Read Kambera PAMALANGUNGU 144 Bible Online

PAMALANGUNGU 144 - Kambera bible

PAMALANGUNGU 144

¹Welingu lai Ndautu. Wotu-nyawa i MIRI na maopa-ngga! Nyuna ma-pandàma-ngga la pa-hànjalungu, dàngu na-papeka-ngga pa-pabera.

²Nyuna maopa-ngga dàngu ma-kahiri-ka, ma-pamara-ka na ngia pa-pamaü-nggu. Nyuna maopa-ngga, ngia pa-hinggilu-nggunya, na-pakaruduku-ha da ba - banjaru lai nyungga.

³MIRI, nggàra-mayaka na tau, tàka hiu eti wànya? Nggamu-mayaka nyuna tàka hiu ihili-nya?

⁴Na tau hama tuna handàka hapuputu ngilu-ma-aya, hama tuna na ninu na ma-làpahu, tuna numa-a na lurina.

⁵Ou MIRI, bowa-yawa na awangu-mu dàngu puruwa, jonggaru-hawa da palindi ka da-kutungu.

⁶Patàda-nyawa na kabilaku-mu ka paiha nggangganya na muhu, puli-nyawa na panamu ka da-kanggupuku.

⁷Pajola-nyawa na limamu welingu la awangu, dàngu pamara-kawa welingu la iwa manjungu. Pahàla-kawa welingu la kawaha tau nàmu

⁸na ma-mbuhangu pa-kambàliku dàngu pa-palapingu, dàngu na mahara pa-angangu.

⁹Napa kuludu-nggau bidi ludu ou Ala, dàngu kujungga pa-kariangu ludunggu.

¹⁰Nyumu mawua-nja talu da hanganji, hiu pahàla-ya i Ndautu na atamu.

¹¹Pamara-kawa welingu la hapanda tau mambana etina; pahàla-kawa welingu la kawaha tau nàmu na ma-mbuhangu pa-kambàliku dàngu pa-palapingu, dàngu na mahara pa-àngangu.

¹²Màla àruki da ananda mini ba bidi tau-hapa ka hama tuna pingi ai malua-ya la pa-bokulu. Màla àruki da ananda kawini ka hama kambaniru manandangu-ha, ma-pamananda-nja da kabihu uma hanganji.

¹³Màla àruki da uma erinda ka dambinu-nja ihida wàngu ma - màtu pangangu. Màla àruki da mbimbi la maràda-nda ka da-paana padangu lundu riu rataha danguda.

¹⁴Màla àruki da hapinda ka daworu mbàmbaru dàngu àmbu ningu ma-mbulangu jàka ndia ma-paana tambuwa. Màla àruki ka àmbu tarongu kanjaïku mayila la a - ànda la paraingu-nda.

¹⁵Oha-naka na banjaru na matuna nu na ngerana, oha-naka na banjaru ma-Alanya i MIRI!