Read Kambera PAMALANGUNGU 32 Bible Online

PAMALANGUNGU 32 - Kambera bible

PAMALANGUNGU 32

¹Pamalangungu-na i Ndautu. Na ludu lii panaungu. Oha-naka na tau na pa-jàmangu njalana, dàngu ba nda pautu-aha da ndokuna.

²Oha-naka na tau da pànda dihana njala i MIRI, dàngu na manda mbuhangu pa-kambàliku.

³Ba ndedipa kupeka-ha da njalanggu, ku-kariku paraï pahii malo - lodungu.

⁴Lodu rudungu bau roduku-ngga, ou MIRI, nambuta na àtalu-nggu hama tuna pa-harebitu hambàti mbana lodu.

⁵Ba tuna hi kupeka njalanggu lai Nyumu, nda ningua njala pa-kawini-nggu. Kita-mananya na etinggu papeka-ha lai Nyumu, tàka hiu jàmanja mbutada da njalanggu.

⁶Jia ba tuna, nimbihu-na tau ma-tuturu na-hamayangu-maka bàdi la rehi handuka-na, jàka beri hama iwaya ba natungu na handuka, nda jia nggàna-ananya nyuna.

⁷Nyumu jiakau ngia pa-kawiningu-nggu, uopangga welingu la manjurangu. Tàka hi ku-paoingu la mbaha eti, bau pamara-duka.

⁸Na panii i MIRI, “Napa ku-paita-nggau ànda ngia palimu, ku-kapipi dàngu kupanau-nggau.

⁹Àmbu hama tuna njara manda ningu kanandingu-kau, na pawika dàngu rapa dàngu liku, jàka nda tuna nda na-panamatungu-a,” wànangga.

¹⁰Na tau njala nanggàna-ya mayila dangu; tàka na tau ma-monungu lai MIRI pa-daingu mangga-nanya wàngu mbuhangu-na.

¹¹Hanggela hawola-wa ha dimi ma-karàda ruku pawunda-na i MIRI. Hawola-wa ha mbuu ndàbami tau tànji!