Read Kambera PAMALANGUNGU 53 Bible Online

PAMALANGUNGU 53 - Kambera bible

PAMALANGUNGU 53

¹Nduma ma-kapipi tau maludu. Pa-namatungu la wiliku: Mahalàtu. Ludu lii panaungu-na i Ndautu.

²Na tau akatu, “Nda ningua Ala,” wàda la etida. Na pawunda-da na-akatu dàngu na-iraku; nda ningua mawunda mahàmu.

³Welingu la awangu i MIRI na-kanàndaru-ya na banjaru tau la pinu tana, ba nahimbu tau manggàna ma-marubuku-nya Nyuna.

⁴Tàka mbutana na tau mbàda njàrangu dàngu iraku-naka nda haàtu-ma mawunda mahàmu.

⁵Napanii i MIRI, “Nda dapinya ihu da tau akatu? Ba ramba-danya na banjaru-nggu, dàngu ba nda ana hamaya-dangga Nyungga,” wàna.

⁶Kanjupu mangàdatu-ya na tau akatu, tàka nda ningua làti pa-mangàdatungu, nadu i Ala na-hàbaru-nja da rii kawudu tau ma-nggupulu-kai nyimi; mbàda tulaku-nahaka paraïna i Ala, tàka nyimi hii pakàku-ha nyuda.

⁷Welingu la Tandula Hiungu ka napuru àru na mànangu nduma Ihirailu. Ka mbaha eti-nanyaka na wàlana i Yakupu jàka na-pahàra belinya paraïna i MIRI na mandapu mambiru-na na banjaru-na.