Read Kambera PAMALANGUNGU 45 Bible Online

PAMALANGUNGU 45 - Kambera bible

PAMALANGUNGU 45

¹Pamalangungu tau Kora. Na ludu pambuhangu. Nduma ma-kapipi tau maludu. Pa-namatu-nya na wiliku: Wàla mangàta.

²Na-mbumbaru na lawiti minangu welingu la etinggu, kuwotu wiliku ludunggu la hanganji. Hama tuna na tulihu mini manggàna lawiti, na làmanggu na-hawanjiru patiki lawiti.

³Jiakau nyumu marihi paràka miningu la honga mbuu ndàba tau, na kareuku-mu mahàmu juaya, tuna nu duka hi napeka-nggau mahàmu paraïna i Ala lundu nu - nu.

⁴Jorutu-ya na hapanda la bànggimu, ou hanganji kaborangu, kanjupu bokulu dàngu mangarangu-kau!

⁵Laku hanggangu-wa wàngu paora-nya na manàra la pariba-nya na pa-deningu dàngu na mola; wàngu àtalumu aülungu-wa talu manàra!

⁶Na panamu na madàka nalumbu làpahungu puhu muhumu, la hanggamu danjoru da banjaru.

⁷I Ala nawua-nggau kawaha pa-pareta,[26] na kawaha-mu na-torungu lundu nu - nu; wàngu mola bau pareta rayatu-mu.

⁸Mumbuha-nya na ma-padeningu dàngu mu-karaü-nya eti na akatu; tunanu duka i Ala, na Alamu hi napindi-kau, hi na-pabundu-nggau pa-ohangu rihinja da maràmba hawiangu.

⁹Da ngaümu dambui kati wàngu emuru, atu homa dàngu ai nitu; da matundu-nja da malingu pambabu wàngu la uma nggedingu hanganji jiaha da pambaha eti wàmu.

¹⁰La honga kawini manandangu la uma hanganji ningu ana kawini hanganji. La kawana kanjàka pareta na-ndolaku i tamu ràmbu dàngu ngaü àmahu rara ihi mbàngina.

¹¹Ou ràmbu kudu, tingiya na liinggu, maromba-nyawa na banjaru dàngu na kalembi-mu.

¹²Na manandangu-mu nayila etiya na hanganji, nyuna miri-munya karuduku-nya nyuna.

¹³Na ma-mandapu-nya la Tiruhu dangàndi-nggau maraku; da tau wulu da-pamukarungu pahimbu wihu kau mbuhanja.

¹⁴Natama wàngu mbinu ngaüna na anana kawini na hanganji, na kalembi-na pa-hikungu kalotu àmahu raraya.

¹⁵Wàngu ngaü manda habata jua pabetingu-na ba paï karia-nya la hangga hanganji, da-ndàkiya paraï da anakaria anguna, nyudambu nduma hanganji-ha.

¹⁶Da-kakàlaku mbaha eti ba datama karia-nya la uma hanganji!

¹⁷Napa dadangu da anamu mini dou hanganji-nggu duku la pa-mandapu-nya na kanjàka pareta da boku la mangilu-mu. Napa muwotu-ha la pa-kawaha-ya na pinu tana nggubulu-na.

¹⁸Yia na ludunggu ku-pahamboka-kau lundu ana umbuku-mu ka lundu nu - nu ba dawotu-nggau paraï da banjaru-ka.