Read Kambera PAMALANGUNGU 26 Bible Online

PAMALANGUNGU 26 - Kambera bible

PAMALANGUNGU 26

¹Pamalangungu-na i Ndautu. Wuangga-wa tànji ou MIRI, ba mbàda wundanggu mahàmu. Kumonu-nggau Nyumu MIRI, nda ana ndua ndadi-anggu.

²Kinjuka ou MIRI, manginjiru-ka, kinjuya na rinjungu-nggu dàngu na kanandingu-nggu.

³Kunamu mànuya na mbuha-mungga, ku-tuturu mànuma duku lai Nyumu.[18]

⁴Nda ku-mbuhangu pa-pauhi dàngu tau palapingu, jàka ndia la pa-panggolu dàngu tau kapilandu.

⁵Na tau mawunda ma-akatu huda-manggunya, dàngu na tau kajàliku ku-wiliru-nya.

⁶Kubaha limanggu tandana ba nda kunjala, dàngu hi ku-paoringu papaï la ngia pawotu maraku mangumu ou MIRI,

⁷dàngu ludu pamalangungu-ma, ba ma-bobaru-ya na pawunda-mu na pa-hangàtarungu.

⁸Kumbuha-nya na Umamu, ou MIRI, na ngia pa-ngiangu wàngu bunjuku-mu.

⁹Àmbu pameti pakaria-ngga dàngu tau njala, àmbu butuhu pakaria-nya na luringgu dàngu tau pameti tau.

¹⁰Nyuda nutakungu-madanya pawunda ma-akatu, naingu ehingu-da payema pawua pa-runungu.

¹¹Tàka nyungga duku kuluri tànji etinggu, namu àru-kika dàngu pahàla àruka.

¹²Ka mambiru-nggunyaka welingu la mbuu ndàba hanggàmaru, napa kuwotu-nya i MIRI la pauhi banjaru-na.