Read Kambera PAMALANGUNGU 147 Bible Online

PAMALANGUNGU 147 - Kambera bible

PAMALANGUNGU 147

¹Wotu-nyawa i MIRI! Nadu ba mahàmu-ya ba wotunya Nyuna, dàngu na pambaha eti la paludu wotunya!

²Napa i MIRI na-pahàmu beliya na Yeruhali; da tau tanawangu na-karia belinja.

³Na-pahàmu-ha da tau mbata yàdu, dàngu na-kamburu-nja da manua-da.

⁴Na-kawuku-ya na danguda da kandunu la awangu, dàngu nimbihu-da natuu ndàbanja tamuda.

⁵Kanjupu ma-bokulu dàngu ma-wirungu-ya na MIRI-nda, na manggàna-na nda ningu dirana.

⁶Na-pahada-nja da tau pa-kapidihu, tàka da tau akatu na-patàda-nja la tana.

⁷Ludu-nyawa ludu wotungu i MIRI, karitu-nyawa jungga na Alanda.

⁸Nyuna ma-palàkaru-ya na karumangu la awangu; Nyuna ma-payema-nya urangu na pinu tana, dàngu ma-patumbu rumba la tandula.

⁹Nyuna mawua-nja pangangu da banda, dàngu da ana nggangga da mala - ladada.

¹⁰Na pa-papingi-na i MIRI nda njara àtalu-a; nda mini la ngora mambeni hanggangu-mbu.

¹¹I MIRI naora etinya na tau ma-karadaku, dàngu na mamonu-nya na pa-namungu-na.

¹²Wotu-nyawa i MIRI, ha Yeruhali! Wotu-nyawa na Alamu, ha Hiungu!

¹³Nadu ba na-pakapingatu-ha da pindu bokulu-mu, dàngu na-pakanyuru-ha da mangia-nggau.

¹⁴Nyuna na-mangganja da tana ngabamu ka pa-daingu mambiru-da, dàngu na-pambihu-kau wàngu uhu nggàndumu paleha.

¹⁵Na-wuangu pareta-na la pinu tana, dàngu na papanii-na paluu pa-hàrangu-maya.

¹⁶Na-papuru-nya na ura kamba hama tuna kambaya, dàngu na-hàbaru-nya na mburungu kamàndalu hama tuna kumburu tana.

¹⁷Na-papuru-nya na ura woli hama tuna karunggu watu; nda ningua ma-torungu la maringu-na.

¹⁸Tàka la hupu liina nalui na wai kamàndalu; na-puputu-ya na ngilu, ka lulungu-nanyaka na wai.

¹⁹Na-patàkangu lii langu la banjaru-na, nu da kalaratu dàngu da Ukuna la banjaru paleha-na.

²⁰Nda tunanja nua da banjaru hawiangu, nyuda nda datanda-aha da Ukuna. Wotu-nyawa i MIRI!