Read Kambera PAMALANGUNGU 25 Bible Online

PAMALANGUNGU 25 - Kambera bible

PAMALANGUNGU 25

¹Pamalangungu-na i Ndautu. Lai Nyumu, ou MIRI kuwotu hamayangu-nggu,

²ou Alanggu kuwaikau Nyumu! Àmbu pulingga ka pamakia-ka, dàngu ka na-paoi-ngga muhunggu.

³Na tau ma-kaleka-nggau napa pa-pamakia-ya, tàka na tau na mawaikau nda jia hala eti-ana.

⁴Paita-ngganya na pawuku-mu, ou MIRI, pekangga jàka nggàra bàdi pawunda-nggu.

⁵Papeka-ngga dàngu londaka la paluri nunjuya na pambuha-mu, ba jiakau Nyumu Alanggu ma-pahàla-ka, lai Nyumu ngia pamonu mànunggu.

⁶Ngàdaya na hàmu dàngu na pa-namungu-mu, ou MIRI, na pa-paita-mungga welingu la kawunga-na.

⁷Jàmanja da njala dàngu da ndokunggu ba bidi tauka, pangàda-ngga nunjuya na mbuhangu dàngu na hàmumu.

⁸Ba nahàmu i MIRI dàngu ba natànji na botangu-na, na-paitangu ngarangia la tau njàrangu.

⁹I MIRI nalonda tau karàda eti, dàngu na-papeka-nja na pambuha-na.

¹⁰Na tau ma-tuturu la njanji dàngu la Ukuna, na-panuda-nya panamungu dàngu tuturu-na.

¹¹MIRI nunjuya na njanjimu jàma àru-kingga, ba lalu dangu-haka da njalanggu.

¹²I MIRI na-papeka-nya na tau pa-tundungu na ànda ngia palina bàdi.

¹³Na lurida pa-daingu mbokaru-na, da ana umbuku-da damàngi-nya na tana ndumada.

¹⁴I MIRI angu lànggi tau karadaku-ya, na-paloha-nya na pawuku-na lai nyuda.

¹⁵Da wua matanggu daingu pataraku-nggunja lai MIRI, ba Nyuna ma-pahàla-ka welingu la hanggàmaru.

¹⁶Njingi àru-kika dàngu namu àru-kika, ou MIRI, ba ningga la kahala ndidu dàngu la mayila.

¹⁷Na handuka etinggu na-bonjangu pamara-ka welingu la handuka-nggu.

¹⁸Hamata-ya na mayila dàngu na harui-nggu, dàngu jàmanja mbuu ndàba da njalanggu.

¹⁹Tàngaru kanjupu danguya na muhunggu; dàngu kanjupu karaü-dangga eti.

²⁰Mangga dàngu pamara-ka, àmbu ku-makia, ba lai Nyumu ku-handera ningu.

²¹Màta àruki na hàmu dàngu na patutungu ka nadai tutuka, ba Nyumu pamonu-nggu.

²²Ou Ala, pahàla àru-kiya na banjaru-mu welingu la mbuu ndàba handuka-na.