Read Kambera PAMALANGUNGU 135 Bible Online

PAMALANGUNGU 135 - Kambera bible

PAMALANGUNGU 135

¹Wotu-nyawa i MIRI! Wotu-nyawa na tamuna i MIRI, ha dimi atana

²ma-lumungu la Umana i Ala la ngia pa-ngiangu-na na Alanda.

³Wotu-nyawa i MIRI, ba nahàmu-du, wotu-nyawa na tamuna, ba namàja eti duna.[70]

⁴Naleha-ya i Yakupu nduma wikina, na banjaru Ihirailu natuya manguna.

⁵Nadu ba kupinya ba na-bokulu langatàka-ma i MIRI, narihi bokulu welingu la mbuu ndàba marapu-ka.

⁶Nawunda nggàra bia pambuha-na, la awangu dàngu la tana, la tehiku dàngu la kuru nduu ma-majolungu.

⁷Welingu la hupu tana na-patàka-nya na karumangu, na-pandoi-ya na kabilaku ka na-urangu. Hi na-palewa-ya na ngilu ka naluhu welingu la ngia pa-pahàmu-ya.

⁸La Mehiru na pameti-ha mbuu ndàba da kawunga ana piti welingu la tau lupangu la banda.

⁹Dadangu da pa-hangàtarungu dàngu da tanda pawunda-na lai nu ka hukunya na hanganji dàngu da panggawi-naka.

¹⁰Dadangu da banjaru pa-patàlaru-na, dàngu na pameti-ha da hanganji kaborangu:

¹¹I Hihungu na hanganji Amori dàngu i Onggu na hanganji Mbahàngu, dàngu mbuu ndàba da hanganji la Kanaàngu.

¹²Tàka da tanada hi nawua-ha la tau Ihirailu, na banjaru-na ka damangu-nja.

¹³Ou MIRI, pa-daingu bobaru-kau Nyumu, dàngu na tamumu nanamu mànuya paraï mbuu ndàba ana umbuku,

¹⁴nadu bau wuanya mamola na banjaru-mu, dàngu bau milanja eti da atamu.

¹⁵Da marapu-da nyuda àmahu marara mabara-ma-aha, pa-pandoi lima tau.

¹⁶Ningu ngaruda, tàka nda dapingu pa-kareuku, ningu matada, tàka nda da itai.

¹⁷Ningu kahilu-da, tàka nda darongu, welingu la ngaruda nda naluhu-a na kayeku-da.

¹⁸Màla àruki ka tuna nu na ngerada da tau ma-pandoi-ha, dàngu da mawaiha.

¹⁹Wotu-nyawa i MIRI, ha banjaru Ihirailu, wotu-nyawa Nyuna, ha dimi ratuna i Ala!

²⁰Wotu-nyawa i MIRI, ha dimi tau Lewi, wotu-nyawa Nyuna, ha mbuu ndàbami ma-karadaku!

²¹Wotu-nyawa i MIRI la Hiungu, la Yeruhali ngia pa-ngiangu-na. Wotu-nyawa i MIRI!