Read Kambera PAMALANGUNGU 19 Bible Online

PAMALANGUNGU 19 - Kambera bible

PAMALANGUNGU 19

¹Nduma ma-kapipi tau maludu. Pamalangungu-na i Ndautu.

²Na awangu na-pekaya na mangunju-na i Ala, na hanggubu awangu na-bobaru-ha da ruku limana.

³Na hau lodu na-patàka-nya na hili hau lodu; na hau rudungu nahili panii pangala-nya la rudungu ma-malamiri.

⁴Nda ningu mapanii jàka ndia ma-kareuku, nda ningu malingu parongu kahilu.

⁵Tàka na talia liina nakada ndàbanya la pinu tana, parongu-ya nu na lii langu lundu la hu - hupuna na tana. La awangu nawulu-nya pangiana na mata lodu i MIRI,

⁶la mbaru nahunga, beri bidi papa maluhu welingu la kurungu-na, beri ma-kaborangu ma-hawola la pakiringu-na pa-pàlaku.

⁷Nalaku weli hupunya na awangu lundu la hupu hauna; welingu la hambàti mbanana nda ningu ma-kambailangu.

⁸Na Ukuna i MIRI na-lànyapu, na-pahayandalu hamangu. Na hupu liina i MIRI pa-monungu-ya, na-pamanggàna tau maràka-na.

⁹Na kalaratu-na i MIRI na-tubangu, na-pambaha eti. Na pawàngu ba wàna i MIRI ihi mbàngi-nanya, na-kaloka hàmu la tau.

¹⁰Kanjupu hàmuya ba lumunya i MIRI, na-panua naingu lundu nu - nu. Da Ukuna i MIRI da-padeningu dàngu damola ndàba.

¹¹Na Ukuna i MIRI narihi pa-wilingu la àmahu rara weli wingungu, narihi làngga la manggaluangu la hibu.

¹²Dàngu na-papeka-ngga nyungga atamu paraï da nuda mbuu ndàbada; nduma na manunju-ya pa-payema padangu-ya wundana.

¹³Nda ningua mapingu njala wikina; MIRI pahàla-kawa welingu la njala ma-kambailangu.

¹⁴Pamarau-kawa welingu la njala pa-harawuku, àmbu pahia-ngga la wawa limana. Jiaya hi nda ningu nyuranggu, hi kumara welingu la akatu njala.

¹⁵Màta àruki da panii dàngu da kanandingu-nggu, kau mbuha àrunja, ou MIRI, ngia pa-torungu dàngu ma pamàna-ngga!