Read Kambera PAMALANGUNGU 40 Bible Online

PAMALANGUNGU 40 - Kambera bible

PAMALANGUNGU 40

¹Nduma ma-kapipi tau maludu. Pamalangungu-na i Ndautu.

²Kunedi manjilu-nya na pa-ndulangu-na i MIRI; hi natingi na-tanaü-ya na waranggu.

³Na-padita-ka welingu la rowaku ma-pahanggàmaru, welingu la ma-kanggauhaku. Nawotu-ka la tandula pinu watu, tàka hi na-bànduku na pangganggu.

⁴Na-papeka-ngga paludu wàngu bidi ludu, na ludu wotungu la Alanda. Nadangu na tau na maita-ya hi da-mangàdatu, tàka hi dawaiya i MIRI.

⁵Oha-naka na tau na mawaiya i MIRI, na manda kikungu pa-marubukungu marapu, manda karai pa-ndulangu la tau ngànjangu.

⁶MIRI, kanjupu danguya na pawunda-mu lai nyuma, ou MIRI Alanggu, nda ningua menjamu! Dangu pa-lakunda-mu ma-pahangàtaru-kama, nda ku-ngalangu-a papeka ndàbaha.

⁷Maraku parupu dàngu pangangu, ndau ora-anja, ndau karuhi-a kameti maraku patunu dàngu kameti maraku podahu njala. Tàka Nyumu mbàda wua-munggaka kahilu marongu-ya na talia liimu.

⁸Tàka hi kuhema, “Yiangga yia, la mbukumu pa-tulihu-ya na rukunggu nyungga.

⁹Ku-rinjungu pawunda-ya na pambuha-mu, dou Ala, na lii panaungu-mu ku-kakomba kambu ku-kawalu kuruya,” wànggu.

¹⁰La pauhi banjaru-mu ku-bobaru-ya na lii langu hàmu ba mbàda pamàna-mu-nggamaka. Dàngu nda kambotahu-na ku-bobaru-ya nuna, mupi hàla-manya nuna, ou MIRI.

¹¹Na lii mànangu nda kukàpi-anya la eti, ku-bobaru mànuya na tulangu-mu dàngu na tuturu-mu. La hangga banjaru-mu pàdi nda wànggua, tàka bobaru-manggunya na panamungu-mu dàngu na tuturu-mu.

¹²MIRI àmbu pànjangu-du pamila-ngga eti; opa mànu-nggawa wàngu mbuhangu-mu dàngu tuturu-mu.

¹³Na pa-manjurangu wàngu da-winggiru-ngga, nda pataü-aha danguda. Dayaulu-ka paraï da njalanggu hi lupa nda peku itanggu. Na danguda darihi-nya na lunggi la katiku-nggu, hi lupa kumbota monungu.

¹⁴Ou MIRI, pamara-kawa, lu ndula parengga-ngga MIRI!

¹⁵Màtawa na tau na ma-mbuhangu pa-pameti-ka ka pakàku-ha hi dapalai hora. Màtawa na tau mapaoi-nya na ura dedinggu ka beraha dàngu ka pa-kalana-ha.

¹⁶Màtawa na tau na mariki-ngga ka da-katàtaku dàngu ka da-makia.

¹⁷Màla àruki na tau mbuu ndàba na malumu-nggau ka da-hanggela hawola dàngu ka dambaha eti, dàngu mbuu ndàba na tau na mambuha-nya na mànangu pawua-mu ka dapanii, “Langatàka, ma-bokulu-ya i MIRI!” ka wàda.

¹⁸Nyungga yia kumila dàngu ku-lamanga, tàka Nyumu MIRI uhamata-ka. Nyumu tulanggu dàngu ma-pamàna-ngga, àmbu mengenahu, ou Alanggu!