Read Kambera PAMALANGUNGU 37 Bible Online

PAMALANGUNGU 37 - Kambera bible

PAMALANGUNGU 37

¹Lawiti-na i Ndautu. Àmbu na-hariwatu na kanandingu-mu rukuda da tau katadaku, oha-daiki nyuda àmbu jia wàmu-njaka da tau mawunda njala.

²Nadu ba hama mapu meti-ma-aha ba darengga molungu, ba hama tuna rumba mamalaï-ha ba lupangu dameti.

³Wai-yawa i MIRI, dàngu wundawa mahàmu, ngia-nyawa na tana nuna dàngu tuturu-mu.

⁴Himbuwa pa-ohangu-mu lai MIRI, napa Nyuna na-pajàngapu-nya na rinju etimu.

⁵Huharu-nya na lurimu lai MIRI, monunya Nyuna napa nandula-kau.

⁶Na patutungu-mu napa na-paloha-nya hama tuna na hambila, na manundu-mu napa naharii hama tuna na mata lodu.

⁷Nedi-nyawa i MIRI wàngu mandangu etimu, nedi mandangu bia, lundu nawàngu etina. Àmbu kapihi-nya na tau ma-paura, na ma-hàrangu pawunda wulu akana.

⁸Wiliru-nya na karaü eti dàngu na mbana eti, nuda nu pa-hanggàmaru wànguya.

⁹Nadu na tau mawunda akatu pa-pamolungu-ya, tàka na-mamonungu lai MIRI namangu-nya na tana kangeha-na.

¹⁰Na tau akatu narengga molungu, jàka himbuya, mbàda nda ni-anyapa.

¹¹Na tau karàda eti namangu-nya nuna na tana, dàngu napàda-nya na mbokaru na mabundu làndangu.

¹²Na tau akatu nawuku-ya na akatu la tau hàmu, dàngu na-kaburaü-nya ba na-tàngaru-ya.

¹³Tàka i MIRI nariki-nya na tau akatu, ba napinya na mareni njàpuna.

¹⁴Da tau akatu da-binjiru hapanda hi da-katutu wàngu pana pa-pameti tau mila dàngu ma-mayila, pa-hambàli-ya na tau mahàmu lurina.

¹⁵Tàka da tau akatu napa datanju-nja hapanda wikida, da tandai panada pa-pataha.

¹⁶Da mangu tau hàmu jiapa ka hakudu-da darihi pa-wilingu-pa welingu la pawulu tau akatu.

¹⁷Nadu i MIRI na-poraku-ha da àtalu tau akatu, hi naopa-nya na tau mila.

¹⁸I MIRI namangga-nya na luri tau manundu, na mangu pa-kangeha-da na-padaingu lundu nu - nu.

¹⁹La ndaungu tanjàriku nda da-handuka-a, la rehi rimbangu na patoma ndàba.

²⁰Tàka da tau akatu napa da-tàlaru, da muhuna i MIRI napa da-molungu, hama tuna na wàla rumba la maràda, napa da-munangu la kutungu.

²¹Na tau akatu napiti parutangu, tàka nda na-pabelingu-a, tàka na tau hàmu na-wuangu wàngu màja etina.

²²Na tau pa-pakanyuru-na i MIRI napa da-kangeha-nya na tana, tàka na tau paràtu-na pawàngga-ha.

²³I MIRI na-kapipi-ya na tau la ànda li la luku palana, Na-paundu-nya na tau na paora-na eti na huri lurina.

²⁴Jàka nanjoru nda jia jàra-ana, nadu i MIRI ba na-pamàndu-nya na limana.

²⁵Piti welingu ba bidi tauka lundu kuweda tunggu yia, ndedima ku-itangu tau hàmu pa-dunjaku-na i MIRI, jàka ndia, ana umbuku-na mamila tanjàriku.

²⁶Naingu-mana nawua parutangu-na, tàka da anana hi kanyuru-ha lai nyuna.

²⁷Wiliru-nya na akatu, wundawa mahàmu, da ana umbuku-mu dangia-nya na tana lundu nu.

²⁸Ba nambuha-nya na pawunda mahàmu dàngu na mamola i MIRI, nda namàta-anya pandora meha na tau na ma-tuturu lai Nyuna. Daingu kabubulu-naha lundu nu, tàka da ana umbuku tau akatu napamau-ha.

²⁹Na tau manundu napa namangu-nya na tana kangeha-na, hi nangia-nya lundu nu.

³⁰Na tau hàmu natiki kareuku manggàna, namola mànu la kareuku-na.

³¹Na Uku Alana hanina la etina, nda na-hiliru-a welingu lai nu.

³²Na tau hàmu na-pandapu-nya paraï tau akatu nahimbu wihuna pa-pameti-ya.

³³Tàka i MIRI nda napuli-anya nyuna la lima muhu, nda namàta-anya ka hukunya la rehi patanda-nya ngerana.

³⁴Monu-nyawa i MIRI dàngu nunjuya na hupu liina napa Nyuna na-jijiku pajangga-kau nyumu la panduma-nya nuna na tana kangeha, napa uita-ya ba napamau-ha da tau akatu.

³⁵Handàka kuita-ya na haàtu tau akatu na mapanii abungu; nyuna hama pingi ai katombuhu-ya ma-tanjiku amuna.

³⁶Tàka ba talànga nàhungga,[23] nda nii-anyapa, kuhimbu-aya nda kuhili hunggu-ayapa.

³⁷Hamata-ya na tau hàmu dàngu na matànji etina; na mambuha-nya na peku, nanedi-nya mànjaku la rehi na manàmu-nya.

³⁸Tàka da tau njala napa pa-patàlaru-ha; napa da ana umbuku-da pa-pamolungu-ha.

³⁹I MIRI na-pamara tau manundu, hi naopa-nya la rehi handuka.

⁴⁰Nandula dàngu na-pahàla-ha nyuda, na-pamara-ha welingu la tau akatu, nadu nyuda ba da-handera lai Nyuna.