangu-mu.

¹²¹Mbàda wunda-ngguka mamola dàngu ma-padeningu, àmbu wua-duka la lima papanggu.

¹²²Njanji-yawa bau ndulaka napa, àmbu màtangga ka da-kapidihu-ka tau ngànjangu.

¹²³Da malara da matanggu paraï panedi-nya na pa-ndulangu-mu na ma-pamara-ka, kunedi-nya na pahàla na pambàda njanjimu.

¹²⁴Wunda-yawa nunjuya na pa-namungu-mu lai nyungga, dàngu papeka-ngganja da kalaratu-mu.

¹²⁵Nyungga duku ata-mamungga, pajàngapu-ya na kanandingu-nggu, ka ku-manyàmu-nja da hupu liimu.

¹²⁶MIRI, toma-nanyaka na rehi la pa-palimbangu, nadu da tau ba dapangga-ya na Ukumu.

¹²⁷Da hupu liimu kumbuha-nja rihi welingu la àmahu rara, rihi welingu la àmahu rara ihi mbàngina.

¹²⁸Tuna nu duka hi kununju-ha mbuu ndàba da pawàngu ba wàmu; dàngu kuhuda etinya na huri luri njala.

¹²⁹Kanjupu pa-hangàtarungu-ha da kalaratu-mu, jia hi kununju weli etiha.

¹³⁰Jàka kaloka-ha da papekangu-mu da habola, na-jàngapu-ha kanandingu tau maràka-ana.

¹³¹Yàndu - yànduna na kayeku-nggu, paraï parinju-nja da hupu liimu.

¹³²Punjilungu-wa lai nyungga dàngu mila-nggawa eti, hama tuna bau milanya eti na tau mambuha-nggau Nyumu.

¹³³Pa-kapànduku-ya na pangganggu nunjuya na njanjimu, àmbu màtanya na ma-akatu pangia ditangga.

¹³⁴Pahàla-ka welingu la tau da ma-kapidihu-ka, ka peku manundu-nggu la kalaratu-mu.

¹³⁵Pa-kanyuru wànggawa ba ninggau, dàngu papeka-ngganjawa da kalaratu-mu.

¹³⁶Da wai matanggu da-lulungu hama luku, rukuna ba nda panunju-ya na Ukumu.

¹³⁷Nyumu umola, ou MIRI, mbuu ndàba da ukumu da-tubangu.

¹³⁸Da hupu lii pawua-mu damola dàngu pa-monungu-ha.

¹³⁹Na-hawuwatu na mbeninggu rukuna ba da-maromba-nja da papekangu-mu paraï muhunggu.

¹⁴⁰Na njanjimu na-undungu dàngu pa-monungu-ya, kanjupu mbuha-nggunja.

¹⁴¹Nyungga yia ku-màraku dàngu tau kudu-aka, tàka da papekangu-mu nda ku-talarahu-anja.

¹⁴²Na molamu na-torungu lundu nu - nuya, dàngu na Ukumu na-padeningu mànu.

¹⁴³Kanjupu handuka-ya dàngu nda nangudu na etinggu, tàka da kalaratu-mu da-pahawola-ka.

¹⁴⁴Da kalaratu-mu damola mànu; wua-nggawa kanandingu ma-jàngapu ka kuluri.

¹⁴⁵Kuwara weli etinggau Nyumu; hema-kawa ou MIRI, ka kununju-ya na hupu liimu wàngguka.

¹⁴⁶Kuwara-nggau Nyumu; pahàla-kawa, ka kukata undunja da kalaratu-mu wàngguka.

¹⁴⁷La mba - mbaru ku-pawàla dàngu kukarai pa-ndulangu; kumonu-nya na njanjimu.

¹⁴⁸Ku-kanjupu-ya na rudungu ba ku-pawàla, pa-pangàda-nja da papekangu-mu.

¹⁴⁹Tingi-kawa ruku pa-namungu-mu, ou MIRI, mangganya na luringgu rukuna na molamu.

¹⁵⁰Da tau da mayaulu-ka mbàda mareni-daka, na-akatu na pawuku-da dàngu nda da-wàrihu-ya na Ukumu.

¹⁵¹Tàka Nyumu ulihingga, ou MIRI, mbuu ndàba da hupu liimu da-tubangu.

¹⁵²Welingu la mandai-manaka ba kupinya welingu la lii papeka - papekangu-mu, bau padainja lundu nu - nu.

¹⁵³Tàngaru-ya na mayila-nggu dàngu pahàla-kawa, ba nda ku-talarahu-nya na Ukumu.

¹⁵⁴Kahiri-kawa la palakara-nggu dàngu pahàla-kawa; pamara-kawa nunjuya na njanjimu.

¹⁵⁵Da tau akatu nda pa-pamara-aha, ba nda da-karadaku-nja da kalaratu-mu.

¹⁵⁶Kanjupu bokulu-ya na mila etimu, ou MIRI, pamara-kawa nunjuya na molamu.

¹⁵⁷Nadangu na tau na ma-muhungga dàngu na mayaulu-ka, tàka nda ku-talarahu-anja da kalaratu-mu.

¹⁵⁸Huda eti-manggunya jàka kuita-ha da ma-katadaku, ba nda danunju-ha da papekangu-mu.

¹⁵⁹Tàngaru-ka kanjupu mbuha-nggunja da hupu liimu, ou MIRI, pahàla-kawa ruku mbuha-mungga.

¹⁶⁰Mbuu ndàba da pulumu ma-deningu-ha, mbuu ndàba da Uku molamu da-padaingu lundu nu - nu.

¹⁶¹Da tau maningu kawahangu dayaulu-ka dàngu nda palatangu, tàka mbulungu na Uku-amu pa-mangàdatu-nggu.

¹⁶²Na njanjimu na-pahawola-ka, hama tuna tau mahunggu pawulu wàngu.

¹⁶³Mbuu ndàba na kambàliku-ka huda eti-manggunya, tàka na Ukumu kumbuha-nya.

¹⁶⁴Panutakungu-manggunya pa-pamalangu-nggau Nyumu, ba namola na Ukumu.

¹⁶⁵Da tau da mambuha-nya na Ukumu da-mambiru, nda ningua ma-ngalangu pa-pabeta-nja.

¹⁶⁶Nedi-nggunya na mànangu welingu lai Nyumu, ou MIRI, da hupu liimu ku-pahàra-nja.

¹⁶⁷Da kalaratu-mu ku-karadaku-nja, dàngu kumbuha weli etinja.

¹⁶⁸Ku-patutu-nja da hupu liimu dàngu da pawàngu ba wàmu, bau ita-maha mbuu ndàba da pawunda-ngguka.

¹⁶⁹Màla àruki ka natàka na waranggu lai Nyumu, ou MIRI, wuangga-wa kanandingu ma-jàngapu nunjuya na njanjimu.

¹⁷⁰Màtawa na kamahingu-nggu ka natàka lai Nyumu, pahàla-kawa nunjuya na njanjimu.

¹⁷¹Ka kuwotu mànunggau Nyumu wàngguka, nadu bau papeka-ngga kalaratu-mu.

¹⁷²Ku-rinjungu paludu wànya na njanjimu, ba damola mbuu ndàbada da hupu liimu.

¹⁷³Màla àruki kau mbuhangu mànu la pandula-ka, ba kupindi niya la pa-namatu-ha da kalaratu-mu.

¹⁷⁴Na etinggu narinju-nya na mànangu welingu lai Nyumu, na Ukumu na-pahawola-ya na etinggu.

¹⁷⁵Pahia-nggawa paluri, ka kuwotu-nggau Nyumu, màla àruki na pawàngu ba wàmu ka nandula-ka.

¹⁷⁶Ku-njàrangu hama tuna mbimbi ma-mbulangu, ba tuna maingu-wa, dàngu himbu-kawa nyungga yia atamu, ba nda ku-talarahu-anja da hupu liimu.