Read Kambera PAMALANGUNGU 139 Bible Online

PAMALANGUNGU 139 - Kambera bible

PAMALANGUNGU 139

¹Nduma ma-kapipi tau maludu. Pamalangungu-na i Ndautu. Ou MIRI, Nyumu umanginjiru-ka dàngu utanda-ka.

²Upinja mbuu ndàba da pawunda-nggu; welingu la mamarau upi hahanya na kanandingu-nggu.

³Uitaka nyungga, jàka ràma-nggunya, jàka hangahu-nggunyakai, upinja mbuu ndàba da pawunda-nggu.

⁴Jiapa ka ndedi ku-kareuku, upi haha-manya jàka nggàraya na papanii ba wànggu.

⁵Uwinggiru-ngga welingu la nggi bia, dàngu hiu opangga wàngu kodi màkamu.

⁶Lalu tanjiku-ya na papimu ba ku-pangàda-nya, nda natoma-nya paraïna kanandingu-nggu.

⁷Ngginika bàdi kulaku ningu ka ku-hinggilu welingu la kawaha-mu? La ngginika bàdi kupalai marau ningu welingu la hanggamu?

⁸Jàka kuhei la awangu, ninggau Nyumu lai nu, jàka ku mahuru la pangia meti, lai nu nimbunggau Nyumu.

⁹Jàka ka ku-hawuru làpahu-nyakai na kiri awangu la pahunga jàka ndia, ku-ngiangu la hupu patama mamarau halawàla,

¹⁰lai numbu Nyumu undulaka nyungga; lai numbu nalonda-ka limamu.

¹¹Jàka kukarai-ya ka na-palumburu-ngga kanjidingu, dàngu ka na-pambeli-ya rudungu na hambila la winggiru-nggu,

¹²tàka na kapàtangu nuna nda na-kapàtangu-a lai Nyumu; nu na rudungu naharii hama tuna loduya, dàngu nuna na kapàtangu hama tuna hariiya.

¹³Nyumu upadika-nja nimbihu-da da nua ihinggu, dàngu ulàtiku-ka daa la kambu inanggu.

¹⁴Kuwotu-nggau Nyumu ba kanjupu nda ningu hamangu-ka! Mbuu ndàba da pawunda-mu pa-hangàtarungu dàngu pa-maratangungu-ha, kupi hàmu-manya nuna.

¹⁵Ba padika-nja da riinggu, wàngu màpi ba pandetu-nja daa la kambu inanggu, ba talànga tumbu kangunduhu-nggu lai nu, nda ku-kambelingu-a lai Nyumu.

¹⁶Mbàda ita-munggaka ba la kambu-ikapa; mbuu ndàbada pandàta-ha la mbukumu; da lo - loduna pambàda kawuku-haka ba ndedi haumbu ma-pakiringu.

¹⁷Kanjupu kalutu-ya[71] na kanandingu-mu ba ku-pangàda-nya, ou Ala, dàngu kanjupu danguha nggubulu-da!

¹⁸Jàka kudiha-ha, darihi dangupa welingu la wara; jàka ku-pawàla-ka, kanandi bianggu-nggaupa Nyumu.

¹⁹Màla àruki kau patàlaru-ya na tau akatu, ou Ala, pamarau-hawa da ma-pameti tau welingu lai nyungga!

²⁰Ma-akatu-maha da papanii-da rukumu Nyumu, dàngu dahara pa-àngangu la tamuda da paraingu-mu.

²¹Ou MIRI, ku-karaü-nya eti na tau ma-karaü-nggau eti Nyumu, nahala na etinggu hanggangu la tau ma-tumbaru-kau Nyumu!

²²Huda eti halawàla-manggunja nyuda, dàngu muhu-nggunja wànggu-maka.

²³Manginjiru-kawa ou Ala, dàngu palàda-nyawa na etinggu, kaka-kawa dàngu tanda-yawa na kanandingu-nggu.

²⁴Kinju-kawa, raï hi ningu bia akatu la wikinggu, dàngu londa-kawa la ànda malundu nu - nuya.[72]