Read Kambera PAMALANGUNGU 30 Bible Online

PAMALANGUNGU 30 - Kambera bible

PAMALANGUNGU 30

¹Pamalangungu-na i Ndautu. Na ludu ba katua-ya na Uma Ala.

²Kuwotu-nggau Nyumu ou MIRI, ba mbàda pahàla-munggaka dàngu ndau pahia-anya na muhunggu ka na-paoi-ngga.

³Kuwara-nggau ou MIRI Alanggu pakarai pa-ndulangu, hiu pahawuri-ka.

⁴Upamara-ka welingu la reti, hiu paluri-ka welingu la honga tau meti.

⁵Ludu wotunya i MIRI, ha mbuu ndàba banjaru-na ma-tuturu, dàngu pamalangu-nyawa i MIRI Hupu Matua.

⁶Ha-kambàdiku-ana na hànggana i MIRI, na hàmuna na-pangala tilangu la ngala luri. Hau rudu-anggu ba kuhii, tàka na pabarahu na-pambaha etika.

⁷Ba nda nggàra ehipa, “Nda hida-mapa pa-pakàku-ka!” wàngguka.

⁸Bau hàmu-dungga eti, Ou MIRI, upanjadi-ka hama tuna palindi ma-kapingatu. Tàka ba tunaka nu, kawiningu-munyaka welingu lai nyungga, hi lupa ku-mangàdatu.

⁹MIRI, lai Nyumu kuwara, lai MIRI ku-kamahingu,

¹⁰“Nggàra lingu-naka lai Nyumu jàka kumeti nggàraya na pautu wàngu jàka taningga? Jia pekuna-kaka na tau meti pawotu-nggamu dàngu pa-bobaru-ya na tuturu-mu?

¹¹Patingingu-wa, ou MIRI, dàngu namu àru-kika. Ndula àru-kika, MIRI!” wànggu.

¹²Na hawina-nggu upambeli-ya renja hawola, na handuka-nggu upahilu-nya mbaha eti.

¹³Ba tuna pàdi nda wànggua; kuludu wotu-nggamu Nyumu MIRI, Nyumu jiakau Alanggu, ku-pamalangu mànunggau Nyumu lundu nu - nu!