Read Kambera PAMALANGUNGU 22 Bible Online

PAMALANGUNGU 22 - Kambera bible

PAMALANGUNGU 22

¹Nduma ma-kapipi tau maludu. Nunjuya na wiliku: Ruha la mba - mbaru. Pamalangungu-na i Ndautu.

²Ou Alanggu, dou Alanggu, ka nggikina hiu dunjaku-ngga? Kuwara-nggau tàka daingu marau biamu-ngga natula-mungga nda natàka ndoku-angga.

³Ou Alanggu, kuwara-nggau la lodu, tàka daingu biana ba pàdi wàmu. Ku-hamaya-nggau la rudungu, tàka nda nangudu-a na etinggu.

⁴Ba tuna Hanganji Mahupu Matua-makau dumu, ndumamu Nyumu naludu wotungu na Ihirailu.

⁵Daboku-ma la mangilu damonu-nggau Nyumu, damonu-nggau tàka hiu pamara-ha.

⁶Dawara-nggau tàka hi damara; damonu-nggau, kahewa-ana nda wàda-a.

⁷Nyungga duku nda tau-aka, tàka ngeli-aka, na-paaka-ngga tau dàngu napatu - tujika.

⁸Mbuu ndàba da maita-ka da-paakangu dàngu da-pawawa-ka, da-kamibi-ngga dàngu da-pimbilungu katiku-da.

⁹Dapanii, “Màtawa ka na-hamela wànya i MIRI, ka na-pahàla-ya paraïna i MIRI, jàka naora-nya eti paraïna i MIRI!” wàda.

¹⁰Nyumu mayila-ka welingu la kambu, tàka hiu pamambiru-ka la baba inanggu.

¹¹Welingu ba kudedi, na uranggu la lima-munya, welingu la kambu inanggu, jiakau Alanggu.

¹²Na hanggàmaru nalihi-nggaka, àmbu marau-dungga, dàngu nda ningua matula-ngga.

¹³Hama tuna kabàba hapi mbàtingu-ha, da muhu ma-karunggi-ka, hama tuna hapi mbàtingu mbeni la Mbahàngu-ha ba da-nggupulu-ka.

¹⁴Dàngu hanganga-da dahangga-ngga, hama tuna hinga ma-kangaüku, mahoba payàpa-na.

¹⁵Na àtalu-ngguka nda ningu-apa kaweina, hama tuna wai pa-hanubuku la tanaya, da ringguka da-tambukalu la ngàngahu-da, na etinggu nalui beri lilingu-ya.

¹⁶Na kalàmba nggorunggu[13] namàdu hama kambera làja, na làmanggu na-karitaku la-hindi làmanggu. Mu-dunjaku-nggaka MIRI la kumburu tana hama tuna tau mambàda meti.

¹⁷Na-nggupulu-ka kalibaru tau akatu; hama tuna kabàba ahu ba da-nggukuru-ngga, dahi - hiraha[14] da limanggu da wihinggu.

¹⁸Mbuu ndàba da riinggu dawuwa, da muhunggu dakuki-ka hama tuna pa-imingu-ka.

¹⁹Dapabe - berinja da pakinggu, hi datunya undi na kalembi malainggu.

²⁰Tàka Nyumu, àmbu jia marau dumu, ou MIRI, lu mai parenggangu pandula-ka, ba Nyumudu àtalu kapàru-nggu.

²¹Pamara-ya na luringgu welingu la hapanda, pahàla-ka welingu la ahu ma-panjàkapu.

²²Pahàla àruka tau nda payatangu[15] welingu la kadu hapi mbàtingu dàngu la ngaru hinga.

²³Na pawunda-mu napa ku-bobaru-ya la angu dedinggu; la pauhi banjaru-mu kuwo - wotunggau Nyumu.

²⁴Wotu-nyawa Nyuna, ha tau ma-karadaku! Pa-mangara-nyawa Nyuna, ha ana umbuku-na i Yakupu! Ma-rubuku-wa lai Nyuna ha ana umbuku-na i Ihirailu!

²⁵Nadu ba nda na-lànjangu tau pa-kapidihu, dàngu ba nda na-pahalela-ya na mayila-na. Nda na-handaluru-anya na tau nuna, tàka nahema-ya jàka nawara-nya.

²⁶Napa kuwotu-nggau MIRI la pauhi banjaru, rukuna mbuu ndàba na pawunda-mu. La hangga banjaru ma-karadaku kuwotu-ha da maraku panjanji-nggu.

²⁷Napa na tau mila nangangu lundu mbihu; da tau ma-hurungu lai MIRI dawotu-nya Nyuna. Màta àruki ka daingu mambiru-mi lundu nu - nu!

²⁸Mbuu ndàba da banjaru napa da-pangàda-nya i MIRI hi dabeli lai Nyuna, mbutada da kabihu banjaru napa da-marubuku palumu-nya Nyuna.

²⁹Ba i MIRI na ma-kawaha, Nyuna ma-pareta-ya na ba - banjaru.

³⁰Mbuu ndàba na tau bokulu napa na-marubuku la hanggana,[16] mbutana na banjaru tau pinu tana, napa na-marubuku palumu-nya Nyuna.

³¹Da ana umbuku la malamiri napa dalumu-nya i MIRI, la handàdiku handalaru pabobaru-ya Nyuna.

³²Da banjaru madedi malamiri pa-bobarungu-ha i MIRI ba mbàda pamara-nanya na banjaru-na.