Read Kambera PAMALANGUNGU 36 Bible Online

PAMALANGUNGU 36 - Kambera bible

PAMALANGUNGU 36

¹Nduma ma-kapipi tau maludu. Lawiti-na i Ndautu atana i MIRI.

²Na njala napanii la wini eti tau akatu, nda ana mangàdatu-mananya i Ala.

³Nakaka wikina ba ma-wirungu-ya, hi nda na-pàdangu njalana, dàngu nda nahuda eti-anya.

⁴Da kareuku-na da-iraku dàngu ma-kaputingu ju - juaya, na hàmu dàngu na manggàna nda na wunda-ahapa.

⁵La ngia pa-katuda-na nawuku-ya na ma-akatu; da pawunda-na nda ningua mahàmu, na akatu nda jia tulaku-ananya.

⁶MIRI, na pa-namungu-mu hama jangga awangu-ya, dàngu na tuturu-mu natoma la karumangu.

⁷Na hàmumu na-kahuluku hama jangga palindi-ya, dàngu na tànji molamu na-majolungu hama kuruduu-ya; na tau dàngu na banda ukabubulu-ha ou MIRI.

⁸Kanjupu pa-wilingu-ya na pa-namungu-mu ou Ala, la lumbu ruu kàpamu na-handera ningu na tau.

⁹Nahoda-ha pangangu mabundu làndangu la Umamu, dàngu pa-ngunungu la lukumu na ma-pahayandalu.

¹⁰Jiakau Nyumu pingi lurina na pa-padika-muka, la hariimu ma-itangu hambila.

¹¹Màla àruki ka daingu mbuha-munya na tau matanda-kau Nyumu, dàngu kau wuangu mahàmu la tau tànji eti.

¹²Àmbu màtangga ka na-hànjalu-ka ma-ngànjangu, jàka ndia ka nayaulu-ka tau akatu.

¹³Tàngaru-ha da tau mawunda ma-akatu mbàda njoru-daka, da-kapàhaku hi nda peku hadangu belida.