Read Kambera PAMALANGUNGU 141 Bible Online

PAMALANGUNGU 141 - Kambera bible

PAMALANGUNGU 141

¹Pamalangungu-na i Ndautu. Kuwara-nggau Nyumu, ou MIRI, lu manyamalu-wa patula-ngga! Patingi àru-kingga jàka kuwara-nggau.

²Kataku-yawa na hamayangu-nggu hama tuna maraku dupa, dàngu da limanggu da ma-pandemangu ka beri maraku la rudungu.

³Ou MIRI, mangga-nyawa na ngarunggu dàngu hamata-ya na tada ngarunggu.

⁴Pamarau-kawa welingu la matarungu pawunda ma-akatu. Àmbu màtangga pa-panggolu dànja da tau katadaku dàngu la pangaa pera dànja la mbabuda.

⁵Jàka na-kanyàngi-ngga haàtu tau hàmu, dàngu ka wàngu tànji etina ba na-ràmbahu-ka, nuna hama tuna lonahu mahàmu halawàla-maya duku lai nyungga. Màla àruki ka àmbu ku-tebuku-ya, ba nutakungu-manggunya pa-hamayangu ndubaku-ha da akatu-da.

⁶Jàka tòkunja da ma-hanggubu-nja welingu la kela kaba watu, hina duka hi da pinya ba da-padeningu da paniinggu.

⁷Da rii kawudu-nda pa-hàbarungu-ha napa la hingi reti hama tuna na hau watu pa-pamuburu la tana.

⁸Tàka nyungga duku daingu monungu-nggu lai Nyumu, ou MIRI Alanggu, àmbu màtangga pameti, ba handera-manggunya lai Nyumu.

⁹Opa-nggawa welingu la hiru pabata-dangga, welingu la lambongu ka-hilida nuda da tau akatu.

¹⁰Màtawa ka danjoru la remba wikida, tàka nyungga duku màla àruki ka kumara.