Read Kambera PAMALANGUNGU 27 Bible Online

PAMALANGUNGU 27 - Kambera bible

PAMALANGUNGU 27

¹Pamalangungu-na i Ndautu. I MIRI jiaya na harii luringgu dàngu na ma-pamàna-ngga, nda ningua pa-mangàdatu-nggu. I MIRI jiaya nangia pa-torungu, na handera-nggu, nda na-bàrangu-a na etinggu.

²Hànjalu pameti-ya jàka wànangga tau akatu, nyuda biai ma-tunjuru hi danjoru.

³Jiapa ka na-nggupulu-ka mahada madangu-ngga, nda hidama duku pa-mangàdatu. Jiapa ka nanjungu-ngga muhu, pa-daingu monungu-manggu[19] duku.

⁴Hangia jua-ana pakarai-nggu lai MIRI, yiana-aya na parinju-nggu: ka ku-ngiangu la Umana i Miri la ngala luringgu, ka kupàda-nya na hàmuna i MIRI dàngu ka kuraiya na londa-nangga, wàngguka.

⁵I MIRI namangga-ngga la hanggàmaru; na-kawini-ngga la Umana, nawotu-ka la pinu palindi watu.

⁶Nàhu ngia dita-nggunjaka da muhu la winggiru-nggu; wàngu paoi mbaha etinggu kuwotu maraku pa-malangungu la Umana; ka kuludu dàngu ka kuwotu-nya i MIRI, wàngguka.

⁷Tingika, ou MIRI, jàka kuwara-nggamu, milangga eti dàngu hemaka!

⁸“Maiwa pa-marubuku-ngga,” wàmungga.[20] “Lu naa-mangga MIRI;

⁹àmbu kawiningu welingu lai nyungga,” wànggu ba kuhema. Àmbu hàngga-dungga dàngu àmbu jukaru-ngga nyungga atamu, ba jia mànukau matula-ngga. Àmbu wàrungga jàka ndia àmbu dunjaku-ngga, ou Ala ma-pamàna-ngga.

¹⁰Jiapa ka na-dunjaku-ngga ina amanggu, na nyuna i Ala daingu kabubulu-manangga.

¹¹Paita-ngganya na pawuku-mu, ou MIRI, londaka la ànda mola, ba kanjupu danguya na muhunggu.

¹²Àmbu jia wua-mungga la pambuha etida da papanggu, ma-hànjalu wàngga pangàdungu dàngu kaputingu.

¹³Kupi hàmu-manya napa kuhunggu-ya na hàmuna i MIRI la luringgu la pinu tana yiana.

¹⁴Monu-nyawa i MIRI, paundu pamàndu-nyawa na etimu; màla, monu-nyawa i MIRI!