Read Kambera PAMALANGUNGU 50 Bible Online

PAMALANGUNGU 50 - Kambera bible

PAMALANGUNGU 50

¹Pamalangungu-na i Ahawàpu. I MIRI, Ala Hupu Mambiha napanii; napaau-nya nggubulu-na na tana welingu la pahunga lundu la patama lodu.

²Welingu la Hiungu, na paraingu mahupu manandangu-na, na-handaraku lohangu i Ala.

³Nàmunya na Alanda, nda jia kandii-ana, na-mangilu-nya epi ma-kandulangu, dàngu na-winggiru-nya làpuru ma-wirungu.

⁴Na awangu na tana, napaau-nja pa-hakahii-nya ba na patanda-nya ngera na banjaru-na.

⁵Napanii, “Pauhi ndàbanya na banjaru-nggu na mambàda tura lii pa-njanjingu dàngu Nyungga, hi pa-karàngi wànya kameti maraku pa-hambàli,” wàna.

⁶Na awangu na-bobaru-ya, i MIRI ba patanda-nanya ngerana na banjaru-na, dàngu ba Nyuna wikima na hakimu-na.

⁷Patingingu-wa ha banjaru-nggu ba panii-nggunya, ha Ihirailu ka kupeka lai nyimi wànggu; Nyungga yia Alaka, Ala-mingga.

⁸Nda rukuda da kameti maraku-ami hi panjala-kai; da kameti maraku patunu-mi nii mànu-madunja la hangganggu.

⁹Nda nggàra kuihi wàngua hapi la okamu, jàka ndia da kamàmbi la kabàba-mu;

¹⁰ba mangu-manggunja mbutada da banda la omangu, dàngu da banda mopu la riu rata palindi.

¹¹Mangu-mbunggunja da ma-hawurungu la ma-palindingu, dàngu mbutada da maluri-ka la maràda telangu.

¹²Jàka manjuu-nggunya nda nggàra kuihi wàngua papanii-ya lai nyimi, nadu na tana dàngu na ihina ba mangu-nggunya.

¹³Tolu mini romba hapi nda kungangu-a, nda ku-unungu-mbu ria kamàmbi bumbu.

¹⁴Wotuwa kameti maraku pamalangungu lai Ala,[28] pahàra-nya na njanjimu lai Ala Hupu Majangga.

¹⁵Jàka natàka na handuka, pangodungu lai Nyungga, napa ku-pahàla-kai, tàka hii wotungga.

¹⁶Tàka la tau akatu napanii i MIRI, “Ndau ngaba-anya la patiki-ha da ukunggu, dàngu papanii wànya na pa-njanjingu-nggu.

¹⁷Ba ndau mbuhangu payema-ya na kanyàngi-nggunggau, tàka hiu tebuku-ha da hupu liinggu.

¹⁸Jàkau itaya na haàtu ba nabohu, kiku-mamunya, dàngu bau panggolu dànja da ma-mbuhangu pa-njuraku.

¹⁹Napaniimu ma-akatu ju - juaya, rimangu mànu-mamunya la pa-kaputingu.

²⁰Panua likungu-mamunya bau pawauya na angu dedimu, dàngu bau pairaku-ya na angu inamu.

²¹Bau wundaha nudaka, pàdi wànggu bia, tàka hiu kakaka Nyungga ba kuhama-nggau nyumu. Tàka nàhu ku-paaka-nggau, dàngu mbuu ndàbada nuda ku-paloha-nggaunja.

²²Eti wànyawa dimi ma-maromba-nya i Ala; pananjarungu ka àmbu ku-patàlaru-kai, hi nda ningu ma-pamara-kai.

²³Na ma-pamalangungu wàngu kameti maraku-na, jiaya na matembi-ka; dàngu na tau ma-palànyapu hahangu ànda, napa ku-paita-nya na mànangu welingu lai Nyungga,” wàna.