Read Kambera PAMALANGUNGU 44 Bible Online

PAMALANGUNGU 44 - Kambera bible

PAMALANGUNGU 44

¹Pamalangungu tau Kora. Ludu lii papekangu. Nduma ma-kapipi tau maludu.

²Ou Ala, mbàda rongu wiki-manyaka na lii kaloka papeka-da da boku la mangilu-ma ruku na pawunda-mu na ma-wirungu la rehi la handàka-na.

³Nyumu wiki manyara-ha da ba - banjaru ka na-ngiangu na banjaru-mu la tanada nyuda. Da banjaru hawiangu mu-patàka-nja manjurangu, tàka na banjaru-mu mu-pahia-nya paworu.

⁴Dawàhi-ya nuna na tana nda ruku hapanda-a; nda ruku àtalu wiki-ada hi datalu, tàka ruku kodi màkamu dàngu na hambila-mu ba ninggau, ba jiaya na tanda mbuha-munya na banjaru-mu.

⁵Nyumu jiakau Hanganji-nggu dàngu Alanggu, mawua-nya talu na banjaru-mu.

⁶Wàngu kodi màkamu ba ma-pakàku-ya na muhuma, dàngu hi ma-panyàku-ya na banjaru ma-hànjalu-kama.

⁷Ba nda jiaha dapana-nggu da pa-hamela wànggu, na hapanda-nggu nda kutalu wa-anya.

⁸Tàka Nyumu ma-pamara-kama welingu la papama, da tau ma-karaü-nggama eti mbàda pakàku-muhaka.

⁹Tàka nyuma hi mawotu mànunggau, dàngu hi nua nainguna ma-pamalangu-nggau.

¹⁰Ba tuna dunjaku biamu-nggama nàhu bau màta-nggama pa-pakàku-kama. Ndau karia-a-nggamapa la pajurungu-ma.

¹¹Umàta-nggama ba mapalai, welingu la muhu maramba-nja da bandama.

¹²Umàta-nggama pa-hambàli-kama hama tuna mbimbi, mu-patanyala-nggama la honga banjaru-ka.

¹³Udangga-nya na banjaru-mu nda pira-a wilina, dàngu nda nggàra-a utungu.

¹⁴Upanjadi-kama pa-paakangu wàngu la tau la lihima tàka hi da-paaka-nggama dàngu hi dariki-nggama.

¹⁵Utukama pariki wàna na banjaru-ka; da-pimbilungu katiku-da ba da-pakalana-kama.

¹⁶Malo - lodungu ba paaka-ngga, hi dira makia-ka dàngu hi nda ku-pawula,

¹⁷ba ronguya na-paakangu dàngu na-pakalana-nanggama parai muhu dàngu tau matuu kiringu.

¹⁸Nudaka mbuu ndàbada nanggana-kama jiapa-kai ka nda ma-maromba-nggau dàngu nda ma-kandulingu-mbu welingu la njanjimu na patura-mu lai nyuma.

¹⁹La etima nda ma-kandulingu-a welingu lai Nyumu; nda mapangga-aya na hupu liimu.

²⁰Ba tuna dunjaku biamu-nggama la kanjidungu; hi nda ma-torungu la njonga banda mbeni.

²¹Ngera hama tuna jàka nda malumu-nya làti i Ala, tàka hi hamayangu biama la marapu,

²²jiangu-ma ba napinya i Ala, nadu ba napinya na ma-kawiningu la etima.

²³Lumunggau Nyumu hi na-kanuki-kama meti, hi beri mbimbi kameti-kama.

²⁴Hadangu-wa, ou MIRI! Nggikina hi mahuru biamu-nya? Hadangu-wa! Àmbu tebuku-kama lundu nu - nu.

²⁵Nggikina hiu kawiningu, tàka hiu maromba-nya na mayila dàngu na handuka-ma?

²⁶Makabu ma-tawàlahu la tana, ma-tanggunggulu la kumburu tana rukuna ba makàku.

²⁷Mainguwa pandula kama, pahàla-kama bau pa-namungu-du.