Read Kambera PAMALANGUNGU 35 Bible Online

PAMALANGUNGU 35 - Kambera bible

PAMALANGUNGU 35

¹Pamalangungu-na i Ndautu. MIRI, tumbaru-yawa na tau ma-tumbaru-ka, bera-yawa na tau mabera-ka.

²Pitiwa temi kudu dàngu temi bokulu-mu, manyamalu-wa patula-ngga.

³Yayapu-wa nimbu kababa dàngu nimbu hamuluru-mu pa-tumbaru-ya na tau mayaulu-ka. Peka-nggawa ba Nyumu ma-pamara-ka.

⁴Màtawa na tau na mawuku-ya la pa-pameti-ka ka pakàku-ya dàngu ka pa-makia-ya. Màtawa na tau ma-pahamangu pa-tumbaru-ka ka dalaku hora.

⁵Màta ka nanyara-ha papalewa-na i MIRI, hama tuna kalàmba pa-hawuru ngàndi ngilu.

⁶Màtawa ka nayaulu-ha papalewa-na i MIRI la ànda ma-kapàtangu dàngu ma-taràhiku.

⁷Kahewa-ma-ana ba dabata-ngga remba dàngu da àkingga lambongu la payàpa-ka.

⁸Màta ka na tàkanja kabu pànda mbutingu. Màta ka naremba-ha remba wikida dàngu ka da-hadànjalu hi damànji.

⁹Tàka hi ku-paoingu rukuna i MIRI, na hawola na etinggu ba na-pahàla-ka.

¹⁰Weli etinggu papanii, “MIRI, Nyumu nda ningua menjamu! Upahàla-ya na-malamanga welingu la ma-kapàru, hamanai na mamila dàngu na ma-mayila welingu la ma-kapidihu-ya,” wànggu.

¹¹Da hakahii da ma-akatu da-hanobaku-ka, hi da-panjala-ka pawunda-ha da panda pinggu.

¹²Na hàmunggu da-palimba-nya wàngu ma-akatu; ku-tandaningu la mbota monungu.

¹³Ba dahidu, ku-hawina dàngu nda kungangu-a; ku-karuduku pa-hamayangu,

¹⁴beri hama tuna ba hamaya-nya tungguna na haàtu angu dedinggu jàka ndia na haàtu kandua nditaku-nggu. Ku-karuduku ba kuhiinja, ba hama tuna handukangu ina wikinggu.

¹⁵Tàka ba ku-handuka, hawola biada-nya, hi da-langgungguru la pa-tumbaru-ka. Laku haidaku - haidaku-da ba da-paakangga.

¹⁶Da-nutakungu pa-paakangu ma-kaliparu, da-kaburaü ba da-tàngaru-ka.

¹⁷Lundu pirangu-mapa, ou MIRI, lundu pirangu mapa Nyumu bau wàngu pakuki-aka? Pamara-kawa welingu la hànjalu-dangga, pahàla-ya na luringgu welingu la hinga nuda.

¹⁸Ka ku-pamalangu-nggau la mbimbilu na banjaru-mu, dàngu ka kuwotu-nya na tamumu la mbabaku-da.

¹⁹Àmbu màtangga ka da-pajulu-wàngga paraï tau mamuhu-ngga dàngu nda pa-witingu. Àmbu màtangga ka dapaoi-ngga paraï tau ma-karaü-ngga eti dàngu nda nggàra kiringu.

²⁰Na kareuku-da nda na-malijangu-a; da tau da mambuha-nya na peku dalapi-ha.

²¹Dakabà - bàtingu ba dawara-ngga, ba mbàda ita danyaka na pawunda-nggu.

²²Tàka Nyumu MIRI mbàda ita-mamunya; àmbu daingu maraumu dàngu kandii biamu.

²³Manyamalu papulu angungga la palakara-nggu, ou Alanggu, ou MIRI-nggu, ndula àru-kika!

²⁴Pulu angungga, bau moladu ou MIRI Alanggu, àmbu màtanya na muhu ka napaoi-ngga.

²⁵Àmbu màtanja papanii la etida, “Hàmu duka ba mbàda pameti-ndanya. Jia-mayaka na parinju-nda!” ka àmbu wàda.

²⁶Màtawa na tau ma-mbuhangu paita-ya na mayila-nggu ka dambingu dàngu ka da-makia. Màtawa na tau ma-pajangga wikina lai nyungga ka pawawa dàngu ka pa-makia-ya.

²⁷Màla àruki ka na-paoi mbaha eti na tau ma-mbuhangu paita-ya ba pamàna-ngga. Màla àruki ka da-nutakungu papanii, “Kanjupu bokulu-ya i MIRI! Narinju-nya ka na-mambiru na atana!” ka wàda.

²⁸Napa ku-bobaru-ya na tànji molamu, dàngu pawotu malo - lodu-nggamu Nyumu.