Read Kambera PAMALANGUNGU 51 Bible Online

PAMALANGUNGU 51 - Kambera bible

PAMALANGUNGU 51

¹Nduma ma-kapipi tau maludu. Pamalangungu palawiti-na i Ndautu

²ba nahàla pa-kanyàngi-nya paraïna i Wunangu Natàngu la hambeli njala dànanya i Mbàtihemba.

³Aï àru-kika ou Ala, ba daingu pa-aïngu-mu, podahu-ha da njalanggu ba na-bokulu na pa-aïngu-mu.

⁴Bahaha mbuu ndàba da akatu-nggu; payaha-ngga welingu la mbuu ndàba da njalanggu.

⁵Ba kupeka-duha da nja - njala-ngguka, da njalanggu naingu-mana ba ku-pangàda-nja.

⁶Lai Nyumu, lai Nyumuma kunjala ningu, na ma-akatu ba wàmu jiayai na pawunda-nggu.

⁷Langatàka kudedi ngàndi akatu, ku tumbu wàngu njala la kambu inanggu.

⁸Ukaruhi-ya na tànji eti; pinu wànyawa manggàna-mu na etinggu.

⁹Payaha-nggawa, jiangu-ma duku ku-yahangu; bàha-kawa ka kurihi pabara welingu la kamba.

¹⁰Màtawa ka kurongu lii mbaha eti, na etinggu na pa-uraku-mu ka nahili pa-oingu.

¹¹Tuu kajia-hawa da njalanggu, dàngu podahu-hawa mbuu ndàba da ndokunggu.

¹²Wulungga eti warahu, ou Ala, pabidi-ya na wininggu wàngu eti torungu.

¹³Àmbu haneba wàngga lima welingu la hanggamu, dàngu àmbu pitiya na Ngahu matua-mu welingu lai nyungga.

¹⁴Pa-hawola belika rukuna na mànangu welingu lai Nyumu, wua-nggawa eti ma-mbuhangu pa-karadaku-nggau Nyumu.

¹⁵Ka ku-papeka-nja hupu liimu da tau njala, wàngguka, ka dabeli lai Nyumu.

¹⁶Pamara-ka welingu la meti ou Ala Ma-pamàna-ngga,[29] ka wàngu mbaha eti ba ku-bobaru-ya na tànji molamu.

¹⁷Ndulaka la kareuku, ou MIRI, napa ka kuwo - wotunggau Nyumu.

¹⁸Kameti maraku parupu ndau bihua; làti jàka kuwotu kameti maraku patunu, nda jia yema-amunya.

¹⁹Na kameti maraku pambuha-na i Ala, jiaya na eti na ma-lujuru, na eti ma-pawawa na ma-panjilungu ndau tebuku-aya.

²⁰Ou Ala, paloha-nya na hàmumu lai Hiungu, pahada belinja da kilimbatu Yeruhali.

²¹Tàka hiu mbuhangu payema kameti maraku ma-paràkangu, da kameti maraku mangu heungu patunu hapi mini rombangu napa pa-maraku wànguha la ngia pa-maraku-nggau.