Read Kambera PAMALANGUNGU 34 Bible Online

PAMALANGUNGU 34 - Kambera bible

PAMALANGUNGU 34

¹Pamalangungu-na i Ndautu, ba na-pakatoba wikina la hanggana i Ambimeliku, hi kiri wànggaya, palaku.

²Pamalangu mànunya i MIRI wàngguka, dàngu ka wotunya Nyuna wàngu nda kambotahu-na.

³Ka kuhayi - yidi ruku da paràma-na i MIRI wàngguka; màtawa ka darongu mbaha eti da tau pa-kapidihu.

⁴Parànja-dànggawa pa-pabokulu-ya i MIRI, màlanda ta-parànjangu pa-mangara-nya na tamuna.

⁵Ba ku-hamayangu nahema-ka i MIRI, na-pahàla-ka welingu la mangàdatu-ka.

⁶Na tau pa-kapidihu damonu-nya Nyuna hi da-hawola, nda ningua latana ka da-makia.

⁷Na tau manjurangu nawara, tàka i MIRI nahema-ya, dàngu hi na-pahàla-ya welingu la mayila-naka.

⁸Na papalewa-na i MIRI na-manggangu tau karàda, hi na-pahàla-ha welingu la hanggàmaru.

⁹Era wiki-nyawa ba dira hàmuya i MIRI, oha-anaka na tau na ma-handera lai Nyuna.

¹⁰Mahumbaru-nyawa i MIRI, ha nyimi dimi banjaru-na, na tau karàda nda jia tàka-ananya manjaka.

¹¹Da hingambu damanjuu paraï pajapu pangaada; tàka na tau mamonu-nya i MIRI nda nggàra-a manjaka-nya.

¹²Patingingu ha anakeda mbuu ndàbami, ku-papeka-nggai la patembi-ya i MIRI.

¹³Imbuhangu-du pamalai luri dàngu la papàda-nya na mahàmu?

¹⁴Àmbu tikidu kareuku akatu, dàngu àmbu mbuhanya na kaputingu.

¹⁵Wiliru-nya na akatu, wundawa mahàmu, pamukaru-manya na papeku.

¹⁶Da tau manundu na-hamata-ha paraïna i MIRI, jàka dawara pakarai pandulangu na-tanaü-ha.

¹⁷Tàka da tau akatu na-hanobaku-ha; jàka dameti-ka paluu marombangu-ha.

¹⁸Jàka dawara da tau manundu, i MIRI na-tanaü-ha, hi na-pahàla-ha welingu la handuka-ka.

¹⁹I MIRI nalihi-nja da tau da mahala etida; na-pahàla-ha da tau mambota monungu-da.

²⁰Na tau hàmu na dangu na mayila papàda-na, tàka i MIRI na-pamara-ya welingu la mbuu ndàbana.

²¹Na ihidaa-na namangga mànunya paraïna i MIRI, hi nda ana hapungu-mbu riina papata.

²²Na tau akatu napa nameti ruku akatu-na, na tau ma-karaü-nya eti na tau ma-manundu, pa-hukungu-ya.

²³I MIRI na-pamara-ha da atana; da ma-handera lai Nyuna nda nanggàna-aha hukungu.