Read Kambera PAMALANGUNGU 145 Bible Online

PAMALANGUNGU 145 - Kambera bible

PAMALANGUNGU 145

¹Na wotungu-na i Ndautu. Ka ku-pabokulu-kau Nyumu wànggu, ou Alanggu dàngu na Hanganji-nggu duku, dàngu kuwotu-nggau lundu nu - nu.

²Nimbihu lodu ku-pamalangu-nggau Nyumu, dàngu ku-pamangara-nggau lundu nu - nu.

³Nadu i MIRI ba ma-bokulu-ya dàngu kanjupu pa-wotungu-ya, na bokulu-na nda patoma-ya.

⁴Napa na tau la handalaru handàdiku dawotu-nja da paràma-mu dàngu da-bobaru-ya na mbeni hanggangu-mu.

⁵Napa da-bobaru-ya na bokulu-mu dàngu na mangarangu-mu, napa ku-pangàda-nja da pawunda-mu da pa-hangàtarungu.

⁶Da-hàbaru pakada-nja da pawunda-mu da ma-wirungu, na bokulu-mu napa ku-bobaru pakàni-nya.

⁷Napa dapeka-ha tau mbuu ndàba da hàmumu dàngu hi daludu wànya rukuna na molamu.

⁸I MIRI na-panamungu dàngu na-paaïngu, na-lerangu etina dàngu na-panamu mànungu.

⁹Namàja etina la nimbihu tau, dàngu namila-nya eti mbuu ndàba na pa-padika-na.

¹⁰Mbuu ndàba da pa-padika-mu napa dawotu-nggau Nyumu, ou MIRI, nggubulu-na na banjaru-mu napa da-pamalangu-nggau.

¹¹Napa da-pabokulu-ya na kawaha-mu ba Hanganji-kau, dàngu dapeka-ya na rihi talumu,

¹²ka napi ndàbanya tau na pawunda-mu na ma-bokulu, dàngu na pa-hanganji-mu na ma-mangarangu dàngu na ma-hangganggiru.

¹³Na paretamu na-padaingu lundu nu - nu, na kawaha-mu na-torungu lundu la handalaru handàdiku. I MIRI na-tuturu la njanji-naka, la mbuu ndàba da pawunda-na na-lohangu ba kanjupu pa-namungu-ya.

¹⁴I MIRI nandula-ha da tau ma-handuka, na-patanganjiru-ha da tau ma-katànggungu.

¹⁵Mbuu ndàba da ngara maluri damonu-nggau Nyumu; uwuanja pangangu la rehina.

¹⁶Upamàtu-ya mbuu ndàba na pa-kalana-da, hi nda nggàra manjaka-nja.

¹⁷I MIRI namola la mbuu ndàba paula-na dàngu la mbuu ndàba da pawunda-na na-lohangu ba kanjupu pa-namungu-ya.

¹⁸Nalihi-nja da tau da mawara-nya Nyuna, dàngu da maweli etingu pa-kamahi-nya.

¹⁹Na-pamànjaku-ha da eti tau ma-karadaku; narongu-ya na warada hi na-pahàla-ha.

²⁰Naopa-nya nimbihu-na na tau mambuha-nya Nyuna, tàka da tau akatu na-patàlaru-ha.

²¹Ka wotu mànunya i MIRI wàngguka, màla àruki mbuu ndàba da pa-padika-na ka dawotu-nya na tamuna i MIRI lundu nu - nu.