Read Kambera PAMALANGUNGU 18 Bible Online

PAMALANGUNGU 18 - Kambera bible

PAMALANGUNGU 18

¹Nduma ma-kapipi tau maludu. Pamalangungu-na i Ndautu, atana i MIRI. Paludu wotu wànya i MIRI ba na mara i Ndautu welingu lai Haulu dàngu welingu la mu - muhuna.

²MIRI, kumbuha-nggau, Nyumu jiakau pingi àtalu-nggu.

³I MIRI beri tindingu kapingatu-ya ngia pa-handera-nggu. Na Alanggu hama palindi watuya ngia pa-pamaü-nggu. Hama temingu-ya ba na-hanggubu-ngga, dàngu namangga-ngga ka ku-mambiru mànu.

⁴Kuwara-nya i MIRI na paràka pa-wotungu, na-pamara-ka welingu la mu - muhunggu.

⁵Na hanggàmaru meti na-winggirungga na iwa tàparu na-lumburu-ngga.

⁶Na-winggiru-ngga hanggàmaru meti, na oka kahili meti ninya la hangganggu.

⁷La handuka-nggu ku-kamahi-nya i MIRI, kuwara-nya i Ala pakarai pa-ndulangu. Welingu la Umana na-tanaü-ka na-katàmbalu-nya na kaladaku-nggu.

⁸Hi na-kanggauhaku na tana dàngu na-kandàndaku, hi da-yoyangu da latada da palindi ba na-mbàringu na hànggana i Ala.

⁹Na kutungu na-hambutalu welingu la kubu uruna, na epi dàngu na wàla epi naluhu welingu la ngaruna.

¹⁰Nabika-ya na awangu, hi napuru-ya wàngu kàmbangu mitingu la lumbu wihina.

¹¹Na-hawurungu ba na-kaliti patau awangu;[10] nahiri wàngu ruu kàpa ngilu.

¹²Na-palumburungu wikina wàngu kapàtangu; na-maringgi-nya na kàmbangu na matimbi.

¹³Welingu la kabilaku la hanggana, naluhu na kàmbangu, na ura wolu dàngu na epi.

¹⁴Hi na-kangguruku i MIRI welingu la ma-kahàna; i Hupu Majangga na-parongu-nya na talia nggoruna.[11]

¹⁵Na pahàla-nya na panana hi na-tawangga na muhu; na-nutakungu na kabàla, hi kiri palaida.

¹⁶Na lata tehiku nawuwa dàngu na lata tana na-habuwa ba na-kabàla-ya na muhu wàngu hànggana i MIRI.

¹⁷Weli ditangu na-pajola-ngga lima i MIRI; welingu la wai manjolungu na-padita-ka.

¹⁸Na pahàla-ka welingu la muhu ma-kaborangu welingu la mbutana na ma-karaü-ngga, ba darihi pa-kapàru welingu lai nyungga.

¹⁹Da-hànjalu-ka ba ningga la handuka, tàka i MIRI naopa-ngga.

²⁰Na-pamara-ka welingu la hanggàmaru hi na-pahàla-ka ruku namu-nangga.

²¹I MIRI na-palimba-nya na pawunda-nggu na ma-padeningu; na-pakanyuru-ka ba nda kuwunda manjala.

²²Mbàda nunju-ngguhaka da pareta-na i MIRI ndedima duku ku-taluru-nya na Alanggu.

²³Mbuu ndàbada da Ukuna kueti-wamanja duku, da pareta-na nda ningua pamàta-nggu.

²⁴Napingga ba nda ningu nyuranggu dàngu ba ku-wiliru-nya na njala.

²⁵Hi na-palimba-nja, da pawunda-nggu da ma-padeningu ba napingga ba nda kuwunda manjala.

²⁶MIRI, la tau ma-tuturu, ututuru-mai dumu dàngu bau hàmu la tau hàmu.

²⁷La tau ma-matua upaloha-nya bau matua, tàka hiu muhunya na tau akatu.

²⁸Na tau ma-karàda eti upamara-ya, tàka na tau ma-ngànjangu mu-pawawa-ya.

²⁹Nyumu upaketi-nya na palita-nggu; i MIRI na Alanggu na-paharii-ya na kapàtangu-nggu.

³⁰Nyumu ma-pakapàru-ka la pa-pamànji-ya na muhu; wàngu pa-ndulangu-na na Alanggu ku-bàriku-ha da tindingu-da.

³¹Na pawunda-na i Ala na-lànyapu na njanjina i MIRI pa-monungu-ya. Nyuna beri temingu-ya nduma mbuu ndàba tau ma-hinggilu lai Nyuna.

³²Ba didi-aya i MIRI na Ala; didi-aya i Ala na ma-kahiri-ta.

³³Nyuna jiaya na Ala ma-paàtalu-ka ma-pamambiru-ya na àndanggu.

³⁴Na-pakapingatu-ha da wihinggu hama wihi ruha, hi na-mambiru na àndanggu la ma-palindingu.

³⁵Na-pandàma-nja da limanggu la pabera, hi ku-manyàmungu pa-pandàngi tandai pana màndungu.

³⁶MIRI, Nyumu maopa-ngga dàngu ma-pamara-ka, dàngu hiu jura wàngga kodi màkamu; kutalu meha ruku pawunda-mu.

³⁷Umangga-ngga ka àmbu ku-tanawangu, dàngu hi nda ana njorunggu.

³⁸Kunyara-ha da muhunggu hi kubera-ha, nda hidama pa-kandulingu jàka ndedi dambuta.

³⁹Ku-ndakilu-nja hi nda peku hada belingu-da, la wihinggu da-tanggunggulu nda pawidi.

⁴⁰Ba Nyumu ma-paàtalu-ka pa-pabera, upawawa-ha da muhunggu hi kutalu-ha.

⁴¹Rukumu Nyumu hi dapalai-ngga muhunggu; ku-pamànji-ha da tau da ma-karaü-ngga eti.

⁴²Da-kaladaku, ba tuna nda ningu ma-pandulangu, dawara-nya i MIRI, tàka pàdi wànama.

⁴³Ku-pamuburu-ha hi hama tuna kumburu tana ma-tanyalangu-ha, dàngu ku-podahu-ha hama tuna kapihaku la ànda.

⁴⁴Upamara-ka welingu la banjaru katadaku, uwotuka la pangora-nja da banjaru; na banjaru pànda tandanggu làti, nàhu atanggu-haka.

⁴⁵Na banjaru tau nàmu na karuduku-ngga dàngu da patutungu jàka darongu-ya nahupu liinggu.

⁴⁶Na-yilangu na kaborangu-da nyuda; dàngu hi nda - ndàndada, ba daluhu welingu la ngia pa-torungu-da.

⁴⁷I MIRI naluri! Pa-wotungu-ya Nyuna na ma-kahiri-ka! Pamangara-nyawa na mangunju-na i Ala, na ma-pamàna-ngga!

⁴⁸Nawua-ngga patalu wàngu la muhunggu; na-panyàku-ha da banjaru-ka la hangganggu,

⁴⁹Na-pahàla-ka Nyuna welingu la papa-ngguka. MIRI, uwuangga patalu wàngu la muhunggu, uopangga la tau mbana eti.

⁵⁰Tàka hi ku-pabokulu-kau Nyumu la honga ba - banjaru-ka, dàngu hi kuludu-nggau ludu wotungu.

⁵¹I Ala nawua-nya talu manàra na maràmba-na Nyuna, pa-daingu namu-nanya na tau papindi-na, i Ndautu dàngu ana umbuku-na, lundu nu - nu.